maṯa 11 - ŋuɽun ŋun ŋiya ŋun ŋikaiilo elo 1966

asa 11

¹ gwune na yecu ṯɩmi ŋuɽuna ŋun ŋuməḏɩjulo calɩmis juŋun jun jiro di na gwuttən ŋɩru ŋe ŋagin, nuwalane kalo kono nuar gwalɩmi liji naṯuluməḏɩjo gi jɩmɩrɩgen jagin.

yuwana mamadan

² na yuwana diŋɩni kɩrkon ŋɩru ŋe ŋeḏi kɩrisṯo, nuwəjo calɩmis juŋun jɩttən,

³ naleicɩno, ŋa gwiro gwun gwara gwila i anaḏuḏɩnɩjo gwiro kaja?

⁴ nal yecu wɩrlijo ŋuɽuna nuleicɩno, wiḏɩl nyuməḏɩjo yuwanaŋ ŋuɽuna ŋun ŋanyaldiŋɩni na ŋun ŋanyalaŋu:

⁵ liji lun lɩrimə gi jei laḏaŋa ga, na jɩbɩjo jawewele, na lun litɩlo ŋilo liŋir nanu, na lun lɩrimə gi nani ladiŋɩni, na lun laiyo ləḏiɽi na lun late ləṯi ŋɩdio no na ŋuɽun ŋiŋir ŋeḏi elo ŋuməḏɩni lagin;

⁶ na ḏimoreḏa ḏaje lugwun gwun gwate gwobɩlkəḏɩni lugwi nə.

⁷ na kaja gun giwiḏɩlge na yecu eico liji gwan yuwana no, nyaltuḏi kiḏɩwer nyalar lanaŋaḏa aŋe? iṯa yun yaṯi ḏɩron əri a?

⁸ namɩni nyaltuḏi nyalar lanaŋaḏa aŋe? gwiji gwun gwikanu giria gun gɩmɩḏe ganu a? lono lun laṯɩkani jiria jun jɩmɩde ganu iatɩje gi lɩḏunu leḏi lele.

⁹ namɩni nyalḏudi nyalar lanaŋada aŋe? nebɩŋ a? i, nyi gweiceijɩnə, kweno gwubuṯano ḏi nebi.

¹⁰ gi gwune gwiro kweno gwun ŋulinu ŋan ŋu, eʼe, nyi gwuwəjo ḏuwəjo ḏinyi ḏadara kɩɽelo lugwuŋa gwun gwagele ṯaṯ ḏuŋa muma kɩɽelo lugwuŋa.

¹¹ gwerkwe ganu nyi gweiceijɩno, gi wei lun lilɩŋinu gi la gwate madiɽo gwete gwun gwubuṯano di yuwana mamadan no, namɩni gwun gwɩtieno ŋele ŋeḏi kanyin gwubuṯano lugwun.

¹² na uro ŋwamon ŋweḏi yuwana mamadan kəbe gwunne na lun lɩbɩɽe nanu nalar ləḏi ŋele ŋeḏi kanyin ŋɩma ŋe ŋe ḏikeja ga.

¹³ gi gwune nebɩga wei na ŋuɽun ŋun ŋigelijilo elo musaŋ ŋaṯaŋɩḏi ŋuɽuna kəbe na yuwana;

¹⁴ na ḏa nyaləmɩnyi ŋuɽuna ŋeno, na kweno gwan iliya gwun gwara gwila.

¹⁵ gwun gwəṯi nəni neḏi diŋɩna, ŋwudiŋɩni.

¹⁶ na liji leḏi gwunne nuarno liro gi aŋe? liro gi nyaɽe nyun nyijiga gi cu naṯɩlorniḏe gworo ŋɩmaga, nanyarno,

¹⁷ anaŋa lərijəje nyuda namɩni nya late lariṯe no; anərijəje gwula namɩni nya late lɩməri gwula no.

¹⁸ gi gwune yuwana gwuwiḏi nate nunʼe i nuyu no, nanaṯɩlmɩni arno gwəṯi ḏiŋeroma.

¹⁹ na ŋaɽe ŋeḏi liji ŋɩmila gaʼe na ŋeyu, nalmɩni arno, eʼe, gwiji gwun gwiro gəḏou, na gwaṯɩnyu ŋɩmidiə ŋutu, na gwaṯəmɩnyi liji lun laṯɩmeje ṯulba na lun lɩki. na ḏilɩŋeḏena ḏɩmədə ga nyaɽe nye nyuŋun.

ŋɩki gi jɩmɩrɩgen jun jate jəmɩnyu eloŋu no

²⁰ nugireṯɩnya jɩmɩrɩgena jun japine ŋɩru ŋuŋun ŋun ŋɩbuḏo ŋutəno gi gwune late lɩwɩrla ga ŋuɽun ŋun ŋɩki no:

²¹ nueicɩno, ŋɩki lugwuŋa, ŋa korasin, ŋɩki lugwuŋa, ŋa beṯsaiḏa, gi gwune na ḏa ŋɩru ŋɩbuḏo gun ŋɩgelɩnu lagalo ŋagelini sur na saida, nalwɩrla galo ŋuɽun ŋun ŋɩki uro kili nalkani jirla jun jijogɩnya nanu nalpini gi jaro.

²² namɩni nyi gweiceijɩno, sur na saida nalɩtieno ḏakɩmino gworo gwalo gi lamon le ḏakɩmiḏa.

²³ namɩni ga kabranaum, ŋa gwabəḏəṯɩni elo kanyin a? ŋa gwagwuli kalo geḏi liji lun laiyo. gi gwune da ŋɩru ŋun ŋɩbuḏo ŋun ŋɩgelɩnu lugwuŋa, ŋagelini sadum nalmajiga kəbe gwunnɩno.

²⁴ namɩni nyi gweiceijɩno, amɩrɩgen yeḏi sadum yɩtieno ḏakɩmino kworo gwuŋa gi lamon le ḏakɩmiḏa.

yadɩgɩɽe ŋeḏi ŋaɽe ŋun ŋoga

²⁵ na kaja kono na yecu wɩrlijo ŋuɽuna nueicɩno, nyi gweicaŋa sukran, baba gwun gwiro gwele gweḏi kanyin na gweḏi gɩḏilio, gi gwune ŋamalbɩji ŋɩdio ŋeno gi liji lun lilɩŋidi ŋuɽuna ŋutu na lun ləṯi ŋadɩgɩɽenya, ŋalmɩni aŋiɽo nyaɽe nyun nyitinyiti.

²⁶ i dino baba, gi gwune ŋamar dino ŋiŋir gi jei ganu lugwuŋa,

ŋɩru yeḏi yecu

²⁷ ŋɩdi wei ŋɩmiŋil baba gwiḏəḏə; na gwate gwetɩdo gwun gwilɩŋiḏi ŋaɽe no namɩni baba, na gwate gwete gwun gwilɩŋiḏi babaŋ no namɩni ŋaɽe, na ŋu gwun gwaje gwa ŋaɽe aŋijo.

²⁸ wilal lugwi, nyaŋa wei lun laṯape ŋɩru nyupini ŋɩdio gun ŋɩni, na nyi gwəjouwɩrico nyalobe uwə gwe.

²⁹ upinɩl luɽi linyi lagalo nanyalɩmini lugwi, gi gwune nyi gwɩtieno kwulo na gwəṯi dugwor ḏorɩwa, na nyalabuje ḏimula gi dugwor ganu dalo;

³⁰ gi gwune luɽi linyi lɩmɩde nanu na ḏube ḏinyi ḏouwɩrio ganu.