luka 2 - ŋuɽun ŋun ŋiya ŋun ŋikaiilo elo 1966

asa 2 dilɩŋino ḏeḏi yecu

¹ na ŋwimon ŋweno na uguṯus gesar ŋele ŋuɽuna arram iluli jiri jeḏi liji wei.

² na ḏulio ŋeno ḏiro ḏun ḏiro lɽa gwune na kirinius ro mudir gweḏi suriya.

³ na liji wei nalwele gi jɩmɩrɩgen jagin gi ḏulio jiri jagin.

⁴ na yusib dino walane kamɩrɩgen yeḏi jalil yun yan nasɩra, nuwele yauḏia nuobene kamɩrɩgen yeḏi ḏauuḏɩŋa yun yan beṯlam gi gwune gwiro əriḏ yeḏi ḏauuḏɩŋa,

⁵ lulino mariam gwe gwun gwiro gwa gwuŋun gwun gwagwu, gwun gwugwuli.

⁶ na gwune jilo ŋɩnəwei na gaja ro gun gar gagilɩŋe.

⁷ nulɩŋe ŋaɽe ŋun ŋiro lɽa ŋun ŋiro gwəmɩnyo; nukɩɽɩbə ga jiria je, nuḏɩri ŋɩɽada ganu gi gwune galo ŋate gan ḏɩre gi mədelə no.

⁸ na laɽa je kamɩrɩgen yəwei lun liḏɩrijo joŋolia jagin geḏo gilio.

⁹ na gwiji gweḏi kanyin gweḏi gwele nulḏuḏɩnejo na ḏoɽeḏa ḏeḏi gwele nuloɽejo galo, naldonye gworki.

¹⁰ nal gwiji gweḏi kanyin uməḏɩjo nuleicɩno, nyaḏonyɩḏa no; nyi gwo gwuməḏɩjaje ŋuɽuna ŋiŋir ḏidila ḏe ganu ḏɩbuḏo ŋun ŋaje gi liji wei.

¹¹ gi gwune ŋɩmajilɩgŋinɩjo ŋete gwunnɩno kamɩrɩgen yeḏi ḏauuḏɩŋa ŋun ŋəkədə liji ga ŋuɽun ŋagin ŋun ŋɩki, ŋun ŋiro kɩrisṯo ŋun ŋiro gwele.

¹² na ŋeno ŋaro ḏəŋinio lagalo: nyalabuje ŋaɽe ŋɩkiɽɩbənu ga ŋɩḏɩro ga ŋɩɽada ganu.

¹³ na cou na gwiji gweḏi kanyin aŋino ajana ye yeḏi kanyin yutu lorṯeḏa eloŋu nilarno,

¹⁴ ḏɩbuḏia ḏi elo gwun gwo uro kanyin, na ŋɩne kwɩnyəm na ḏouwɩɽiḏa ḏaje kɩlɩgi ganu gi liji lun gwaṯɩliŋiri ḏugwore.

¹⁵ gwune nani liji leḏi kanyin walane nalabo kanyin, na laɽa uməḏəṯe laginŋu nalarno, ilele beṯlam gwunne ilaŋaḏa ŋuɽuna ŋeno ŋun ŋɩməṯi jei ganu ŋun ŋaŋijijɩlo gwele gwun gwiro elo.

¹⁶ nalwele cou nalbuje mariamŋaije yusib gwe na ŋaɽe ŋɩḏɩro ga ŋɩɽada ganu.

¹⁷ na gwune nalaŋu nalwɩreḏelo ŋuɽun ŋe ŋeḏi ŋaɽe ŋeno ŋun ŋuməḏɩjilɩlo.

¹⁸ na wei lun lɩdiŋɩnu nalobaga ṯuṯ ŋuɽun ŋun ŋuməḏɩjilɩlo laɽa;

¹⁹ namɩni mariam aḏɩŋane ŋuɽuna ŋeno wei, naṯuŋuməḏɩni gi ḏugwor ganu ḏuŋun.

