luka 14 - ŋuɽun ŋun ŋiya ŋun ŋikaiilo elo 1966

asa 14 yecu gwiŋiri gwəmɩnyəŋe nanu gwun gwiro amuḏi gi lamon le sabiṯ

¹ na gwune nuəḏi kwu dunu gweḏi gwete gweḏi lele leḏi lɩbarɩsi lamon le sabiṯ gi ḏiṯa na luŋa naṯɩniŋele gei.

² na gwəmɩnyo gwun gwumə nuro amuḏi wei gwijo kɩɽelo lugwun.

³ na yecu wɩrlijo ŋuɽuna nuluməḏɩjo limualɩm leḏi ŋuɽun ŋun ŋigelijɩlo elo musaŋ na lɩbarɩsi nuieicɩno, gwiŋir gwilmiḏi gi lamon le sabiṯ i awe?

⁴ nalje nyɩkwom. numəṯo gwəmɩnyəŋe numiḏi nukuwa nuwele.

⁵ nuluməḏɩjo nuleicɩno, əḏi gwiro lagalo ḏa ŋiḏri ŋuŋun i ŋəɽigə ŋɩmideḏe gi lɩbir nuate nudio cou gi lamon le sabiṯ no?

⁶ nate naləṯi ŋɩma nalwɩrlijo ŋuɽuna gwan ŋuɽun ŋeno no.

ḏidujia gwula gwɩti na ḏɩməṯo liḏa

⁷ nuluməḏɩjo lun ləmɩḏɩo ŋuɽuna ŋun ŋɩlɩbo gwune nuaŋu galakwe lɩmaməṯo gala ŋun ŋiro ŋwuɽa nuleicɩno,

⁸ ḏa maŋəmɩḏaṯe gi ḏaga, ŋa gwo gwajiga kalo ŋun ŋiro lɽa gi gwune gwara gwanje gwete gwun gwəmɩnyenu gwəmɩḏeṯu lugwun,

⁹ na gwila gwun gwəmɩḏaje gwaŋeicɩno, diɽɩjo gwiji kweno; na gɩdo ḏare ḏaŋape ḏa ŋa mele kalo gun gobɩleno ganu.

¹⁰ namɩni ḏa maŋəmɩḏa ŋamɩni wele ŋajiga kalo gun gobɩleno ganu kani ḏa mila gwun gwəmɩḏaŋa gwaŋeicɩno, maḏəri, abuḏa lakwogwo. na ŋiro dino ga gwəṯi ḏɩbuḏia lun lijanyale ga;

¹¹ gi gwune gwun gwaṯɩbuḏi gwula gwuŋun gwadujini gwɩti, na gwun gwaṯɩtiene gwula gwuŋun gwabuḏane elo.

¹² nueico dino gwun gwəmɩḏo no, na ḏa maŋele gɩmuri ge ḏiṯa anyino ganu i gagarege, ŋa gwo gwaṯəmɩḏa lɩmaḏalo, i lɩmagalo i əriḏo yuŋa, i lun laṯanyalijaḏe ga lun ləṯi ŋɩdio ŋutu, gi gwune lar laŋanəmɩḏa dino nalaŋawəɽəṯɩjo ŋɩdio ŋuŋa.

¹³ namɩni ḏa ŋa maŋele gɩmuri ŋaləmɩḏe lun late ləṯi ŋɩdio no, na ŋwuḏan na jɩbɩjo na lun lɩrimə gi jei;

¹⁴ na ŋa gwəṯi ḏɩmoreḏa gi gwune late ləṯi ŋɩma ŋaŋalwəɽəṯɩjo no; na ŋalape gi lamon le ḏidiɽo gi ḏaiya ḏeḏi liji lun liŋir.

ŋuɽun ŋun ŋɩlɩbo ŋeḏi gɩmuri ge ḏaga

¹⁵ na gwune nudiŋɩni dino gwete lun lijille ga nueicɩno, ḏɩmoreḏa ḏaje lugwun gwun gwaʼe ŋele ŋeḏi elo.

¹⁶ nueicɩno, gwiji gwete gwigelo gɩmuri gibuḏo nuəmɩḏe liji lutu.

¹⁷ nuwəje wainya gwuŋun kaja ge ḏiṯa luleico lun ləmɩḏulo no, wilal, gi gwune ŋɩdi wei ŋɩmaḏaḏaṯe wɽi.

