markus 5 - ŋuɽun ŋun ŋiya ŋun ŋikaiilo elo 1966

asa 5 yecu gwudi ḏiŋeroma kwiji gweḏi jaḏarin

¹ gwune nalmuri nalṯɩmi kɩməmu elo geḏi ḏɩrawe kamɩrɩgen yeḏi lijaḏarin.

² gwune nuduḏa kwu murkab ganu nan gwiji weləḏa ganu cou gwun gwuwiḏi kalo geḏi nil gwun gwəṯi ḏiŋeroma.

³ gwaṯɩje kalo geḏi nil. na gwiji gwate gwun gwəṯi ŋɩma gwuŋaki ajirɩjir ye no,

⁴ na ŋwamon ŋwutu na gwaṯɩlgaki jalbaja je na ajirɩjir ye, natuḏa ajirɩjiro ganu na jalbaja nulakɩra ganu jɩtijɩti di de. gwiji gwate gwəṯi ŋɩma gwuḏami no.

⁵ bubruṯ gilio na anyine gwaṯɩje ŋwurgwom elo na kalo geḏi nil naṯuəri gwula. naṯuḏɩrṯini aŋɩna nanu nyɩdol nye.

⁶ gwune aŋəḏu yecuŋ uro ŋɩnəwei, nueneḏe nuiḏi gi jei ganu lugwun.

⁷ nuəri gwula gwubuḏo nueicɩno, a gwar i gwada ŋa yecu, ŋaɽe ŋeḏi elo gwun gwolenelo? nyi gwaŋərɩmi elo gwe aṯɩŋwigwurṯimɩnio no.

⁸ gi gwune gweicuno, tuḏi kwiji ganu, ŋa gwun gwiro ḏiŋerom.

⁹ nueicɩno, ŋa gwan əḏi? nueicɩno, jiri jinyi jutu ganu, anutu.

¹⁰ nuɽoṯəḏɩjo yecuŋ gworki nuarno late lulireije kamɩrɩgen no.

¹¹ na juḏur jutu jijo gɩṯo lɩrgwoma nanu jiṯi ga,

¹² na ḏiŋerom wei uməḏɩjo naleicɩno, wəjije anəḏi gi juḏur ganu.

¹³ na yecu ouwɩrico nalwele. na ḏiŋerom tu naləḏi gi juḏur ganu, na juḏur abɩre nalriḏe lɩrgwoma nanu, nalouṯaḏe gi ḏɩrawe nalḏɩreḏe. na juḏur jaro alɩb gwuttən ca.

¹⁴ na laɽa leḏi juḏur nalabɩre naluməḏɩjo liji leḏi amɩrɩgen yono na kalo gun guɽeico ga. na ləmɩnyo wele lutu lar laŋu ŋuɽuna ŋun ŋɩmila.

¹⁵ nalwila ḏi yecu nalaŋu gwiji gwun gwəṯi ḏiŋeroma gwijiga nukani nujiga muma, na luŋa naldonye.

¹⁶ na liji lun laŋəḏi ŋuɽuna, naluməḏɩjo ŋuɽuna ŋun ŋɩmila kwiji gwun gwəṯi ḏiŋeroma, na gi juḏur.

¹⁷ nalɽoṯəḏɩjo gworki gwele gi ḏiɽil deḏi amɩrɩgen ŋagin.

¹⁸ na gwune naləḏi kwu murkab ganu, na gwiji gwun gwəṯi ḏiŋeroma nuuməḏɩjo nuarno gwalgwele.

¹⁹ gwate ma yecu ouwɩrico no, numɩni eicɩno, wiḏi dunu lugwuŋa na gi liji luŋa ŋaluməḏɩjo ŋuɽuna ŋun ŋɩmal gwele gwun gwiro elo ape lugwuŋa ŋino ŋe.

²⁰ nuwele nuar gwumə gi jɩmɩrɩgen jun jiro di ŋuɽuna ŋun ŋapɩlo yecu lugwun, na wei nalobaga ṯuṯ.

idiɽo gi ḏaiya ḏeḏi ŋaɽe ŋeḏi yairus, na ḏiŋiriḏa nanu ḏeḏi gwa gwun gwaṯarṯo ŋuwəno

²¹ na gwune na yecu aɽuwa murkab gwe mɩna kɩməmu ŋiro kaja, na liji aɽuwaḏa ldu lugwun lutu; na ŋu gwijo ḏɩrawe nanu.

