luka 22 - ŋuɽun ŋun ŋiya ŋun ŋikaiilo elo 1966

asa 22 ŋuɽun ŋun ŋɩki ŋeḏi yauḏa

¹ na gɩmuri gijo gɩṯo geḏi gia gun gaicɩwa gun gan gɩmuri ge ḏouwɩrico.

² na jɩsis jun jɩbuḏo na jalgaṯɩm nalbunyi galakwe gwalɽinye; gi gwune lɩḏonyo liji.

³ na seiṯan əḏi ḏi yauḏa gwun gwan iskariyuṯi, na ŋu gwiro gwete gi calɩmis jun jiro di na gwuttən.

⁴ nuwele naluməḏo jɩsis je jun jɩbuḏo na dabiṯ deḏi ajana galakwe nuliḏəḏə.

⁵ naliŋir dugwore naluməḏəṯe nalarno, gwalḏəḏə əlŋɩrucə.

⁶ nuəmɩnyi nubunyi lamon lun liŋir gwuliḏəḏə lun late lali liji je lutu no.

ḏigelijo ḏeḏi ḏɩṯa ḏun ḏiro gɩdo ḏeḏi yecu

⁷ na lamon wila leḏi gɩmuri geḏi gia gun gaicɩwa araam laḏuge lrəmə leḏi gɩmuri ge ḏouwɩrico.

⁸ nuwəje buṯrusŋ na yuwana nuleicɩno, wiḏɩl nyijilgico gɩmuri kani ilʼe.

⁹ naleicɩno, galo ŋiro gaḏa gun gəmɩnyu ganaŋele?

¹⁰ nuleicɩno, na ḏa nyalmaṯɩmi kamɩrɩgen, nyalobeḏeṯe gwəmɩnyəŋale gwapo gɩḏi geḏi ŋau, gwujanɩl kwu dunu gwun gwar gwunəḏi,

¹¹ nyeico gwiji gweḏi dunu no, mualɩm gwarno, dunu gwaḏa gwun gwananʼe ŋɩḏio ŋe ḏiṯa ŋeḏi gɩmuri ge ḏouwɩrico calɩmis je jinyi?

¹² na gwajaŋijo duno gwete gwun gwubuḏo lakwia gwun gwəṯi ŋɩdio ganu ŋe ḏiṯa. ŋɩnəwei nyalŋele muma.

¹³ nalwele nalbuje ŋuɽuna ŋiro gi gwune ŋun ŋuməḏɩjulo, nalŋele ŋɩdio muma ŋeḏi gɩmuri ge ḏouwɩrico.

ḏiṯa gia ḏun ḏiro gɩdo ḏeḏi yecu

¹⁴ gwune na sa wila je ḏiṯa, naljiga duwəjo de.

¹⁵ nuleicɩno, nyi gwubunyu gworki nuarno iliṯane gɩmuri keno ge ḏouwɩrico gwerre nyi gwate miḏe no,

¹⁶ gi gwune nyi gweiceijɩno, nyi gwate gwanʼe minu no kəbe ŋəṯɩmi ŋele ŋeḏi elo.

¹⁷ nuape kiɽuda nueico eloŋu sukran nuarno, apɩlo ŋeno nyalkenyeḏe ganu lagaloŋu;

¹⁸ gi gwune nyi gweiceijɩno, nyi gwate gweyu ŋau ŋeḏi nyaɽe nyeḏi gwaɽe gwun gwiro gi ḏuɽuṯ no kəbe ŋele ŋeḏi elo ŋila.

¹⁹ nuape gia nueico eloŋu sukran nubɩleṯɩnya ganu nulḏəḏə, nuleicɩno, keno ŋiro aŋɩnu yinyi yun yibieje ganu. aṯanyalarre ŋeno nyilŋaḏɩŋane.

²⁰ na dino kɩɽudo gwune nalʼe nuarno, kiɽudo keno ŋiro ŋuɽun ŋun ŋikaiilo elo ŋun ŋiya ŋuwən ŋe ŋinyi, ŋun ŋirijəje.

²¹ namɩni eʼe, ḏi ḏeḏi gwun gwinyɩḏəḏə liji gwanagwe gi ḏiṯa;

²² na ŋaɽe ŋeḏi liji ŋele gi gwune ŋuɽun ŋun ŋikaiinu, namɩni ŋɩki kwəmɩnyo gwun gwuliḏəḏə.

²³ naliḏeije ga naṯɩlɽoṯəḏɩjo gworo ŋɩmaga əḏi gwiro gwete lagin gwun gwar gwaɽe ŋuɽuna ŋeno.

ḏɩbuḏia ḏun ḏiro gwerkwe

²⁴ na ŋijo lagin dino ŋiro ḏɩbereḏa əḏi gwiro lagin gwiro gwubuṯano.

²⁵ nuleicɩno, lele leḏi liji lun liro ga dino ləṯi ŋelɩnya lagin, na luŋa lun ləṯi ŋelinya lagin naṯɩleico liŋir.

