luka 12 - ŋuɽun ŋun ŋiya ŋun ŋikaiilo elo 1966

asa 12 yecu gwudɩmini calɩmis juŋun ga ŋuɽun ŋun ŋiro ganu ŋɩttən

¹ na kaja gun gaɽuwaḏage liji ldu lutu, nate nal gwiji lɩŋe liro umɩnyo no, naṯɩldute gworo kworo nueico calɩmis juŋun gwerre no, jil muma gi jɩduɽu jeḏi lɩbarɩsi jun jiro ŋuɽun ŋun ŋiro ganu ŋɩttən.

² ŋate ŋun ŋikɩɽɩbəḏɩnu ŋun ŋate ŋaɽeleḏɩni no, na ŋɩlɩbiḏɩnu ŋun ŋate ŋaliŋiḏɩni no;

³ na ŋiro dino ŋun ŋuməḏanyalo kirɩm ŋəḏiŋɩnini kwu bure, namɩni ŋun ŋuməḏanyalo kəni ganu kalo gun gilɩbo ŋalumə ŋwal ŋwe ŋwɩbuḏo gi lɩdunu elo.

yecu gwubɩɽi. calɩmis juŋun nanu

⁴ namɩni lɩmaḏəri, nyi ŋweiceijɩno, nya lo laḏonye lun laɽɩnye aŋɩna na gɩdo ŋate ŋəṯɩlo ŋun ŋalape ŋwutəno no.

⁵ namɩni nyi gwajaŋijo gwun gwar gwanyaḏonye; ḏonyil ḏa gɩdo maɽinye gwəṯi ŋɩma gwugwuwini jenam. i, nyi ŋweiceijɩno, ḏonyil.

⁶ ŋwujujiri ṯoḏɩne ŋwate ŋweḏɩlini lɩmilim kwoɽo na? na late letɩdo lagin liḏuḏɩne ganu gi jei ganu jeḏi elo no.

⁷ namɩni əɽu yalo dino wei yiḏuɽəḏɩnu. na ŋiro dino nyaḏonyɩḏa no; nyaŋa nyalnəno gi ŋwujujiri ŋwutu.

⁸ na nyi gweiceijɩno, gwun gwiteije ga gi jei ganu jeḏi liji, gwa ŋaɽe ŋeḏi liji teije ga gi jei ganu jeḏi liji leḏi kanyin leḏi elo.

⁹ na gwun gwinyidonye gi jei ganu jeḏi liji gwadonyini gi jei ganu jeḏi liji leḏi kanyin leḏi elo.

¹⁰ na gwun gwuməḏəṯe ŋuɽuna ŋaɽe elo ŋeḏi liji, ŋuniḏuḏɩjo ganu, namɩni gwun gwaḏene gwuɽɩwə gwun gwɩpiḏo Pɽul ŋate ŋuniḏuḏɩjo ganu no.

¹¹ na ḏa lɩmajapaḏa gi lɩdunu leḏi elo, na gi lele leḏi əcərio, na ŋele, na nya lo lanuməḏɩni gi dugwor ganu nyalanarno galakwe nanyalwɩrlijo i ŋun ŋanyalumə.

¹² gi gwune gwuɽɩwə gwun gwɩpiḏo pɽul gwajalɩmi kaja keno ŋun ŋar ŋanyalumə.

jei jutu ganu, na ŋuɽun ŋun ŋɩlɩbo ŋeḏi gwiji gwun gwiro gɩɽilo gwun gwutu ḏɩbona

¹³ na gwete eico gi liji lun laɽuwaḏo ldu no, mualɩm gwəri, eico magəri no, anagwikenyeḏe ŋɩdio ganu ŋun ŋɩɽenyeḏanane.

¹⁴ nueicɩno, gwiji kwe, əḏi gwiro gwudujinyi gaḏi i gweḏi kenyeḏo ŋɩdio ganu galo?