²² na gwele gwete wila gweḏi dunu gweḏi elo gwun gwan yaŋɩrus, gwune nuaŋu nuiḏi ŋwara ganu lugwun,

²³ nuɽoṯəḏɩjo gworki nueicɩno, ŋaɽe ŋinyi ŋun ŋiro gwa ŋo gɩṯo ŋar ŋai; wila gwudo ŋangele di elo ŋundone kaja numiḏe.

²⁴ nalgwele na liji lutu nalgwujane, nalupi nanu.

²⁵ na gwa gwete je gwaṯarṯo ŋuwəno jɩḏilio di na gwuttən;

²⁶ naṯuiḏe ŋɩdi ŋe ŋun ŋutu ŋwakim ŋwutu, nuḏoḏeice ŋɩdio ŋuŋun wei, nate nudone kaja no naṯumɩni aŋɩnu yuŋun iṯane ganu.

²⁷ gwune nudiŋɩni yecu gwe, nuwila gi ḏuɽo ganu nuḏɩmumi giria guŋun.

²⁸ nuarno, ḏa nyi maḏɩmumi jiria juŋun kuwei nyi gwiŋir nanu.

²⁹ na cou na ŋuwən ḏuḏɩni nulɩŋini ganu miŋir nanu.

³⁰ na yecu lɩŋini ganu ŋɩma ŋumədu lugwun, nuwɩrla ganu kɩlɩgi ganu nueicɩno, əḏi gwiro ḏɩmumu jiria ji?

³¹ na calɩmis juŋun wɩrlijo ŋuɽuna naleicɩno, ŋa gwaŋəḏi liji lutu lun lupiaŋa nanu namɩni arno, əḏi gwiro gwiḏɩmumaŋa nanu?

³² nunŋalaḏe lun luɽeico ga nuarno gwunaŋu gwun gwarro dino.

³³ gwune na gwa aŋu ŋuɽuna ŋun ŋɩmaje lugwun, nuḏonye bucu nuubəga, nuwila nuiḏi ŋwara ganu lugwun, nuuməḏɩjo ŋuɽuna wei ŋun ŋiro gwerkwe.

³⁴ nueicɩno, gwa, ḏɩməṯo ḏuŋa ḏimaŋaŋele muma. wiḏi ŋiŋir nanu gi ḏumə ḏuŋa.

³⁵ gwore gwuməḏɩjo gwa, na liji kworo wila leḏi gwele gweḏi dunu gweḏi elo naleicɩno, ŋaɽe ŋuŋa ŋɩmai. gwudaro gəko na gereja mualɩm galo j

³⁶ gwune na yecu diŋɩni ŋuɽuna ŋeno nunŋələḏəṯini ganu nueico gwelɩnya gweḏi dunu gweḏi elo no, ŋaḏonyɩḏa no namɩni əmɩnyi.

³⁷ na gwate mouwɩrico gwete algwuwele no nalmɩni wele buṯrus gwe, na yagub, na megin gweḏi yagub gwun gwan yuwana.

³⁸ nal wila kwu dunu gweḏi gwele gweḏi dunu gweḏi elo nalbuje ŋuɽuna ŋɩmaniḏo ganu na liji əri gwula gworki.

³⁹ gwune nuəḏi nuleicɩno, gwudaro gəko na nyarre dino na nyəri gwula? ŋaɽe ŋate ŋɩmai no namɩni ŋiḏɩro.

⁴⁰ nalaki jumo; gwune nuldio wei, nugwulo babaŋ gweḏi ŋaɽe na nana gwuŋun na lun lɩwiḏile, naləḏi kalo gun gɩḏɩrɩne ŋaɽe.

⁴¹ numəṯo ŋaɽe gi ḏi nueicɩno, talita kumi, ŋuɽun ŋeno ŋarno, ŋaɽe ŋinyi, diɽu.

⁴² na ŋaɽe diɽi nuwele, na ŋu ŋəṯi jɩḏilio di na gwuttən. na cou nalobaga gworki.

⁴³ nuluməḏɩjo ŋuɽuna ŋɩbɩɽe nuarno ŋate ŋal gwiji diŋɩni gwetɩdo no, nuluməḏɩjo alḏəḏə ŋɩdio ŋe ḏiṯa.