luka 24 - ŋuɽun ŋun ŋiya ŋun ŋikaiilo elo 1966

asa 24 gil gwuḏu ganu

¹ na gi lamon lun liro lɽa lun ləduji loro kwoɽoṯəɽɩl, gwerre mimmi gilio nalwele kil lapo ŋɩḏini ŋun ŋigelɩlo muma.

² nalbuje gɩḏolia ŋɩmaḏəḏiɽəḏini ga kil.

³ gwune naləḏi nate nanbuje aŋɩna yeḏi gwele gwun gwan yecu no.

⁴ na gi gwune jil gi ḏirio jei ga ŋuɽun ŋeno, na ləmɩnyo lɩttən lɩḏuḏɩnu lɩkanu jiria jiro nɩɽe jaṯar ganu lrmal lrmal.

⁵ na gi gwune jil gi ḏɩḏonyɩḏa nalŋələḏəṯɩni ga kwɩnyəm, naleicɩno, gwuḏaro nanyabunyi gwun gwimiḏo gi liji lun laiyo?

⁶ ŋu gwate gwo ŋɩne no, namɩni madiɽi. aḏɩŋanɩl galakwe gwuməḏijaje gi gwune gwijɩre jalil.

⁷ nuarno, arram ŋaɽe ŋeḏi liji ŋəḏəḏini gi di ḏeḏi liji lun lɩki, ŋalɽinye gi luɽi lun lɩmalɩḏo ganu, na gi lamon lun ləduji loro ṯəɽɩl ŋədiɽi

⁸ nalaḏɩŋane ŋuɽuna ŋuŋun.

⁹ nalaɽuwe kil naluməḏɩjo calɩmis jun jiro di na gwete, na wei lun lɩṯanu ŋuɽuna ŋeno wei.

¹⁰ na mariam majdaliya na yuna na mariam gwun gwiro nana gweḏi yagub, na la lun liro kaja lun lijille, liro lun luməḏɩjo duwəjo ŋuɽuna ŋeno.

¹¹ na ŋuɽun ŋagin nalro lagin gi ŋun ŋate ŋəṯi jei ganu no, nate naldeŋɩnejo no.

¹² na buṯrus diɽi nueneḏe kil, nuɽile nuŋalaḏe gi jiria jun jɩmɩde ganu jɩkɩɽɩbəḏɩl je jijo ga cucun, nuaɽuwe gwəbəḏi ga ṯuṯ kwulo gwuŋun ŋuɽun ŋun ŋɩmila.

yecu maŋini gi ṯaṯ ḏeḏi amwas

¹³ na lɩttən lagin gi lamon lono nalwele gi lɩrgwom lete lola ganu urucəlim lar mil dubə ca lan amwas.

¹⁴ naluməḏəṯelo ŋɩmaga gwan ŋuɽun ŋeno wei ŋun ŋɩmila.

¹⁵ na gi gwune jil gi ḏuməḏo naṯɩlwɩrlijo gworo ŋuɽuna, na yecuŋu nuldikaḏaico gɩṯo naliwele.

¹⁶ namɩni jei jagin rimi ganu lugwun nate nalaŋu nalɩŋe no.

¹⁷ nuleicɩno, ŋuɽun ŋɩrṯa ŋun ŋuməḏəṯanyalelo na nyaŋa lɩwiḏi? nalḏuḏɩni ga nalriŋɩneḏe gi jei.

¹⁸ na gwete gwun gwan kilibas nuwɩrlijo ŋuɽuna nueicɩno, ŋa gwiro gwetɩdo urucəlim nate nalɩŋe ŋun ŋɩmila ŋwamon ŋweno na?

¹⁹ nuleicɩno, na ŋɩrṯa ŋiro? naleicɩno, ŋeno ŋeḏi yecu gweḏi nasɩra, gwun gwiro nebi, gwun gwəṯi ŋɩma ŋɩru na ŋuɽun gi jei ganu jeḏi elo na gi liji wei,

²⁰ na galakwe na jɩsis ḏəḏə jun jɩbuḏo na lele ləri, nalakɩmi ḏaiya ḏe nalɽinye gi luɽi lun lɩmalɩḏo ganu.

²¹ namɩni anaŋa anḏuḏɩnɩjo anarno ŋu gwiro gwun gwəkədə isreiyil ga jili je namɩni ŋutəno ŋeno wei, gwunanyine gwiro lamon lun ləduji loro ṯəɽɩl gi gwune ŋuɽun ŋɩmila ŋeno.

²² na la kworo lagəri lɩmijiobejega ṯuṯ; lijo mimmi gilio kil,

²³ na gwune nate nalbuje aŋɩma yuŋun no, nalwila nalarno laŋəḏi ḏəŋinio ḏeḏi liji leḏi kanyin nalarno ŋu məmɩḏe.

²⁴ na dino, kworo nalwele lun lijanale kil, nalbuje dino gi gwune ame la, namɩni ŋu nate nalaŋaḏa no.