¹⁵ nuleicɩno, jil muma, aji dugwor mɩjeijo ŋɩḏio ŋutu no; gi gwune ḏɩmiḏa ḏeḏi gwiji ḏate ḏɩkədɩnu ŋɩdi ŋe ŋun ŋutu ŋun ŋəṯulo no.

¹⁶ nuluməḏɩjo ŋuɽuna ŋun ŋɩlɩbo nuleicɩno, gwiji gwete gwun gwəṯi ŋɩdio ŋutu mapa gi dɩri duŋun ḏɩwona ḏutu.

¹⁷ nuiri jei galo kwulo gwuŋun nuarno, nyi gwar gwarre galakwe? gi gwune nyi gwate gwəṯi gala ginwəɽeice ŋɩdio ŋinyi ldu no.

¹⁸ nuarno, nyi gwarre dino: nyi gwouwɩri ga nyuɽulo nye nyinyi na nyilkaɽuje nyun nyibuṯano, na nyi gwouwəɽeice ŋɩnəwei ŋwona ŋwinyi ldu na ŋɩdio wei ŋinyi;

¹⁹ na nyi gweico gwula gwinyi no, gwulo gwinyi, ŋa gwəṯi ŋɩdio ŋutu ŋun ŋɩwəɽəṯɩnu ldu ŋeḏi jɩḏilio jutu. ubiḏi uwə gwe, ŋaʼe naŋayu na ŋaiŋir ganu.

²⁰ na elo eicɩno, gɩɽilo ke, gilio ŋiro keno gwulo gwuŋa gwubunyini. na ŋun ŋɩkəḏəṯəṯilo ga ŋaro ŋəṯe?

²¹ ŋiro dino gwun gwaṯiwəɽəṯɩjo gwula gwuŋun ŋɩdio ldu, na ŋədu ŋeḏi elo ŋiro no.

dɩminu ga ŋuɽun ŋe ḏuməḏɩno gi ḏugwor ganu

²² nueico calɩmis juŋun no, na ŋiro dino nyi gweiceijɩno, aṯanyaməḏɩno gi dugwor ganu gwan ḏɩmiḏa ḏalo no, ŋun ŋar ŋanyalʼe, i gi jiŋɩno jalo jakani aŋe no.

²³ ḏɩmiḏa ḏɩbuṯano gi ḏiṯa na jiŋɩno jɩbuṯano gi ḏɩkana.

²⁴ iril jei ga gi jiḏoŋɩra; gi gwune jate ɽaṯɩkwoi i jəṯɩwone no; na jate jəṯi lɩdunu i nyuɽulo no; namɩni jal elo ḏəḏə ŋɩdio. na umɩnyo nyaŋa nyalnəno gi nyiɽuwə?

²⁵ na əḏi gwiro lagalo, ḏa muməḏɩni gwəṯi ŋɩma gwenyeḏeice aŋɩna yuŋun elo dura ḏetɩdo?

²⁶ na ḏa nya late ləṯi ŋɩma nyaləduji ŋun ŋɩtieno no, namɩni gwudaro nanyanuməḏɩni ŋun ŋɩṯanu?

²⁷ iril jei ga ŋɩḏini ŋun ŋɩro ŋwɩromel; ŋwate ŋwaṯape ŋɩru i naliri ŋabuɽo no, namɩni nyi gweiceijɩno, namɩni suliman gi ḏiniḏo ḏuŋun wei gwate gwaṯɩkani gi lete lagin no.

²⁸ na ḏa elo maṯikaii garoma dino, gun gijo gwunne geḏo, namɩni ḏa ŋɩma liji ṯa kigo giləganu, ŋiro ŋaḏa ŋuṯəno gwate gwajikaii nyaŋa lun lɩti ḏɩməṯo na?

²⁹ aṯanyaɽoṯeḏa nyalaʼe aŋe no na nyalayu aŋe no, ɩ nyuməḏɩni ŋwuɽa ganu no.

