markus 12 - ŋuɽun ŋun ŋiya ŋun ŋikaiilo elo 1966

asa 12 ŋuɽun ŋun ŋilɩbo ŋeḏi jɩneina

¹ nuluməḏɩjo ŋuɽuna ŋun ŋɩlɩbo: gwiji gwijo gwete gwugɩḏi jɩneina jun jiro gi ḏuɽuṯ, nulwaləḏɩjo, nukwuri lɩbuɽulo leḏi dɩlaḏa nyaɽe, nuoḏa upiya yolelo, nuapa liji nulgelene gi jɩneina ganu ki nuwele kamɩrɩgen ŋiro kaja.

² na gwune na gaja ro ge ḏuṯa nuwəje wainya gi liji lun laṯape ŋɩru gwalapijo nyaɽe kworo nyeḏi jɩneina.

³ nalməṯo nalpi nalwəje di de duḏu ganu.

⁴ nuaɽu nuwəje wainya gwun gwiro kaja naləri ŋɩdɩgino nuro dəɽi kɩɽelo.

⁵ nuaɽu nuwəje gwiro kaja nalɽinye, nuaɽu nulwəje lutu nalɩpi kworo nalmɩni ɽinye kworo.

⁶ na ŋaɽe ŋuŋun ṯani ŋetɩḏo ŋɩmuwəje gɩdo nuarno lanəji ŋaɽe ŋinyi.

⁷ namɩni iiji ləwei lun laṯape ŋɩru naluməḏəṯe laginŋu nalarno, kweno gwiro gwun gwaɽenyeḏe ŋɩdi. ilwele ilɽinye. na ŋɩdi ŋaro ŋage.

⁸ nalməṯo nalɽinye nalɩŋituḏe gi jɩneina ganu

⁹ gwele gwe jɩneina jun jiro gi ḏuɽuṯ gwar gwarre galakwe? ŋu gwila lulɽinye lun laṯape ŋɩru julḏəḏə liji liro kaja.

¹⁰ nya late ləgɩri ŋuɽuna ŋeno ŋun ŋulinu kɩḏam geḏi elo, gɩdol gun gɩdonyilo lun luṯo ŋɩmaro lɽa leḏi gɩḏul;

¹¹ ŋeno ŋɩwiḏi ḏi gwele na ŋijobejega ṯuṯ gi jei ganu jage na?

¹² nalbunyi gwalməṯo nalmɩni ḏonye liji, nallɩŋe nalarno ŋu gwuməḏəṯi ŋuɽuna lagin ŋun ŋun ŋɩlɩbo. nanwalane nalwele.

ŋuɽun ŋeḏi ṯulba ḏeḏi gesar

¹³ nalkuwa kworo lun liro lɩbarɩsi na leḏi ərudus nalwele landiŋɩna ŋuɽuna ŋəri ŋun ŋunuməḏo ŋɩki.

¹⁴ nəlwila lugwun naleicɩno, mualɩm gwəri, analɩŋiḏi ŋa gwiro gwerkwe ŋanḏonyɩḏa gwiji gwetɩdo no, ŋa gwate gwanəmɩnyene gwete kworo no, naṯalmɩni alɩmi ṯaṯ ḏe ḏeḏi elo ŋuɽun ŋe ŋun ŋiro gwerkwe. ŋiŋir animeḏɩjo gesarŋ ṯulba? ŋa gwarno ḏanouwɩrico a?

¹⁵ ŋa gwarno ḏanɩmeḏɩjo i ḏanaḏidonye a? namɩni ŋu gwilɩŋiḏi ləṯi ŋuɽuna ganu ŋittən, nuleicɩno, gwudaro gəko ninyiliḏeije? əpɩjinyil ruba nyinaŋu,

¹⁶ nalapijo, nuleicɩno, lɽa ləṯe liro le na ŋwule? naleicɩno, gweḏi gesar ŋwiro.

