luka 11 - ŋuɽun ŋun ŋiya ŋun ŋikaiilo elo 1966

asa 11 ḏuməḏɩjo eloŋu ŋuɽun ŋe ŋaŋijɩlo yecu

¹ na gi gwune ju gi ḏuməḏɩjo eloŋu kalo gete, na gwune nuḏuḏɩni wɽi, na gwete eico gi calɩmis juŋun no, gwele gwəri, alɩmije galakwe anuməḏɩjo eloŋu gi gwune alɩmi yuwana calɩmis juŋun dino.

² nuleicɩno, ḏa nyalmar luməḏɩjo eloŋu nyamɩni arno, baba, ouwɩrico jiri juŋa a liji nəji jɩpiḏo pɽul. na ŋele ŋuŋa ŋila. na ŋuɽun ŋuŋa. ŋədujɩni kɩḏilio gi gwune ŋandujɩni kanyin.

³ ḏəḏije gia ŋwamon wei.

⁴ na ŋijiḏuḏɩjo ganu ŋuɽun ŋun ŋɩki, gi gwune anaŋa dino ŋaṯaniḏuḏɩjo ganu wei lun ŋaṯijilərrɩjo ŋun ŋɩki. na aṯijəḏɩjo ŋuɽun ŋe ḏɩḏeijo no.

ḏuməḏɩjo eloŋu bucu bubruṯ, na ŋuɽun ŋun ŋɩlɩbo ŋeḏi meḏin gwun gwuwiḏi gilio

⁵ nuleicɩno, əḏi gwiro lagalo, gwatɩn meḏin, nuwele lugwun gɩlɩgina ganu, nueicɩno, maḏəri, ḏəḏinyi gia ṯəɽɩl nanu gəmɩju ge,

⁶ gi gwune maḏəri gwete mila kalo gwola ganu, na ŋate ŋəṯilo ŋun ŋilḏəḏə no,

⁷ na ŋu gwun gwijo gɩḏəno nuwɩrlijo ŋuɽuna nueicɩno, ŋiḏiḏiɽio galo no, gibur go gilaŋiṯinu gwunnɩno, na nyaɽe nyinyi nye nyɩḏɩrananye kajagar. nyi gwate gwəṯi ŋɩma gweḏiɽo ŋaŋaḏəḏə no.

⁸ nyi gweiceijɩno, na ḏa gwate madiɽi ŋumulḏəḏə gi gwune gwiro meḏin no, namɩni gi gwune gwijeiju ga gweḏiɽo ŋwulḏəḏə ŋun ŋɩbunyulo.

⁹ na nyi gweiceijɩno, ɽoṯeḏɩl nalajiḏəḏə; bunyil nyalabuje, piḏɩl nalajiḏijo;

¹⁰ gi gwune gwun gwaṯɩɽoṯeḏe ŋwulape, na gwun gwaṯɩbunyi ŋwulbuje, na gwun gwaṯɩpi gibia gwaliḏijo.

¹¹ na əḏi gwiro gwon lagalo gwiro baba, na ḏa ŋaɽe ŋuŋun ŋɩmaɽoṯeḏe gia ŋuḏəḏə gɩḏolia? i ŋɩmaɽoṯeḏe lumi ŋwuḏəḏə ḏuŋɩnyaŋe gi gwune ŋuŋunḏəḏə lumi a?

¹² i ḏa ŋɩmaɽoṯeḏe loiny ŋwuḏəḏə ḏimu a?

¹³ na dino nyaŋa lun lɩki na ḏa lɩmalɩŋe nyaləḏəḏə nyaɽe nyalo ŋɩdio ŋun ŋiŋir, namɩni ŋiro ŋaḏa ŋutəno baba gweḏi kanyin lulḏəḏə lun liɽoṯeḏo lugwun gwuɽɩwə gwun gwɩpiḏo pɽul?

yecu wɩrli ŋuɽuna ga ŋan ḏapa ŋɩru ḏigeleja uwə seiṯan gwe

¹⁴ nudi ḏiŋeroma ḏun ḏate ḏaṯumə no. na gwune nudi ḏiŋeroma nuumə gwun gwate gwaṯumə no, na liji obaga ṯuṯ.

¹⁵ na kworo lagin nalarno, ŋu gwaṯɩḏi ḏiŋeroma bilsibul gwe gwun gwiro gwele gweḏi ḏiŋerom.