³⁰ na ŋɩdi ŋeno wei ŋaṯɩl liji ɽoṯeḏe leḏi gɩḏilio wei, namɩni baba gwalo gwilɩŋiḏi ŋɩbunyanyalo ŋeno.

³¹ nyamɩni bunyi ŋelɩnya ŋuŋun na ŋeno wei ŋajɩbəḏəṯɩjo.

³² aṯanyaḏonyɩḏa nyaŋa joŋol jun jouwɩrio no; gi gwune baba gwalo gwəmɩnyu gwajiḏəḏə ŋelɩnya.

³³ iḏillo ŋun ŋəṯɩnyalo nyalḏəḏə liji lun late ləṯi ŋɩdio no. kədijɩlo jurəḏo jun jate jake no, ḏɩbona ḏun ḏate ḏete kanyin no kalo ŋun ŋate gan gwuɽam ḏakaḏaico no, na aṯum eʼe no.

³⁴ gi gwune ŋalo ŋun gaṯɩn ḏɩbona ḏalo je, ŋɩnəwei dugwor dalo daje dino.

arram liji ləṯigirini, na ŋuɽun ŋun ŋɩlɩbo ŋeḏi wəkil gwun gwiŋir

³⁵ ouwɩricil jiria jalo alkanane ga jɩma je, na ŋwambə ŋwalo aloɽa ga;

³⁶ na nyaro gi liji lun laṯɩḏuḏɩnɩjo gwelɩnya gwagin ḏa maɽuwa gi ḏaga, kəbe ḏa mila mapiḏo gibia gwaliḏijo cou.

³⁷ ḏɩmoreḏa ḏaje gi lɩwainy ləwei kaja gun gagi gwele gwagin wila nulbuje ga liŋirinu. gwerkwe nyi gweiceijɩno, ŋu gwakani giria ŋɩma ge, nalulŋele ga nalulʼi, na gweḏiɽi na luləpijo ŋɩru.

³⁸ na ḏa ŋu mila kaja gun gaduji gworo gwuttən gɩlɩgina ganu, i kaja gun gaduji gworo ṯəɽɩl, nalmulbuje dino, ḏɩmoreḏa ḏaje gi lɩwainy ləwei.

³⁹ namɩni nyalilɩŋiḏi dino, ḏa gwele gweḏi dunu gwilɩŋiḏi gaja gun gagi gwuɽam wila, gwaŋagirini na gwate gwaŋouwɩrico duno gwuŋun gwaŋaro ŋwuɽam no.

⁴⁰ na jil muma nyaŋa dino, nyaji muma, gi gwune kaja ŋun ŋate ganyaŋarno ŋaɽe ŋeḏi liji ŋaɽuwe.

⁴¹ na buṯrus eicɩno, gwele gwəri, ŋa gwuməḏɩjɩje ŋuɽuna ŋeno ŋun ŋɩlɩbo anaŋa, i liji wei ḏina?

⁴² na gwele eicɩno, namɩni əḏi gwiro wəkil gwun gwuḏuḏɩnu ga gwəṯi ŋadɩgɩɽenya gwun gwa gwele gwuŋun diɽi ŋwuduji gwele gweḏi jaḏam juŋun wei, aṯulḏəḏə ŋɩdio kaja ŋagin?

⁴³ ḏɩmoreḏa ḏaje kwu wainy ḏa gwele gwuŋun mila, nubuje gwarro dino.

⁴⁴ gwerkwe ganu, nyi gweiceijɩno, ŋu gwuduji gwele gweḏi ŋɩdi ŋuŋun wei.

⁴⁵ namɩni ḏa wainy kweno gwumaro gi ḏugwor ganu ḏuŋun no, gwele gwinyi gwajana gɩttən gi ḏaɽuwa ḏuŋun, naṯuiḏeŋe ga gi ḏɩpiḏo jaḏama jun jiro ləmɩnyo na jun jiro la, naṯuʼe nuyu nurləle.