¹⁷ nal yecu uməḏɩjo nuleicɩno, ḏəḏɩl gesarŋ ŋɩdio ŋeḏi gesar, nyalmɩni ḏəḏə eloŋu ŋeḏi elo. nalobaga ṯuṯ lugwun.

ŋuɽun ŋeḏi diɽo gi ḏaiya

¹⁸ nalwila lugwun kworo lun liro lisadugi lun leṯarno ḏiḏiɽo gi ḏaiya ḏate. nalɽoṯəḏɩjo naleicɩno,

¹⁹ mualɩm gwəri, musa gwulijije dino, ḏa megin gweḏi gwijiŋa mai mawalane kwa gwuŋun gwate gwəṯi nyaɽe no, gwan megin ɽenyeḏe gwalgwilɩŋe nyaɽe jiri je jeḏi megin.

²⁰ na ləmɩnyo lijo kwoɽoṯəɽɩl lun liro ŋɩmaga. na gwun gwiro lɽa nuago gwa,

²¹ nuai nate nulɩŋe nyaɽe no. nan megin ɽenyeḏe nuaɽu nuai nate nulɩŋe nyaɽe no. nan megin gwun gwiro nimɩro ṯəɽɩl aɽu nuarre dino.

²² na leno liro kwoɽoṯəɽɩl nalago nate nanəṯi nyaɽe no, na gɩdo na gwa ai dino.

²³ kaja ge ḏidiɽo na ḏa lɩmadiɽo wei, gwa gwaro gwəṯe? gi gwune gwagilo luŋa wei kwoɽoṯəɽɩl.

²⁴ nal yecu wɩrlijo ŋuɽuna nuleicɩno, nyaŋa ŋanyalḏuji gi gwune nya late lilɩŋiḏi gɩḏam i ŋɩma ŋeḏi elo na?

²⁵ na ḏa liji lɩmadiɽi gi ḏaiya late lanago no na late lanəgini no, nalmɩni ro gi liji leḏi kanyin.

²⁶ na gwan liji lun laiyo naldiɽi gi ḏaiya, nya late ləgɩri kɩḏam geḏi musa, na galakwe na elo uməḏɩjo gwaɽe gwe, nueicɩno, nyi gwiro elo gweḏi ibraim, na elo gweḏi isak, na elo gweḏi yagub na?

²⁷ ŋu gwate gwiro elo gweḏi liji lun laiyo no numɩni ro elo gweḏi lun lɩmiḏo. gi gwune dino nyaŋa ŋanyalḏuji kaja.

ḏiɽoṯeḏa ga ḏeḏi ŋuɽun ŋun ŋigelijɩlo elo musaŋ ŋun ŋɩnəno

²⁸ na gwete gweḏi jalgaṯɩm nuwila nudiŋɩni luməḏəṯo nulɩŋe luwɩrlijulo yecu ŋuɽuna ŋiŋir, nuɽoṯəḏɩjo nueicɩno, ŋuɽun ŋɩrṯa ŋun ŋiro lɽa kworo gwun gwigelijɩlo elo musaŋ?

²⁹ na yecu wɩrlijo ŋuɽuna nueicɩno, ŋuɽun ŋun ŋiro lɽa ŋiro dino, diŋɩnɩl liji leḏi isreiyil, gwele gwun gwiro elo gwage gwiro gwele ŋwetɩdo.

³⁰ arram ŋa gwəmɩnyi gwelɩnya gwun gwiro elo gwuŋa ḏugwor ḏe ḏuŋa wei, na gwulo gwe gwuŋa wei, na ŋadɩgɩɽe ŋe ŋuŋa wei, na ŋɩma ŋe ŋuŋa wei,

³¹ na ŋuɽun ŋun ŋugwujo gworo ŋiro dino, arram ŋa gwəmɩnyi gwiji gwun gwijaḏanyagwe ga gwiro gi gwune ŋanəmɩnyi gwula gwuŋa. ŋuɽun ŋate ŋede ŋɩbuṯano kworo kweno no.