²⁵ nuleicɩno, jɩɽilo ce na lun ləṯi dugwor dun daṯe daṯəmɩnyi cou ŋuɽuna wei ŋun ŋaṯɩl nebɩŋa umə no,

²⁶ ŋate ŋiro arram kɩrisṯo gwiḏe ŋɩdi ŋeno ki ŋuəḏi gi ḏoɽeḏa ḏuŋun na?

²⁷ nulaŋijo ŋuɽuna ŋan ŋu kɩḏam ganu geḏi elo uro ḏi musa kəbe ḏi nebɩŋa wei.

²⁸ nalwele gɩṯo gi lɩrgwom lun lɩweləḏɩne, nuro gi gwiji gwun gwar gwadare ŋuwele kɩɽelo gwe;

²⁹ nalakaḏaico ga naleicɩno, ilijiga gi gwune galo garo garage na anyin yar yabɩɽe. nuəḏi gwalijiga.

³⁰ gwune nalɩje gi ḏiṯa, nuape gia nueico eloŋu sukran nubɩleṯɩnya ganu nulɩḏəḏə.

³¹ na jei jagin iḏini nallɩŋe nudu nuete lagin cou.

³² nalar ŋɩmaga no, dugwor dage daṯe dijibuḏi nanu ḏa lɩmijuməḏɩjo gi ṯaṯ, na mijilaŋijo muma ŋun ŋijo kɩḏam ganu geḏi elo na?

³³ naldiɽi gi sa cono nalaɽuwe urucəlim; nalbuje calɩmis jun jiro di na gwete laɽuwaḏo ldu na lun lijille,

³⁴ nalarno, gwele gwun gwiro elo madiɽi gwerkwe ganu nuaŋinijo simianŋ.

³⁵ namɩni luŋa naluməḏɩjo ŋuɽuna ŋun ŋɩmila gi ṯaṯ, na galakwe gwilɩŋiḏɩlo gi ḏibɩleṯɩnyeḏa gia ganu.

yecu maŋini gi ḏuwəjo

³⁶ na gi gwune jilo gi ḏuməḏo ŋuɽuna ŋeno, na yecuŋu ḏuḏɩni kɩlɩgi ganu lagin, nuleicɩno, ḏouwɩɽiḏa ḏaje lagalo.

³⁷ nalabo ganu ḏɩburɩbur naldonye, nalro gi larno laŋəḏi gwuɽɩwə.

³⁸ nuleicɩno, gwudaro gəko aṯaji dugwor pi ganu? na gwudaro na ḏuməḏɩno diɽi gi dugwor ganu dalo?

³⁹ aŋəḏɩl di ḏinyi na ŋwara ŋwi; nyi gwiro. ḏɩmumɩl nanu nanyaŋu; gi gwune gwuɽɩwə gwate gwəṯi jɩḏḏi na ŋwuya gi gwune aṯanyalaŋu ŋwəṯilo.

⁴⁰ na gwune nuumə dino nulaŋijo di duŋun na ŋwara ŋwuŋun.

⁴¹ na gi gwune dilo ganu namɩni late lɩməmɩnyi no, nalobaga ṯuṯ, nuleicɩno, nya ləṯi ŋɩdio ŋe ḏiṯa ŋɩne a?

⁴² nalḏəḏə lumi louwɩrio lununinu na laiya lɩti.

⁴³ nuape nuʼe gi jei ganu jagin.

⁴⁴ nuleicɩno, ŋeno ŋiro ŋuɽun ŋun ŋuməḏɩjejɩŋe gi gwune lore lijiga, nuarno arram alṯɩmi wei ŋun ŋulinu ŋan nyi kɩḏam geḏi elo ŋuɽun ŋun ŋigelijɩlo elo musaŋ, na nebɩŋa na gi delɩŋa.

⁴⁵ naliḏi ŋadɩgɩɽenya ŋagin kani allɩŋe gɩḏam geḏi elo,

⁴⁶ nuleicɩno, ŋulinu dino, arram kɩrisṯo gwiḏe dino, na gweḏiɽi gi liji lun laiyo gi lamon lun ləduji loro ṯəɽɩl,

⁴⁷ naluməḏɩjo jiri juŋun je ḏuwɩrlaḏe ga na ḏəbɩrio ŋɩdi ganu ŋun ŋɩki, gi liji wei uro urucəlim.

⁴⁸ na nyaŋa liro lun laŋiḏi ŋuɽuna ŋeno.

⁴⁹ na nyi gwajiwəḏɩjo ŋun ŋeiciŋɩŋe baba gwi; nyamɩni jaḏaṯa ga kamɩrɩgen yun yan urucəlim kəbe nyakani ŋɩma kanyin.

ḏiḏiɽo ḏeḏi yecu kanyin

⁵⁰ nuldeje kɩluḏo kəbe nalṯɩmi beṯiniya nuabuje di duŋun elo nulmora.

⁵¹ na gi gwune ju lulmora nuəbɩri lagin, nuabuje kanyin.

⁵² nalorṯeḏa nalaɽuwa urucəlim nalḏile ganu gworki;

⁵³ naṯilje kwu dunu gweḏi elo gwun gwubuḏo ŋwamon wei naṯɩlbuḏi eloŋu gwalorṯeḏa.