²⁰ na laɽa aɽuwa nalbuḏi eloŋu nalorṯeḏa ŋuɽun wei ŋun ŋidiŋɩnilo na wei ŋun ŋaŋəḏɩlo ŋiro gi gwune uməḏɩjilɩne.

²¹ gwune na ŋwamon ṯɩmi dubə ŋwe ewalŋwuɽə ŋaɽe, nalḏəḏə jiri jan yecu, gi gwune eicɩne gwiji gweḏi kanyin gwerre ganu ŋate ŋɩmalgwuli kare ganu no.

ḏapaḏa ḏeḏi yecu kwu dunu gweḏi elo

²² gwune na ŋwamon ṯɩmi ŋwun ŋwar ŋwalŋwiŋir nanu ŋuɽun ŋe ŋun ŋigelijɩlo elo musaŋ nalapaḏa urucəlim nalḏəḏə gwelɩnya gwun gwiro elo,

²³ gi gwune ŋulinu ŋuɽun ŋeḏi gwele gwun gwiro elo, ŋarno, nyaɽe wei nyun nyiro ŋwuɽa nyun nyiro ləmɩnyo nyaleico nyipiḏo pɽul kwele.

²⁴ nalŋele ḏiḏuga gi gwune ŋulinu ŋuɽun ŋeḏi gwele gwun gwiro elo, ŋarno, jiɽidir jɩttən i ŋwubuɽa ŋwɩttən ŋwun ŋwoga.

simaun na ḏorṯeḏa ḏuŋun

²⁵ na gwəmɩnyo gwijo gwete urucəlim gwun gwan simaun. na gwəmɩnyo kweno gwiŋir gwaṯɩḏonye eloŋu gwuḏuḏɩnɩjo ḏɩmoɽa ga ḏeḏi liji leḏi isreiyil na gwuɽɩwə gwun gwɩpiḏo pɽul gwijo lugwun.

²⁶ na ŋuɽun aŋinijo gwuɽɩwə gwe gwun gwɩpiḏo pɽul ŋu gwate gwanaŋu ḏaiya gwerre gwate gwumaŋu kɩrisṯoŋ gweḏi gwele no.

²⁷ na ŋu nuwila gwuɽɩwə gwe kwu dunu gweḏi elo gwun gwubuḏo; na gwune nanaŋa baba gwe naləḏi ŋaɽe ŋe ŋun ŋan yecu nalarre ŋuɽun ŋe ŋun ŋigelijɩlo elo musaŋ,

²⁸ nuape di de duŋun nubuḏi elonu nuarno,

²⁹ na gwele gwi gwunne ŋa gwouwɩrico gaḏama guŋa ŋele ḏouwɩɽiḏa ḏe, gi gwune ŋuɽun ŋuŋa dino,

³⁰ gi gwune jei jinyi jimanu ḏɩkədəḏɩnə ga ḏuŋa

³¹ ḏun ḏigico gi jei ganu jeḏi liji wei.

³² bure gwuɽəḏɩjo liji ga lun liro ga dino, na ḏoɽeḏa ḏeḏi liji luŋa lun liro lisreiyil.

³³ na baba na nana gwuŋun nalobaga ṯuṯ ŋuɽun ŋun ŋuməḏulo ŋan ŋu.

³⁴ na simaun mora ki nueico mariamŋ gwun gwiro nana gwuŋun no, ŋaɽe ŋeno ŋɩməṯɩnu gi ḏaica ga na gi ḏidiɽio liji lutu leḏi isreiyil, na ŋaro ḏəŋinio ḏun ḏuməḏəṯini elo.