³² na gaṯɩm eicɩno, gwerkwe mualɩm gwi, ŋa gwuməḏi muma. elo gwiro gwetɩdo gwate gwede no numɩni ro kuwei,

³³ na ḏəmɩnyo ŋuŋu ḏugwor ḏe wei, na ḏidiŋɩna ḏe wei, na ŋɩma ŋe wei, na ḏəmɩnyo gwun gwajaḏanyagwe ga gwiro gi gwulo gwuŋa, ŋuɽun ŋeno ŋiŋirano ŋɩdi ŋun ŋəṯalape ŋwobo na naŋijeije na gi ḏiḏugijo.

³⁴ gwune na yecu aŋu manuwɩrlɩjo ŋuɽuna dino ŋədɩgiɽe ŋe ŋuŋun, nueicɩno, ŋa gwate gwo uro kaja ŋele ŋeḏi elo no. na ŋɩno gɩdo na gwiji ete gwanɽoṯəḏɩjo no.

kɩrisṯo gwun gwiro ŋaɽe ŋeḏi ḏauuḏ

³⁵ na gwune alɩmilo yecu kwu dunu gweḏi elo gwun gwubuḏo nuleicɩno, galakwe na jalgaṯɩm arno kɩrisṯo gwiro ŋaɽe ŋeḏi ḏauuḏ?

³⁶ namɩni ḏauuḏŋu nuarno gwuɽɩwə gwe gwun ŋwɩpiḏo pɽul, gwele gwun gwiro elo gweico gwelɩnya gwi no, jiga gi ḏi ḏinyi ḏun ḏiro ḏiŋir kəbe nyiŋele liji lun lɩkiḏiḏianyale ŋwara ganu ŋwuŋa.

³⁷ ḏauuḏŋu gwaṯɩleico gwele gwun gwiro elo, namɩni gwiro ŋaɽe ŋuŋun galakwe? na liji lutu diŋɩni ŋuŋu naldile ganu.

yecu gwudɩminu liji ga gwan jalgaṯɩm

³⁸ nuluməḏɩjo ḏalɩmia ḏuŋun nuleicɩno, jil muma jalgaṯɩm jun jaṯəmɩnyi jawele alkani jiria jun jola, nalarno lal liji mɩɽənyo gi cu.

³⁹ na jaṯəmɩnyi jajiga gi jɩḏoɽ jun jiŋɩrano gi lɩdunu leḏi elo, na kalo gun giŋirano kɩmuri.

⁴⁰ luŋa lun laṯenya la ŋɩdio ŋagin lun liro linino, naṯɩluməḏɩjo eloŋu gɩttən kani a liji aŋu, nalakɩminene ḏakɩmino ḏɩbuṯano.

ḏidəḏo ḏeḏi gwa gwun gwiro gwinino

⁴¹ na yecu gwɩdeiji gala ganu gun gaṯɩn liji ŋele əlŋɩrucə nunaŋu liji lutu gwune winɩlo əlŋɩrucə ye kwaŋ gwun gwatɩniŋele əlŋɩrucə. na lun ləṯi ŋɩdio ŋutu ŋalŋiwini ŋutu.

⁴² na gwa wila gwun gwiro gwinino gwun gwate gwəṯi ŋɩdio no nuwini lɩmilim le lɩttən.

⁴³ nuəmɩḏa calɩmis juŋun nuleicɩno, gwerkwe ganu, nyi gweiceijɩno, gwa kweno gwun gwiro gwinino gwun gwate gwəṯi ŋɩdio no, ŋɩmuŋiwini ŋwutəno gi liji wei lun ŋiwinɩlŋe kwaŋ gwun gwatɩniŋele alŋɩrucə.

⁴⁴ gi ḏutiḏo ŋɩdio ŋagin luŋa wei ŋalŋiwinɩjo, namɩni gwa kweno gwun gwate gwəṯi ŋɩdio no nuŋwini wei ŋun ŋəṯulo.