luka 20 - ŋuɽun ŋun ŋiya ŋun ŋikaiilo elo 1966

asa 20 ḏiɽoṯeḏa ga ḏeḏi ŋele ŋeḏi yecu

¹ na gi lamon lete ŋwamon ganu ŋwono, gi gwune alɩmu liji kwu dunu gweḏi elo gwun gwubuḏo nuluməḏɩjo ŋuɽuna ŋiŋir ŋeḏi elo, na jɩsis jun jɩbuḏo na jalgaṯɩm na lele leḏi liji nalwila lugwun.

² naluməḏɩjo naleicɩno, eicijɩno, ŋele ŋiro ŋɩrṯa ŋaṯaŋarre dino? na əḏi gwiro gwun gwiḏəḏaŋa ŋelɩnya ŋeno?

³ nulwɩrlijo ŋuɽuna nuleicɩno, nyi dino nyi gwajiɽoṯəḏɩjo ŋuɽun ŋe ŋete; na wɩrlijilo.

⁴ ḏibabṯaijɩnə ḏeḏi yuwana ḏeḏi kanyin ḏiro i ḏeḏi liji a?

⁵ naluməḏəṯe laginŋu nalarno, ḏa ilmarno, ḏeḏi kanyin ḏiro, namɩni gwarno, namɩni gwudaro gəko nate nanyəmɩnyi no?

⁶ na ḏa ilmarno, ḏeḏi liji ḏiro, namɩni liji wei lijauwɩce nyɩdol nye; gi gwune ləmɩnyu nalarno yuwana gwiro nebi.

⁷ nalwɩrlijo ŋuɽuna late lilɩŋiḏi ḏɩwiḏi nigwegwe no.

⁸ nal yecu eicɩno, na dino, nyi gwate gwajuməḏɩjo ŋele ŋɩrṯa ŋiro ŋaṯɩlarre dino no.

ŋuɽun ŋun ŋɩlɩbo ŋeḏi jɩneina

⁹ nuuməḏɩjo liji ŋuɽuna ŋeno ŋun ŋɩlɩbo. gwiji gwete gwugɩḏi jɩneina jun jiro gi ḏuɽuṯ nuapa liji nulgelene gi jɩneina ganu, nuwele kamɩrɩgen ŋiro kaja nuje gaja gwola ganu.

¹⁰ na kaja ge ḏuṯa nuwəje wainya gi liji lun laṯape ŋɩru gwalapijo nyaɽe kworo nyeḏi jɩneina; namɩni liji lun laṯape ŋɩru piḏo nalwiri di de duḏu ganu.

¹¹ nuaɽ nuwəje wainya gwun gwiro kaja; nalpi dino nalərri ŋɩdɩgino, naliri di de duḏu ganu.

¹² nuaɽu nuwəje gwun gwaduji loro ṯəɽɩl, nalḏɩrṯe nanu dino naldi.

¹³ na gwele gweḏi jɩneina jun jiro gi ḏuɽuṯ arno, nyi gwarre galakwe? nyi gwawəje ŋaɽe ŋinyi ŋun ŋiro ŋetɩḏo, gwəṯi, ḏa ŋɩmalaŋu ŋalnəji.

¹⁴ na gwune na liji aŋu lun laṯape ŋɩru, naluməḏəṯe laginŋu nalarno, kweno gwiro gwun gwaɽenyeḏa ŋɩdi; ilele ilɽinye, na ŋɩdi ŋaro ŋage.

¹⁵ naldi jɩneina gi ḏuɽo nalɽinye. na leno lar lai gwele gweḏi jɩneina eicico?

¹⁶ gwila lulɽinye leno lun laṯape ŋɩru ŋeḏi jɩneina, na lulḏəḏə jɩneina lun liro kaja. na gwune naldiŋɩni nalarno, awe.

¹⁷ nunŋalaḏe nuarno, ŋɩrṯa ŋiro ŋun ŋulinu dino, gɩdol gun gɩdonyilo lun luṯo ŋɩmaro lɽa leḏi gɩḏul?

¹⁸ na gwun gwidi kɩdol elo keno gwake, namɩni gwun gwa gɩdol auṯaje muŋawa.

ŋuɽun ŋeḏi ṯulba ḏeḏi gesar

¹⁹ na jalgaṯɩm na jɩsis jun jɩbuḏo nalbunyi gwalməṯo kaja kono, nalmɩni ḏonye liji; nallɩŋe nalarno ŋu gwuməḏəṯi ŋuɽuna lagin gwe ŋeno ŋun ŋɩlɩbo.

²⁰ na gwidɩmiḏilo nalwəje lɩwɩrɩgala lugwun lun laṯɩro gi jei ganu jeḏi liji lun liŋir, kani alməṯo ḏuməḏo ḏe ḏuŋun nalḏəḏə ḏakɩmiḏa ŋele ŋe ŋeḏi mudir.

²¹ naluməḏɩjo galo naleicɩno, mualɩm gwəri, anilɩŋiḏi ŋa gwaṯumə ḏiḏuḏɩno ḏe ga naṯaŋalɩmiḏe, na gwate gwəmɩnyeno gwete kworo no, naṯɩlalɩmi ṯaṯ ḏe ḏeḏi elo ŋuɽun ŋe ŋun ŋiro gwerkwe.

