luka 3 - ŋuɽun ŋun ŋiya ŋun ŋikaiilo elo 1966

asa 3 ŋuwəna mamadan na ŋuyun ŋuŋun

¹ na gi jɩḏilio jun jiro di na ṯoḏɩne ŋele ŋeḏi tibarius gesar, gi gwune duḏi bilaṯus bunti mudir gweḏi yauḏia, namɩni ərudus nuro gwele gweḏi jalil, namɩni bilibus gwun gwiro megin nuro gwele gweḏi ituriya na kalo geḏi tarakunitis, na lisanius nuro gwele gweḏi abiliya,

² na annan na kaiyaba liro lele leḏi jɩsis, ŋuɽun ŋeḏi elo ŋɩmila ḏi yuwana gwun gwiro ŋaɽe ŋeḏi sakaria kiḏɩwer.

³ nuwele gi liji ŋwurgwom ŋwun ŋwuɽeico ḏɩrawe galo ḏun ḏan urdun naṯuuməḏɩjo liji ḏibabṯaijɩno ḏe alwɩrla ga nal elo əbɩri ŋuɽun ganu ŋagin ŋun ŋɩki.

⁴ gi gwune ŋulinu kɩḏam geḏi elo ŋun ŋarɩŋe isaia gwun gwiro nebi: ŋwal ŋweḏi gwiji gwete gwun gwaṯəmɩḏe galo uro kiḏɩwer, nuarno, ṯuḏɩnil ṯaṯ galo ḏeḏi gwele gwun gwiro elo, nyaṯuḏɩni daṯ duŋun muma;

⁵ na deiju wei denyeḏe na ŋwurgwom wei ŋwideḏe ga na ŋwar deiju, na ŋun ŋate ŋuḏuḏɩnu ga no ŋeḏuḏɩni ga, na daṯ dun dɩki douwɩri ganu;

⁶ na liji wei laŋu ḏɩkədəḏɩnə ga ḏeḏi elo.

⁷ naṯueico liji wei lun lɩduḏi nalar lababṯaijɩni lugwun, nyaɽe nye nyeḏi juŋə, əḏi gwiro gwaŋijaje nuarno nyalabɩre gi ḏɩɽeḏa ganu ḏun ḏila?

⁸ ɽil nyaɽe nyun nyajilnyilɩŋe nyalmouwɩrla ga muma, na nya lo lanar lagaloŋu no, anəṯi babaŋ gwun gwan ibraim, gi gwune nyi gweiceijɩno, elo gwəṯi ŋɩma gwədiɽijo ibraimŋ nyaɽe gi nyɩdol nyeno.

⁹ na gwunnɩno ŋuɽi ŋo gɩṯo kalo ge dro de jaɽe, na jaɽe wei jun jate jaṯɩɽe nyaɽe nyiŋir no jouɽene ga na jagelini kigo.

¹⁰ nal liji ɽoṯədɩjo wei naleicɩno, anar narra?

¹¹ nulwɩrlijo ŋuɽuna nuleicɩno, gwun gwəṯi ŋwugə gwuttən nuḏəḏə lete gwun late ləṯu no, na gwun gwəṯi ŋɩḏio ŋe ḏiṯa nulduji dino.

¹² nalwila dino lun laṯɩmeje ṯulba lar ləbabṯaijɩni naleicɩno, mualɩm gwəri, anar narra?

¹³ nuleicɩno, ŋo ŋanyalape ŋutəno gi ŋun ŋeicijilɩŋe.

¹⁴ na ajana ɽoṯəḏɩjo dino naleicɩno, anar narra? nuleicɩno, nya lo lərri gwiji gwetɩdo ŋɩdiginə, i nya lo lanenya gworo əlŋɩrucə; na iŋiriḏil ganu gi ŋun ŋajilḏəḏə.

¹⁵ na gi gwune liji lɩḏuḏɩnu na luŋa wei naliri jei ga gi dugwor ganu dagin gwan yuwana ḏa ŋu maro kɩrisṯo i awe,

¹⁶ na yuwana wɩrlijo liji wei ŋuɽuna nuleicɩno nyi gwaṯɩbabṯaije ŋau ŋe, namɩni gwo gwete gwila gwun gwutəno ŋɩma lugwi; nyi gwate gwɩdeleḏo gwikədə ŋɩma ga geḏi giwɩḏc guŋun no. ŋu gwajibabṯaije gwuɽɩwə gwe gwun gwɩpiḏo pɽul na igo.

