markus 9 - ŋuɽun ŋun ŋiya ŋun ŋikaiilo elo 1966

asa 9

¹ nuleicɩno gwerkwe ganu nyi gweiceijɩno, lo kworo leḏi liji leno lun lɩḏuḏɩnu ŋɩne late lai no kəbe laŋu ŋelɩnya ŋeḏi elo ŋila ŋɩna ŋe.

yecu gwumɩdinu nupiḏe pɽul

² gwune na ŋwamon ete nyəɽɩl na yecu gwulo buṯrusŋaije yagubŋa yuwanaŋa nalabo gi lɩrgwom elo lun lolelo cucun. numɩdini gi jei ganu lagin.

³ na jiria juŋun nalro nɩɽe bupɽul nalar bibɩɽŋal. gwiji gwate kɩḏilio gwun gwəṯi ŋɩma julpiḏi dino no.

⁴ na musaŋa iliya gwe nalaŋino lagin, nalumə yecuŋale.

⁵ na buṯrus uməḏɩjo yecuŋ nueicɩno, gwele gwəri, ŋiŋir ilo ŋɩne. anoḏa jupiya ṯəɽɩl, yete yan ŋa, na yete yan musa, na yete yan iliya.

⁶ liṯɩl ŋɩḏe bucu, nate nalɩŋe ŋuɽuna ŋe ḏuməḏə no.

⁷ nanmɩni jəbɩɽu wilelo nalɩkiɽɩbə nanu gɩḏiḏɩŋilge, na ŋwal gwulo gi jəbɩɽu nalarno, kweno gwiro ŋaɽe ŋinyi ŋun ŋaṯiəmɩnyi, diŋɩnəḏil.

⁸ naldadɩŋa galo, nate naṯɩlaŋu gwetɩdo no, nalmɩni aŋu yecuŋ gwetɩdo gwun gwijille.

⁹ gwune nalgwulo lɩrgwoma nanu nal yecu uməḏɩjo ŋuɽuna ŋɩbɩɽe, nuarno late luməḏɩjo gwiji gwetɩdo ŋuɽuna ŋun ŋaŋəḏɩlo no, kəbe a ŋaɽe ŋeḏi liji diɽi gi ḏaiya.

¹⁰ na luŋa nalməṯo ŋuɽuna ŋeno gi lulo lagin, naṯɩluməḏəṯo laginŋu nalarno, ŋuɽun ŋɩrṯa ŋeḏi ḏidiɽo gi ḏaiya.

¹¹ nalɽoṯədɩjo naleicɩno, gwudaro gəko na jalgaṯɩm arno arram iliya gwila gwerre?

¹² nulwɩrlijo ŋuɽuna nuleicɩno, gwerkwe iliya gwila gwerre nuwəɽeice ŋɩdio wei muma ldu, namɩni galakwe ŋulinu ŋan ŋaɽe ŋeḏi liji, arram ŋuiḏe gworki ŋaniŋələḏəṯɩni ganu.

¹³ nuŋwajeicɩno, iliya mila nalarre ŋun ŋɩbunyɩlo gi gwune ŋulinu ŋan ŋu.

yecu gwuti ḏiŋeroma ŋaɽe

¹⁴ gwune nalwila gi calɩmis nalaŋu liji lutu luwujeicɩlo galo, na jalgaṯɩm nalumə galo.

¹⁵ gwune na liji wei aŋu nalobaga ṯuṯ naleneḏe lugwun nalmɩɽənyo.

¹⁶ nulɽoṯəḏɩjo nuleɩcɩna, nyaluməḏi ka?

¹⁷ na gwiji gwete gi loro ganu wɩrlijo ŋuɽuna nueicɩno, mualɩm gwəri, nyi gwaŋapijo ŋaɽe ŋinyi ŋun ŋate ŋaṯumə no ŋəṯi ḏiŋeroma.