¹⁶ na liro kaja nalɽoṯeḏe lugwun dəŋinio ḏeḏi kanyin gwiḏeijɩlo.

¹⁷ namɩni ŋu nulɩŋe ḏuməḏɩno ḏagin nuleicɩno, ŋele wei ŋun ŋɩkenyɩḏiḏi ganu ŋake, na liji leḏi dunu lun likenyɩḏiḏi ganu laṯe ləṯijaḏaɽa no.

¹⁸ na ḏa seiṯan makenyɩḏini ganu, namɩni galakwe ŋele ŋuŋun ŋajaḏaṯa? gi gwune nyalaṯarno nyi gwaṯɩdi ḏiŋeroma bilsibul gwe.

¹⁹ na ḏa nyi maṯɩdi ḏiŋeroma bilsibul gwe, namɩni nyaɽe nyalo nyəḏi əḏi gwe? na ŋiro dino luŋa laro jaḏi jalo.

²⁰ namɩni ḏa nyi maṯɩdi ḏiŋeroma lamon le leḏi elo, na ŋele ŋeḏi elo ŋɩmila lagalo gwerkwe.

²¹ na ḏa gwiji gwun gwubɩɽe nanu gwun gwəṯi ŋɩdio ŋe ḏɩrra madɩme duno gwuŋun, ŋɩdi ŋuŋun ŋajaḏaṯa ldu;

²² namɩni ḏa gwiji mila gwun gwubɩɽeno nanu lugwun gwalgwurre na gwuḏamane ganu gwaɽe ŋɩdio ŋuŋun wei ŋe ḏɩrra ŋun ŋaṯunŋele ḏugwor, na gwakenya ŋɩdio ganu ŋun ŋapulo.

²³ gwun gwate gwijanagwe no, gwɩkiḏiḏianagwe, na gwun gwate gwaṯanagwiwəɽeice ldu no, ŋwulwɩreiji elo.

ḏuwɩrla ga ŋuɽun ŋun ŋɩki ḏun ḏate ḏiṯɩminu no

²⁴ na gwune na ḏiŋerom du kwiji ganu, nuwewele kalo ŋun ŋate gəṯi ŋau no, nubunyi ḏijaga. na ḏa ŋate gimubuje no, gwarno, nyi gwaɽuwe dunu gwi gwun gwuduḏɩne ganu.

²⁵ nuwila nubuje muḏinu ganu gwijiga muma.

²⁶ nuwele gwapa ḏiŋeroma kwoɽoṯəɽɩl diro kaja dikeno lugwun, naəḏi nalijiga ŋɩnəwei, na ŋakene kwiji kworo gweḏi uro gwerre.

²⁷ na gi gwune ju gi ḏuməḏo dino na gwa gwete əri gwula gi liji nueicɩno, ḏiŋiriḏa ḏaje kare gun gigwuliaŋage na gi jiḏu jun jiɽane.

²⁸ namɩni ŋu nuarno, i namɩni ḏɩmoreḏa ḏaje gi liji lun laṯɩdiŋɩni ŋuɽuna ŋeḏi elo nalɩdɩme.

dɩminu ga ŋuɽun ŋeḏi bunya ḏəŋinio

²⁹ na gi gwune aɽuwaḏo liji ldu lutu nuarno, liji leḏi gwunne lɩki, naṯɩlɽoṯeḏe laŋu ḏəŋinio nate nalinḏəḏə no namɩni ḏəŋinio ḏeḏi yunan gwun gwiro nebi.

³⁰ gi gwune na yunan gwiro ḏəŋinio gi liji leḏi ninuwa, na dino ŋaɽe ŋeḏi liji ŋaje ŋəŋini gi liji leḏi gwunne.

³¹ gwele gweḏi gelio gwe gwun gwiro gwa gweḏiɽɩ gi lamon le ḏakɩmiḏa ləmɩnyo le leḏi gwunne nulakɩmi, gi gwune gwuwiḏi kalo gwola ganu geḏi gɩḏilio gwadiŋɩni ḏilɩŋeḏa ḏeḏi suliman; na eʼe gwete gwo ŋɩne gwubuṯano gworki ḏi suliman.

³² ləmɩnyo leḏi ninuwa lədiɽi gi ḏakɩmiḏa leḏi gwunne nalakɩmiḏe, gi gwune liwɩrla ga ŋuɽun ŋun ŋɩki ḏuməḏɩjo ḏe ḏeḏi yunan; na eʼe gwete gwo ŋɩne gwubuṯano gworki ḏi yunan.