³⁵ na ŋiro dino ŋa gwaḏugini kɩwiḏ ge gwula gwuŋa, gi gwune ḏuməḏɩno ḏeḏi dugwor ḏeḏi liji lutu ḏɩmaḏəḏə ga.

ana

³⁶ na nebi gwijo gwun gwiro gwa gwan ana, gwiro ŋaɽe ŋeḏi panwil kəriḏ. yeḏi asɩr. na ŋu gwuməṯi jiḏilio jutu gworki, nalijiga gwəmɩnyo gwuŋun gwe jɩḏilio kwoɽoṯəɽɩl gi gwune nundiɽo.

³⁷ na ŋu majiga gwate gwəmɩnyo jɩḏilio ḏuɽi dubə na kwoɽo. nate nunouwɩrico duno gweḏi elo gwun gwubuḏo no, namɩni naṯuəpijo eloŋu ŋɩru ḏɩməṯo ḏe əbuṯo na ḏiɽoṯeḏa ḏe gilio na anyine.

³⁸ na ŋu gi sa ceno ŋuḏuḏɩnu ga nueico eloŋu sukran, nalgwumə luŋaŋale wei lun lɩḏuḏɩnɩjo ḏɩkədəḏɩə ga urucəlim jili je.

ḏɩbuḏa ḏeḏi yecu

³⁹ gwune nalṯɩmi ŋɩḏio wei ŋuɽun ŋe ŋeḏi gwele gwun gwiro elo, nalaɽuwe jalil kamɩrɩgen ŋagin yun yan nasɩra.

⁴⁰ na ŋaɽe buḏe, nubɩɽe nanu gwuɽɩwə gwe, na ḏilɩŋeḏa ḏe, na ḏeḏi elo ḏijo lugwun.

⁴¹ na babaŋa nana gwe gwuŋun laṯɩwele urucəlim jɩḏilio wei kɩmuri ge ḏouwɩrico.

⁴² na gwune nuro jɩḏilio di na gwuṯɩen nalabo urucəlim gwiro gi gwune aṯɩnuwele kɩmuri.

⁴³ gwune nalṯɩmi ŋwamon wei, nalar laɽuwe namɩni ŋaɽe ŋun ŋan yecu. ŋijɩre urucəlim, na baba na nana gwuŋun gwe nate nallɩŋe ŋɩmanɩwalane no.

⁴⁴ nalar gi larno ŋo gi liji ganu lun lɩwiḏɩle, nalwele gi ṯaṯ lamon letɩdo nalbunyi gi liji ganu lagin na gi liji lun lilɩŋiḏɩlo.

⁴⁵ gwune nalbunyi bibi nalaɽuwe urucəlim mɩna nalbunyi.

⁴⁶ gwune na ŋwamon ete ṯəɽɩl nalbuje kwu dunu gweḏi elo gwun gwubuḏo, lijiga gidəno limuwalɩm le, nudiŋɩni nulɽoṯəḏɩjo ga.

⁴⁷ na wei lun lɩdiŋɩnu nalobaga ṯuṯ ḏilɩŋeḏa ḏuŋun na ḏɩwəɽəṯɩjo luŋaije ŋuɽuna ŋwara.

⁴⁸ na gwune nalaŋu nalobaga ṯuṯ gworki, na nana gwuŋun uməḏɩjo nueicɩno, ŋaɽe ŋinyi, gwudaro gəko nuŋwijərrɩjo dino? baba gwuŋa na nyi anbunyaŋa ke niji dugwor mɩɽi.

⁴⁹ nulmɩni umeḏɩjo nuleicɩno, gwudaro gəko ninyilbunyi? nya late lilɩŋiḏi nanyarno, arram nyi gwəpijo babaŋ gwi ŋɩru na?

⁵⁰ nate nalɩŋe ŋuɽuna ŋun ŋuməḏɩjulo no.

⁵¹ nalgwulo nalwele nasɩra naṯɩləṯeijo gəni. naṯɩmɩni nana gwuŋun aḏɩŋane ŋuɽuna ŋeno wei gi ḏugwor ganu ḏuŋun.

⁵² naṯi yecu dare ḏilɩŋeḏena na ḏɩbuḏa ḏe, naṯi elo nəji na liji.