¹⁸ na ŋalo ŋun ganiməṯo nuaici ga kwɩnyəm. ŋabubuja abonya naŋeʼe jɩŋaḏ, na ŋɩrebɩna. muməḏɩjo calɩmis juŋa nuarno ḏaldi namɩni ḏiməliḏami.

¹⁹ nuwɩrlijo ŋuɽuna nuleicɩno, liji le leḏi gwunne lun late ləṯi ḏɩməṯo no, jaḏo gwiro gwun gwar gwilgwije? na nyiməṯo ḏugwor lagalo ŋwamon umɩnyo? apijɩnyi ŋaɽe.

²⁰ nalapijo. na gwune na ḏiŋerom aŋu yecuŋ nurogwogwɩnyeje ŋaɽe cou ḏiḏir; nuaici ga kwɩnyəm nuḏaḏiɽe ga, nuabuja abonya gi jɩŋaḏ.

²¹ na yecu ɽoṯəḏɩjo babaŋ gwuŋun nueicɩno, jaḏo gwiro gwiduḏu gwe ŋaɽe dino? nueicɩno, mimmi ŋoga,

²² na ŋwamon ŋwutu naṯuideḏe kigo na ŋau ganu kani ŋwuɽinye. na ḏa ŋa məṯi ŋɩma ŋa gwanduji ŋuɽuna ŋədi, inəḏije ŋijiŋelejo uwə.

²³ na yecu eicɩno, na ḏa ŋa məṯi ŋɩma gwəmɩnyi, ŋɩdi wei ŋandro gwun gwəmɩnyu.

²⁴ na baba gweḏi ŋaɽe əri gwula nuecɩno, gwele gwi, nyi gwəmɩnyu, baḏəṯiji ḏɩməṯo ḏi ḏɩti.

²⁵ gwune na yecu aŋu liji lɩmeneḏa ldu nulo ḏiŋeroma nuecɩno, ḏiŋerom ḏun ḏiro gɩɽilo, nyi gwo gwuməḏɩjaŋa tuḏi lugwun ŋa gwo gwəḏi lugwun mɩna.

²⁶ na ḏiŋerom əri gwula, nurogwogwɩnyeje ŋaɽe ḏiḏir nudu. nuro gi ŋaɽe ŋun ŋaiyo kəbe na liji arno ŋɩmai.

²⁷ na yecu məṯo gi ḏi nudiɽi; nuḏuḏɩni elo.

²⁸ gwune naləḏi kwu dunu na cəlɩmis juŋun ɽoṯəḏɩjo nyɩkwom, naleicɩno, gwudaro gəko nate nanəṯi ŋɩma ḏanəḏi no?

²⁹ nuleicɩno, ḏiŋerom ḏiro ṯono ḏate ḏaṯɩdu ga dino no, namɩni ḏuməḏɩjo ḏe eloŋu na ḏɩməṯo əbuṯo.

yecu gwuməḏi ŋuɽuna ŋan ḏaiya ḏuyun na ḏidiɽo gi ḏaiya gwerre ganu ŋate ŋɩmila no

³⁰ na luŋa naldu ŋɩnəwei naldare jalil gwe. na gwate gwarno gwiji aŋel no, gi gwune nualɩmi calɩmis juŋun.

³¹ nuleicɩno, ŋaɽe ŋeḏi liji ŋalḏəḏə liji gi di dagin. ŋalɽinye, na ŋaje ŋwamon ṯəɽɩl na ŋədiɽi.

³² nalmɩni ate nallɩŋe ŋuɽuna ŋono no, naldonye gi alɽoṯəḏɩjo.

ḏalɩmia ḏeḏi dujia gwula gwiti

³³ nuobene kamɩrɩgen yun yan kabranaum. na gwune jilo dunu nulɽoṯəḏɩjo nuleicɩno, nyaluməḏi ŋuɽuna ŋɩrṯa lagaloŋu gi ṯaṯ?

³⁴ nalji nyɩkwom gi gwune luməḏəṯi laginŋu gi ṯaṯ nalarno əḏi gwiro gwubuṯano.