²⁶ namɩni ŋuɽun ŋate ŋiro dino lagalo no; namɩni gwun gwubuṯano lagalo gwaro gi gwoŋeno, namɩni gwun gwədərəḏi kɩɽelo nuro gi gwun gwaṯape ŋɩru.

²⁷ gi gwune əḏi gwiro gwubuṯano, ŋu gwun gwaji gi ḏiṯa i ŋu gwun gwaɽe ŋɩru? gwədu gwun gwijiga gi ḏiṯa na? namɩni nyi gwo kɩlɩgi ganu lagalo gi gwun gwaṯape ŋɩru.

²⁸ namɩni nyaŋa liro leno lun lɩmaṯaḏo lugwi ŋuɽun ŋe ḏɩḏeijo ḏinyi;

²⁹ na nyi gwajiḏəḏə ŋelɩnya gi gwune ḏəḏɩnyi baba gwinyi,

³⁰ kani nyaʼe nanyayu ŋele ŋinyi, na nyajiga gi jɩḏoɽ nyakɩmiḏe əriḏo ganu di na gwuttən yeḏi isreiyil.

yecu gwuməḏi ŋuɽuna ŋan ḏidonyɩḏa ḏeḏi buṯrus yecuŋ gwerre ŋuɽun ŋate ŋɩmila no

³¹ na gwele arno, simian, simian, eʼe, seiṯan gwubunyaɽe gwajimɩɽi elo gi ŋwon;

³² namɩni nyi gwuɽoṯeḏo eloŋu gwan ŋa kani ate a ḏɩməṯo ḏuŋa ete no. namɩni ŋa, ḏa ŋa maɽuwe ŋamɩni bɩɽi lɩmagalo nanu.

³³ nueicɩno, gwele gwi, nyi gwəmɩnyu alawele kəbe alawele kɩrkon na gi ḏaiya.

³⁴ nuarno, nyi gwaŋeico buṯrus no, gwerre lɩgwugiɽe late lɩməri gwula no gwunanyine gwerre ŋa gwadonye ŋwamon ganu ṯəɽɩl ŋa gwilɩŋɩḏinyi.

³⁵ nuleicɩno, gwune wəjeje nate nanyanabupane gwurəḏə na jɩwɩḏe, ŋate ŋijɩn ŋədi ŋɩbɩɽaṯɩni a? naleicɩno, awe.

³⁶ nuleicɩno, namɩni gwunne gwun gwəṯi gwurəḏə ŋwuape, na gwun gwate gwəṯi kɩwiḏio no ouwɩricil ŋweḏɩla giria guŋun nueḏɩla kɩwiḏio.

³⁷ nyi gweiceijɩno, arram ŋəṯɩni lugwi ŋeno ŋun ŋulinu dino, na ŋu gwuḏuɽəḏɩnu luŋa le lun lɩki; na ŋɩdi ŋan ŋi ŋəṯɩmi.

³⁸ naleicɩno, gwele gwəri, eʼe cɩwiḏio jɩttən ceno. nuleicɩno, ŋidaḏaṯo.

jeṯisamɩni

³⁹ nudu nuwele gi bubruṯ gi lɩrgwom lun lan seitun; na calɩmis juŋun gwujane.

⁴⁰ na gwune nalṯɩni kalo nuleicɩno, uməḏɩjil eloŋu kani nyate nyəḏi ŋuɽun ŋe ḏɩḏeijo no.

⁴¹ na ŋu gwuduḏi ganu lagin gala ŋiro gi ḏa gwete mawini gol ge, nuculi ga ŋwurko ŋwe nuuməḏɩjo eloŋu.

⁴² nuarno, baba gwi, ḏa ŋa məmɩnyi əbɩri kɩɽuda keno lugwi; nalmɩni ro ŋun ŋate ŋɩbunyilnyi no, nalmɩni ro ŋun ŋɩbunyaloŋa.

⁴³ na gwiji gweḏi kanyin aŋinijo, gwubɩɽi nanu,

⁴⁴ na gi gwune uməḏɩnu gi ḏugwor ganu kəbe na ḏugwor auce ganu, nuuməḏɩjo eloŋu gworki na ŋwuṯeḏe bɩɽeṯeḏe ga ŋiro gi ŋwaba ŋweḏi ŋuwən ŋwun ŋwaṯɩbɩɽeṯeḏe ga kwɩnyəm.

⁴⁵ nudiɽo gi ḏuməḏɩjo eloŋu, nuwila gi calɩmis juŋun, nulbuje jɩḏɩro ŋuɽun ŋe ḏɩrona,

⁴⁶ nuleicɩno, gwudaro gəko nanyaḏɩre? diɽil nyuməḏɩjo eloŋu kani nyate nyəḏi ŋuɽun ŋe ḏɩḏeijo no.

yecu malməṯo wɽi

⁴⁷ na gi gwune ju gi ḏuməḏɩjo na liji lutu na gwun gwan yauḏa gwun gwiro gwete gi calɩmis jun jiro di na gwuttən nuldərəḏɩjo kɩɽelo, nudɩka gɩṯo ḏi yecu gwumɩɽənyə.