⁴⁶ na gwele gweḏi wainy kweno gwila gi lamon lun late lɩṯunɩju na kaja ŋun ŋate gilɩŋiḏu no, na gwuɽu na gwuŋele kalo lijiŋale lun laṯakɩra ŋuɽuna gi duɽo.

⁴⁷ namɩni wainy gwun gwilɩŋiḏi ŋɩru ŋun ŋɩbunyɩlo gwele gwuŋun, na gwate makaḏaḏaṯa ga no, i nate nunarre ŋuɽuna ŋuŋun no, ŋwapini gworki.

⁴⁸ namɩni ŋun ŋate ŋilɩŋiḏulo no, nulmɩni duji ŋideleḏo gwapini, namɩni gwapini mɩce. na gwun ŋiḏəḏulo ŋutu ŋwulbunyi lugwun ŋutu, na ŋun ŋapuŋe ŋɩru ŋutu ŋwulbunyi gwutəno.

ḏəŋinio ḏeḏi gwunne na ḏeḏi gaja guwei

⁴⁹ nyi gwuwiḏi kani nyiwino igo ye kɩḏɩlio. namɩni ŋilbunyi ḏa igo yimouḏe gwunne.

⁵⁰ na nyi gwəṯi ḏibabṯaijɩno ḏun ḏiḏibabṯaijini, na galakwe nyi gwəṯi ŋwuɽedɩnya kəbe na ŋuɽun ŋeno ṯɩmi.

⁵¹ nyalaṯarno nyi gwuwiḏi nyi gwagele ḏouwɩɽiḏa kɩḏɩlɩo a? nyi gweiceijɩno, awe, namɩni ḏɩkenyeḏo ganu.

⁵² uro gwunne laje ṯoḏɩne kwu dunu gwetɩdo lakenyɩḏiḏi ganu, ṯəɽɩl gi loro lɩttən, na lun liro lɩttən gi loro lun liro ṯəɽɩl.

⁵³ baba gwalkenyɩḏiḏi ganu ŋaɽe ŋun ŋiro gwəmɩnyo, na ŋaɽe ŋalkenyɩḏiḏi ganu baba gwe; na nanaŋa ŋaɽe ŋe ŋun ŋiro gwa na ŋaɽeŋa nana gwe, na gwunənŋa gwunən gwe gwun gwiro gwa, na gwunənŋa gwunən gwe.

⁵⁴ nueico liji dino no, gaja gun ganyaŋaŋu jəbɩɽo jimadiɽo kalo gun gaṯɩn anyin gwuli, cou nyalarno ŋau gar gani, numɩni ni dino.

⁵⁵ na ḏa nyalmaŋu ḏɩronia ḏaro gelio gwe, nyalarno galo gabuḏi ganu. nalmɩni ro dino.

⁵⁶ nyaŋa lun ləṯi ŋuɽuna ganu ŋɩttən, nyalilɩŋiḏi nyalouwɩrli ŋuɽuna ŋun ŋaŋinu kɩḏilio na kanyin; na galakwe nya late lalɩŋe nyalouwɩrli gaja ganu keno no?

⁵⁷ na gwudaro gwiro gi lulo lalo gəko nate naṯanyakɩmiḏe ŋuɽun ŋe ŋun ŋiro gwerkwe no?

⁵⁸ na kaja gun ganyagiwele gwun gwicɩgɩḏanyagwe ḏi lumḏa, ji ḏiḏir kani ŋɩkədəḏɩnə ga lugwun gi ṯaṯ; kani ŋate ŋalgwuloḏa ḏi gaḏi no, na ŋa gaḏi ḏəḏə mamurŋ na ŋa mamur ŋele kɩrkon no.

⁵⁹ nyi gweicaŋa no, ŋa gwate gwanduḏo ŋɩnəwei kəbe ŋaŋele milima gwun gwiro gɩdo.