¹⁷ na jɩrda jo gi ḏi ḏuŋun jujimuje gaɽa muma, kani alwəɽeico ŋwona ldu ŋuɽulo ŋuŋun; namɩni dɩrda dalnuni igo ye yun ŋate yaṯal no.

¹⁸ na ŋuɽun ŋun ŋiro kaja ŋun ŋutu ŋun ŋɩbɩɽilije nanu nəṯuuməḏɩjo liji.

¹⁹ namɩni ərudus gwun gwiro gwele gwune na yuwana lo kalo geḏi ərudiya gwun gwiro gwa gweḏi bilibus gwun gwiro megin, na kalo geḏi ŋuɽun ŋun ŋɩki ŋun ŋərrɩlo ərudus,

²⁰ nuenyeḏeice ŋuɽuna ŋeno wei ŋuɽun ŋe ŋeno dino nalarno gwumaŋele yuwanaŋ kɩrkon.

ḏibabṯaijɩno ḏeḏi yecu

²¹ gwune na liji babṯaijɩni wei, na yecu babṯaijɩni dino na gi gwune ju gi ḏuməḏɩjo eloŋu, na kanyin iḏini,

²² na gwuɽɩwə ewuləḏo lugwun gwun gwɩpiḏo pɽul gwiro ga gi aŋɩnu nuro ga gi gɩɽidir. na ŋwal gwulo kanyin nalarno, ŋa gwiro ŋaɽe ŋinyi ŋun ŋaṯiəmɩnyi na ŋaṯɩnyiŋiri ḏugwore.

lɩgwumən leḏi yecu

²³ na yecu gwəṯi jɩḏilio ḏuɽi ṯəɽɩl ca gwune nudiɽi ŋɩru ŋuŋun. naṯi liji arno gwiro ŋaɽe ŋeḏi yusib gwun gwiro ŋaɽe ŋeḏi ali,

²⁴ na ŋaɽe ŋeḏi mutaḏaḏ, na ŋeḏi lawi, na ŋeḏi maliki, na ŋeḏi yana, na ŋeḏi yusib,

²⁵ na ŋeḏi mutaḏaya, na ŋeḏi amus, na ŋeḏi nawun, na ŋeḏi asali, na ŋeḏi najai,

²⁶ na ŋeḏi maḏa, na ŋeḏi mutaḏaya, na ŋeḏi simi, na ŋeḏi yusek, na ŋeḏi yoḏa,

²⁷ na ŋeḏi yuwana, na ŋeḏi reisa, na ŋeḏi sarababil, na ŋeḏi salatail, na ŋeḏi niri,

²⁸ na ŋeḏi maliki, na ŋeḏi adi, na ŋeḏi gwusum, na ŋeḏi almuḏam na ŋeḏi iyir,

²⁹ na ŋeḏi yasua, na ŋeḏi aliyasɩr, na ŋeḏi yurim, na ŋeḏi mutaḏaḏ na ŋeḏi lawi,

³⁰ na ŋeḏi simaun, na ŋeḏi yauḏa, na ŋeḏi yusib, na ŋeḏi yuana, na ŋeḏi aliyakim,

³¹ na ŋeḏi malaya, na ŋeḏi menan, na ŋeḏi maṯaḏa, na ŋeḏi naḏan na ŋeḏi ḏauuḏ,

³² na ŋeḏi yesa, na ŋeḏi ubiḏ, na ŋeḏi buas, na ŋeḏi salɩmun, na ŋeḏi nasun,

³³ na ŋeḏi əmɩnadab, na ŋeḏi adɩmin, na ŋeḏi əmɩ, na ŋeḏi asarun, na ŋeḏi paris, na ŋeḏi yauḏa,

³⁴ na ŋeḏi yagub, na ŋeḏi isak, na ŋeḏi ibraim, na ŋeḏi tara, na ŋeḏi nawur,

³⁵ na ŋeḏi saruḏ, na ŋeḏi rawu, na ŋeḏi paliḏ, na ŋeḏi abir, na ŋeḏi sala,

³⁶ na ŋeḏi keinan, na ŋeḏi arpakasaḏ, na ŋeḏi sam, na ŋeḏi nouwa, na ŋeḏi lamak,

³⁷ na ŋeḏi maṯusala, na ŋeḏi akwunuk, na ŋeḏi yaraḏ, na ŋeḏi malilil, na ŋeḏi keinan,

³⁸ na ŋeḏi inus, na ŋeḏi siyaṯ na ŋeḏi adam na ŋeḏi elo.