²² ŋiŋir animəḏɩjo gesarŋ ṯulba? a gwarno ḏanouwɩrico a?

²³ numɩni lɩŋe ḏirdəḏeico ḏagin nuleicɩno,

²⁴ aŋijɩnyil ruba. lɽa ləṯe liro na ŋwule? nalwɩrlijo ŋuɽuna naleicɩno, leḏi gesar.

²⁵ nuleicɩno, na ŋiro dino, ḏəḏɩl gesarŋ ŋɩdio ŋeḏi gesar, nyalmɩni ḏəḏə eloŋu ŋeḏi elo.

²⁶ nate naləṯi ŋɩma gwalməṯo ŋuɽun ŋe gi jei ganu jeḏi liji no; nalobaga ṯuṯ ŋuɽun ŋun ŋɩwɩrlijulɩlo nalje nyɩkwom.

ŋuɽun ŋeḏi diɽo gi ḏaiya

²⁷ nalwila lugwun kworo lun liro lisadugi lun laṯarno ḏidiɽo gi ḏaiya ḏate, nalɽoṯəḏɩjo ga,

²⁸ naleicɩno, mualɩm gwəri, musa gwulijije dino, ḏa megin gweḏi gwijiŋa mai, mawalane kwa gwuŋun gwate gwəṯi nyaɽe no, gwan megin ɽenyeḏe gwalgwilɩŋe nyaɽe jiri je jeḏi megin.

²⁹ na lijo kwoɽoṯəɽɩl lun liro ŋɩmaga. na gwun gwiro lɽa nuago gwa nuai nate nulɩŋe nyaɽe no.

³⁰ nan megin ɽenyeḏe nuaɽu nuai, nate nulɩŋe nyaɽe no.

³¹ nuaɽu nunɽenyeḏe gwun gwiro nimɩro ṯəɽɩl, na ŋiro dino luŋa wei lun liro kwoɽoṯəɽɩl, nate nalilɩŋe nyaɽe no nalai ṯa.

³² na gɩdo wɽi na gwa ai dino.

³³ kaja ge ḏidiɽo, gwa gwaro gwəṯe? gi gwune gwagalo luŋa wei kwoɽoṯəɽɩl.

³⁴ nal yecu wɩrlijo ŋuɽuna nuleicɩno, nyaɽe nyeḏi gɩḏilio keno nyaṯago na nyagini,

³⁵ namɩni lun liḏuɽəḏɩnu lɩdeleḏo lape kaja gun gila na ge ḏiḏiɽo ḏeḏi liji lun laiyo, late lanago na lanəgini no.

³⁶ na late ləṯi ŋɩma lai mɩna no, gi gwune liro gi liji leḏi kanyin, na liro nyaɽe nyeḏi elo, na liro nyaɽe nye ḏidiɽo.

³⁷ namɩni gwan ḏidiɽo ḏe liji lun laiyo naldiɽi, musa gwaŋinu kwaɽe gwune nuumə gwan gwele gwiro elo gweḏi ibraim, na elo gweḏi isak na elo gweḏi yagub.

³⁸ na elo gwate gwiro elo gweḏi liji lun laiyo no, numɩni ro elo gweḏi lun lɩmiḏo; gi gwune wei lun lijo lugwun lɩmiḏo.

³⁹ na jalgaṯɩm kworo wɩrlijo ŋuɽuna naleicɩno, mualɩm gwəri, ŋa gwuməḏi muma,

⁴⁰ late ləṯi ŋɩma gwaluməḏɩjo ŋuɽuna galo mɩna no.

kɩrisṯo gwiro ŋaɽe ŋeḏi ḏauuḏ a?

⁴¹ nuleicɩno, galakwe naṯɩlarno kɩrisṯo gwiro ŋaɽe ŋeḏi ḏauuḏ?

⁴² namɩni ḏauuḏ kwulo gwuŋun nuar kɩḏam geḏi delɩŋa ḏeḏi elo no, gwele gwun gwiro elo gweico gwelɩnya gwi no, jiga gi ḏi ḏinyi ḏun ḏiro ḏiŋir,

⁴³ kəbe nyilduji lun lɩkiḏiḏianyale gwiro gi gɩḏoɽ geḏi ŋwara ŋwuŋa.

⁴⁴ na ŋiro dino na ḏauuḏ gwaṯɩleico gwele; na ŋiro ŋaɽe ŋuŋun galakwe?

yecu gwudɩminu liji ga gwan jalgaṯɩm

⁴⁵ na gi gwune diŋɩnu liji wei nueico calɩmis juŋun no,

⁴⁶ jil muma gi jalgaṯɩm jun jaṯəmɩnyi jawele alkani jiria jun jola, na ḏɩmɩɽəḏo gi cu, na jɩḏoɽ jun jiro ŋwuɽa gi lɩdunu leḏi elo na ŋalo ŋun ŋiŋirano kɩmuri.

⁴⁷ lun laṯenya la ŋɩdio ŋagin lun liro linino, naṯɩluməḏɩjo eloŋu gittən kani al liji aŋu; na leno lakɩmɩnene ḏakɩmino ḏɩbuṯano.