¹⁸ na luŋa wei naliḏeije ga nalumə ŋuɽuna ŋun ŋaliŋiwele gwete gwete. nueico gwun gwiro lɽa no, nyi meḏɩla ḏɩri na arram nyi gwele nyiaŋaḏa. na nyi gweicaŋa no, ouwɩriciŋi ŋa kaja guŋa.

¹⁹ na gwiro kaja eicɩno, nyi meḏɩla nyɩḏrio di na nyi gwele nyiliḏeijo, na nyi gweicaŋa no, ouwɩriciŋi ŋa kaja guŋa.

²⁰ na gwiro kaja eicɩno, nyi mago gwa, na dino nyi gwate gwəṯi ŋɩma nyi gwila no.

²¹ na wainy kweno aɽuwa nuuməḏɩjo gwelɩnya gwuŋun ŋuɽuna ŋeno. na gwele gweḏi dunu ɽe ganu nueico wainya gwuŋun no, ḏuḏi coucou gi daṯ elo deḏi amɩrɩgen na dun dɩtidɩti ŋilgwuluḏɩjo ŋɩne lun late ləṯi ŋɩdio no, na ŋwuḏan, na lun lɩrimə gi jei na jɩbɩjo.

²² na wainy arno, gwele gwi, ŋərrɩlo gi gwune arane, namɩni galo gore gijiga.

²³ na gwele eico wainya no, duḏi gi daṯ elo na dun dɩtiḏɩti, ŋalremeṯeḏeica aləḏi kəbe a dunu gwinyi enyeḏe.

²⁴ gi gwune nyi gweiceijɩno, gwate gwetɩdo lun ləmɩḏɩlo gwalɩŋaico ŋɩdio ŋeḏi gɩmuri ginyi no.

aga yeḏi gwujana yecu

²⁵ na liji lijo lutu lun lɩwiḏɩle, nuwɩrla ga nuleicɩno,

²⁶ ḏa gwete mila lugwi gwate madonye babaŋ gwuŋun na nanaŋ na gwa, na nyaɽe na lɩmegin lun liro la na lun liro ləmɩnyo na gwulo gwuŋun dino no, gwate gwəṯi ŋɩma gwaro ṯalɩmis ḏinyi no.

²⁷ na gwun gwate gwaɽe luɽi luŋun lun lɩmalɩḏo ganu nilgwujane no, gwate gwəṯi ŋɩma gwaro ṯalɩmis ḏinyi no.

²⁸ na əḏi gwiro lagalo, na ŋu gwəmɩnyu gwuṯe ḏimɩlia gwate gwajiga gwerre ŋulḏuɽo ŋəri ŋəṯulo ŋun ŋeṯɩmijo na?

²⁹ na kaja gun gugiŋele jama nuate nuəṯi ŋɩma nuṯɩmi no, na wei lun laŋəḏi gwalaki jumo.

³⁰ nuleicɩno, gwiji kweno gwiḏeijo ga gwuṯe numɩni ate nuəṯi ŋɩma gwuṯɩmi no.

³¹ i gwele gwo gwura ḏa mele gwalrre gwele gwe gwiro kaja gwate gwajiga gwerre no luməḏəṯe luŋa ləri ləṯi ŋɩma lun liro alɩb di nalobeḏaṯe lun lɩwiḏɩle lɩkiḏiḏɩle lun liro alɩb ḏuɽi dɩttən a?

³² namɩni ḏa gwate məṯi ŋɩma no, na ḏa gwəwei majɩre gala gwola ganu nuwəje duwəjo nulɽoṯeḏe lugwun alŋele ŋuɽuna ŋe ḏouwɩɽiḏa.

³³ na dino gwate gwete lagalo, ḏa gwate mawalane ŋɩdi ŋuŋun wei no, gwate gwəṯi ŋɩma gwaro ṯalɩmis ḏinyi no.

³⁴ ŋwuco ŋiŋir; namɩni ḏa ŋɩmaicɩwe namɩni ŋanyalḏinyi a gwugwe?

³⁵ ŋate ŋiŋir minu no, na ŋate ŋiŋir kwɩnyəm i ŋɩɽaḏa ganu no. ŋaliḏeije kɩluḏo. gwun gwəṯi nəni neḏi diŋɩna nudiŋɩni.