³⁵ nujiga, nuəmɩḏe calɩmis jun jiro di na gwuttən nuleicɩno, gwun gwarno gwar gwaje kɩɽelo arram gwaje gɩdo wei, na gaḏam geḏi wei.

³⁶ nuapa ŋaɽe ŋun ŋoga nuḏuḏɩneje kɩlɩgi ganu, nuape di de nuleicɩno,

³⁷ gwun gwəmɩnyu ŋaɽe ŋun ŋiro dino jiri je jinyi gwəmɩnyi, na gwun gwiəmɩnyi gwate gwiəmɩnyi cucun no, namɩni gwəmɩnyi gwun gwuwəjiŋi.

ŋɩki gi ḏakaja gwiji gwun gwapo ŋuɽuna ŋiŋir

³⁸ na yuwana wɩrlijo ŋuɽuna nueicɩno, mualɩm gwəri, anaŋəḏi gwete gwudi ḏiŋeroma jiri je juŋa. na ŋu gwate gwaṯɩligwuḏɩḏe no, nanakajo gi gwune gwate gwaṯɩligwuḏɩḏe no.

³⁹ na yecu eicɩno, nyakaja no, gwiji gwate gwanarre ŋɩru ŋɩma ŋe ŋɩbuṯano kworo gweḏi liji jiri je jinyi no na coucou na gwiḏene.

⁴⁰ gwun gwate gwɩkiḏiḏɩle no gwage gwiro.

⁴¹ na gwun gwajiḏəḏə ŋau kɩɽudo ge jiri je jinyi gi gwune nyaleḏi kɩrisṯo liro, gwerkwe ganu nyi gweiceijɩno ŋu gwate gwaḏuji ŋɩdio ŋuŋun no.

ḏɩminu ga gwan ḏakaja liji lun liro kaja

⁴² namɩni gwun gwobɩlkejo ŋete gi nyaɽe nyeno nyun nyiti nyun nyəmɩnyi, gwiŋir lugwun ŋukanane ele kwulo gwuŋun yun yɩbuḏo nalgwuwini gi ḏɩrawe.

⁴³ ḏa ḏi ḏuŋa ḏimaŋobɩlkejo uɽəḏi ga. gwiŋir ŋa gwəḏi gi ḏɩmiḏa gwiro luḏan, gi gwune aŋanəṯi di dɩttən ŋədugwuli kigo yeḏi jenam yun ŋate yaṯai no,

⁴⁴ kalo ŋun ŋate gaṯɩn lodolo ai no naṯi igo ai no.

⁴⁵ ḏa lara luŋa limaŋobɩlkejo uɽə ga. gwiŋir ŋa gwəḏi gi ḏɩmiḏa gwiro luḏan gi gwune aŋanəṯi ŋwara ŋwuttən ŋaŋgwuli kigo yeḏi jenam yun ŋate yaṯai no,

⁴⁶ kalo ŋun ŋate gaṯɩn lodolo ai no naṯi igo ai no.

⁴⁷ na ḏa gei guŋa ŋɩmaŋobɩlkejo weləḏi ga. gwiŋir ŋa gwəḏi ŋele ŋeḏi elo gwiro gaḏuny gi gwune aŋanəṯi jei jɩttən ŋajagwuli kigo yeḏi jenam,

⁴⁸ kalo ŋun ŋate gaṯɩn lodolo ai no naṯi igo ai no.

⁴⁹ na liji wei lapiḏe pɽul igo ye, na ŋɩdi ŋun ŋaṯɩl liji ḏugijo eloŋu ŋaṯanal gwugwereje ŋwuco ŋe.

⁵⁰ ŋwuco ŋwiŋir, namɩni ḏa ŋwuco ŋɩmaicɩwe na galakwe ŋanyaləjɩco mɩna alaɽuwe alḏɩnye? ouwɩricil ŋwuco alje gi lulo lalo, na ouwɩricil ḏouwɩɽida ŋwuje lagaloŋu ŋɩmaga.