luka 15 - ŋuɽun ŋun ŋiya ŋun ŋikaiilo elo 1966

asa 15 goŋol gun gɩḏuḏo

¹ na liji wei lun laṯɩmeje ṯulba na lun lɩki lɩdakaḏəṯi lugwun gwaldeŋɩnejo.

² na lɩbarɩsi na jalŋaṯɩm nanuməḏəṯelo nalarno, gwiji kweno gwəmɩnyu liji lun lɩki naṯɩlʼe.

³ nuluməḏɩjo ŋuɽuna ŋeno ŋun ŋɩlɩbo nuleicɩno;

⁴ gwiji gwo gwura lagalo gwun gwəṯi joŋolia ḏuɽi di na ḏa ŋɩmaḏuḏe getɩdo gwate gwaṯɩwaalne gi joŋol jun jiro ḏuɽi ṯoḏɩnekwoɽo na ṯoḏɩnekwoɽo geḏo, naṯuwele gi ḏɩbunya gun gɩḏuḏo kəbe nubuje na?

⁵ na ḏa gumubuja naṯugelino kwudom elo nudile ganu;

⁶ na ḏa mila dunu lugwun naṯuəmɩḏe lɩmeḏin na liji lun ləṯilijaḏe ga nuleicɩno, ildile ganu, nyi gwumabuja goŋolia ginyi gun gɩḏuḏo.

⁷ nyi gweiceijɩno, na ŋiro dino ḏidila ḏaje ḏutəno ganu kanyin dino kwiji gweṯɩdo gwun gwɩki gwun gwuwɩrlo ga ŋuɽun ŋun ŋɩki gi liji lun liro ḏuɽi ṯoḏɩnekwoɽo na ṯoḏɩnekwoɽo lun liŋir lun late lɩbunyu ḏuwɩrla ga no.

ruba gwun gwiḏuḏo

⁸ na gwa gwo gwura gwun gwəṯi. ruba di. na ḏa gwumaḏuḏe gwetɩdo, gwate gwaṯuwɩdi lambə, numuje duno galo nubunyi mɩce kəbe nubuje na?

⁹ na ḏa gwumubuje naṯuəmɩḏe lɩmeḏin na liji lun ləṯilijaḏe ga, nuleicɩno, ildiie ganu. nyi mabuje ruba gwun gwiḏuḏo.

¹⁰ nyi gweiceijɩno, na ŋiro dino ḏidila ḏaje gi jei ganu jeḏi liji leḏi kanyin kwiji gwetɩdo gwun gwɩki gwun gwuwɩrlo ga ŋuɽun ŋun ŋɩki.

ŋaɽe ŋun ŋɩwɩrla ga

¹¹ nuleicɩno, gwiji gwete gwəṯi nyaɽe nyɩttən nyun nyiro ləmɩnyo.

¹² na ŋun ŋɩtieno uməḏɩjo babaŋ gwuŋun nuelcɩno, baba, kenyɩḏijije ŋɩdio ganu ŋuŋa nyilḏəḏə ŋinyi; nulkenyɩḏɩjo ŋɩdio ganu ŋuŋun.

¹³ na ŋaɽe ŋun ŋɩtieno jiga ŋwamon ŋwədi, nuwəɽeice ŋɩdio ŋuŋun wei ldu, nugele kamɩrɩgen yete yun yola ganu; na ŋɩnəwei nuwəri galo ŋɩdi ŋe ŋuŋun, naṯuape ŋuɽuna ŋɩki.

¹⁴ na gwune nuduji ŋɩdio ŋuŋun wei na janu je jɩbuḏo kamɩrɩgen yəwei nubunyi ŋuləṯi.

¹⁵ nuwele nuḏɩra gwete gweḏi amɩrɩgen yəwei, naṯuwəje geḏo gi ḏiʼia juḏuro.

¹⁶ naṯuar gwenyeje gare guŋun jumuruḏo jun jiṯɩlo juḏur, numɩni ate nan gwetɩdo ḏəḏə no.

¹⁷ na gwune nulɩŋe gwiro gɩɽilo, nuuməḏɩni nuarno, jaḏam jeḏi baba gwinyi jutu naləṯi ŋɩdio ŋe ḏiṯa ŋutu, nyimɩni je ŋɩme gwar gwal jaŋu.

¹⁸ nyi gweḏiɽi gwele ḏi baba gwinyi, gwiuməḏɩjo gwieicɩno, bala, nyi mape ŋuɽuna ŋɩki kanyin na lugwuŋa.

¹⁹ na nyi gwate gwɩdeleḏo gwinyieico ŋaɽe ŋuŋa no. dujinyi gi gwune gaḏam gete guŋa.

²⁰ nudiɽi nuwele ḏi baba gwuŋun, namɩni gwune ju gi ṯaṯ uro ŋɩnəwei na baba gwuŋun aŋu nuino, nuoɽe numɩɽenyə, numaṯane ganu.

²¹ ni ŋaɽe uməḏɩjo nueicɩno, baba, nyi mape ŋuɽuna ŋɩki kanyin na lugwuŋa. na nyi gwate gwɩḏeleḏo nyi gwinyieico ŋaɽe ŋuŋa no.

²² namɩni baba uməḏɩjo lɩwainya luŋun nuleicɩno, apal lugə coucou lun liŋirano nyaŋaki, nyəḏɩje luɽuŋe gi ḏi ḏuŋun, nyaŋaki jɩwɩḏia ŋwara ŋwuŋun.

²³ nyapa galajala gun giɽona, nyaḏuge, ilʼe ildile ganu.

²⁴ gi gwune ŋaɽe ŋinyi ŋeno ŋaiyo namɩni ŋɩməmɩḏe mɩna, ŋɩḏuḏo namɩni ŋɩmabuḏini. na luŋa nalɩje gi ḏidila ganu.

²⁵ namɩni ŋaɽe je geḏo ŋun ŋiro lɽa. gwune nuwila nudaka duno nanu, nudiŋɩni ŋwal ŋweḏi ŋiɽebeḏe na ŋweḏi ḏɩriṯa.

²⁶ nuəmɩḏe gaḏama gete nuuməḏɩjo galo ŋuɽun ŋe ŋeno.

²⁷ nuuməḏɩjo nueicɩno, magalo gwumila, namɩni baba gwalo gwimaḏuge galajala gun giɽona gi gwune nubuje miŋir nanu.

²⁸ nuɽe ganu gworki nuate nuəmɩnyi ŋəḏi no. na baba gwuŋun du nuɽoṯeḏe lugwun gworki.

²⁹ nuwɩrlijo babaŋ gwuŋun ŋuɽuna nueicɩno, baba, nyi gwaṯaŋəpijo ŋɩru jɩḏilio ceno jutu, na bubruṯ nyi gwate gwatɩnki ŋuɽuna ŋuŋa no, nate ninmɩni ḏəḏə laɽe lanaldile ganu lɩmaḏəri le no.

³⁰ namɩni gwune na ŋaɽe ŋuŋa ŋeno wila ŋun ŋuwɩriḏi galo ŋɩdi ŋe ŋuŋa gi la lun limɩɽiḏi jei ganu, namɩni ḏugijo galajala gun giɽona.

³¹ numɩni uməḏɩjo nueicɩno, ŋaɽe ŋe ŋinyi, alaṯɩje bubruṯ, namɩni ŋɩdi ŋinyi wei ŋuŋa ŋiro.

³² namɩni ŋuɽun ŋiŋir nanəḏile ganu nanarre gwobɩɽa, gi gwune magalo kweno gwaiyo namɩni məmɩḏe mɩna, gwiḏuḏo namɩni mabuḏini.