⁴⁸ na yecu eicɩno, yauḏa kwe, ŋa gwiro gwəḏəḏi ŋaɽe ŋeḏi liji ḏɩmɩɽəḏo ḏe a?

⁴⁹ na gwune lun lɩwəɽeico ga nalaŋu ŋuɽuna ŋun ŋila nalarno, gwele, analpi kɩwiḏ ge a?

⁵⁰ na gwete lagin numɩɽi wainya gweḏi gwele gweḏi jɩsis nuɽə gəni ga gi ḏi ḏun ḏiro ḏiŋir.

⁵¹ na yecu wɩrlijo ŋuɽuna nuleicɩno, ouwɩricɩlo ŋeno. nuḏɩmumi gəni guŋun numuli.

⁵² na yecu eico jɩsis jun jɩbuḏo na dabiṯ deḏi ajana yeḏi dunu gweḏi elo gwun gwubuḏo, na liji lun luɽun lun lɩwiḏi lugwun no, nyaltuḏiji jɩwiḏ je na jurləlo je gi gwun gwiro gwuɽam a?

⁵³ gwune ilaṯɩje kwu dunu gweḏi elo bubruṯ gwun gwubuḏo, nya late lɩwali di ganu lugwi no. namɩni sa jalo jiro ceno na ŋele ŋeḏi girɩm.

ḏidonyɩḏa ḏeḏi buṯrus yecuŋ

⁵⁴ gwune nalape nalgwuloḏa naləḏɩje kwu dunu gweḏi gwele gweḏi jɩsis. namɩni buṯrus gwujane gala gwola ganu.

⁵⁵ gwune naludeije igo kɩlɩgi ganu gi ḏɩgara ganu nalijiga kal gete, na buṯrus jiga kɩlɩgi ganu lagin.

⁵⁶ na wainy gwete gwun gwiro gwa nunŋalaḏe gi gwune juga gɩṯo kigo, nuarno, gwəmɩnyo kweno dino gwijilgwe.

⁵⁷ nudonye nuarno, gwa, nyi gwate gwilɩŋiḏi no.

⁵⁸ na ŋɩno gwɩti nuaɽu nuaŋu gwiro kaja nuarno, ŋa dino, ŋa gwiro lagin. na buṯrus arno, gwiji kwe, nyi gwate gwiro no.

⁵⁹ na gwune na sa ete jetɩdo ca, na gwiro kaja lɩŋe mumə nuarno, gwerkwe ganu kweno dino gwijilgwe, gi gwune gweḏi jalil gwiro.

⁶⁰ na buṯrus arno, gwiji kwe, nyi gwate gwiliŋiḏi ŋun ŋaraŋe no. na cou, gi gwune uməḏu na lɩgwugiɽe əri gwula.

⁶¹ na gwele gwun gwiro elo wɩrla ga nuŋalaḏe ḏi buṯrus, na buṯrus aḏɩŋane ŋuɽuna ŋeḏi gwele galakwe gweicuno, gwerre lɩgwugiɽe late lɩməri gwula no, gwunanyine, ŋa gwinyidonye ŋwamon ganu ṯəɽɩl.

⁶² nudu kɩluḏo nuəri gwula gwiji cicer.

liji lakijo yecuŋ jumo nalpi

⁶³ na ləmɩnyo lun lɩməṯi yecuŋ naṯɩlaki jumo nalpi.

⁶⁴ nalkɩɽɩbə jei naṯɩlpi gi jei ganu, nalɽoṯəḏɩjo galo, naleicɩno, uməḏi, əḏi gwiro gwumɩɽiḏaŋa?

⁶⁵ na ŋuɽun ŋutu ŋun ŋiro kaja naṯɩliŋiuməḏɩjo galo ḏɩḏenɩḏa ḏe.

yecu gwuḏuḏɩnu gi jei ganu jeḏi jɩsis jun jɩbuḏo

⁶⁶ gwune na galo ro anyine na liji lun luɽun aɽuwaḏa ldu na jɩsis jun jɩbuḏo na jalgaṯɩm nalgwuloḏa kəcərio ŋagin yun yɩbuḏo, naleicɩno,

⁶⁷ ḏa ŋa maro kɩrisṯo, ŋwijineico. nueicɩno, ḏa nyi majineico nya late ləmɩnyi no;

⁶⁸ na ḏa nyi majɩɽoṯəḏɩjo na ŋate ŋiŋilɩwɩrlijo no na nya late linyikəḏə ga no.

⁶⁹ namɩni uro gwunnɩno ŋaɽe ŋeḏi liji ŋajiga gi ḏi ḏun ḏiro ḏiŋir ḏeḏi ŋɩma ŋeḏi elo.

⁷⁰ naleico wei no, ŋa gwiro ŋaɽe ŋeḏi elo a? nuleicɩno, nyaŋa larno nyi gwiro.

⁷¹ nalarno, ilbunyu ŋuɽuna ŋutəno ŋada dino? gi gwune liŋə gi lulo lage ilḏiŋɩnu gi linyu luŋun.