ḏalɩmia ḏeḏi lambə

³³ gwiji gwate gwete gwun gwoudeije lambə nugele kalo gun gilɩbo no, namɩni kalo ge ḏoɽeḏa ga, kani a liji lun ləḏi alaŋaḏa bure.

³⁴ lambə leḏi aŋɩnu liro gei. na kaja gun gagi gei guŋa giŋir, aŋɩnu yuŋa wei enyeḏe bure gwe; namɩni ḏa ŋɩmake namɩni aŋɩnu yuŋa enyeḏe girɩm ganu.

³⁵ aŋəḏi bure gwun gwijo lugwuŋa gwo gwaro girɩm.

³⁶ na ḏa aŋɩnu yuŋa wei yimaro bure, ŋate yəṯi gala ŋun ŋiro girɩm no, yaro bure wei, gi gwune bure gweḏi lambə gwaŋoɽəḏɩjo galo.

yecu gwumapi lɩbarɩsi na jalgaṯɩm ḏare

³⁷ na gwune nuumə na gwubarɩsi uməḏɩjo nuarno gwalgweʼe. nuəḏi nujiga.

³⁸ na gwubarɩsi gwune nuaŋu dino nuobaga ṯuṯ, gi gwune gwate gwuwei di gwerre gwate manʼe no gi gwune aṯɩliwone dagin no.

³⁹ na gwele gwun gwiro elo eicɩno, nyaŋa lun liro lɩbarɩsi nyalaṯɩwei ḏoɽena na kɩɽudo gi ḏuɽo, namɩni gidəno nyalenyeḏo ŋwuɽama ganu na ŋuɽun ŋun ŋɩki.

⁴⁰ nyaŋa lun liro jɩɽilo, ŋu gwədu gwun gwugelo kɩluḏoŋ gwugelo gidənoŋ dino na?

⁴¹ namɩni nyalḏəḏə lun late ləṯi ŋɩdio no ŋeḏi gidəno, na ŋɩdi wei ŋajiŋiriḏɩjo.

⁴² namɩni ŋɩki lagalo nyaŋa lun liro lɩbarɩsi, gi gwune laṯanyalḏəḏə eloŋu gani gete geḏi luco i gwijido kworo gwun gwiro di, na nəni nun niro kajakaja, nanyadara ŋuɽuna ŋun ŋɩḏuḏɩnu ga na ḏəmɩnyo ḏeḏi elo. arram nyalduji ŋeno, na nya late nyalouwɩrico ŋəwei no.

⁴³ ŋɩki lagalo nyaŋa lun liro lɩbarɩsi, gi gwune nyalaṯəmɩnyi gɩḏoɽ gi lɩdunu leḏi elo ŋun ŋiro lɽa, na ḏɩmɩɽəḏo gi cu.

⁴⁴ ŋɩki lagalo, gi gwune nyalro gi nil nun nate naŋino no, na lun lɩwiḏinelo nate nalilɩŋe no.

⁴⁵ na gwete gweḏi lɩmualɩm leḏi ŋuɽun ŋun ŋigelijɩlo elo musaŋ nuwɩrlijo ŋuɽuna nueicɩno, mualɩm gwəri, ŋuɽun ŋun ŋɩməḏəlo ga gwiḏenije anaŋa dino.

⁴⁶ nuleicɩno, ŋɩki lagalo dino nyaŋa lun liro lɩmualɩm leḏi ŋuɽun ŋun ŋigelijɩlo elo musaŋ, gi gwune nyalaṯapi liji dube dɩki na nyaŋa, nya late laṯɩnḏɩmumi dube lamon le lalo letɩdo no.

⁴⁷ ŋɩki lagalo, gi gwune nyadɩme gala nil neḏi nebɩŋa na lɩmal lɩgwumɩnyo lalo ɽinye.

⁴⁸ na dino nyalteije ga nyaləmɩnyi ŋɩru geḏi lɩgwumɩnyo lalo, gi gwune luŋa lijinyɩḏilo, na nyadɩme gala geḏi nil nagin.

⁴⁹ na ŋiro dino na ḏilɩŋeḏena ḏeḏi elo ḏarno, nyi lɩwəḏɩjilo nebɩŋaije na duwəjo nalalijinye kworo lalɩnḏagɩɽini,

⁵⁰ kani ŋwuɽoṯeḏe gi liji leḏi gwunne ŋuwən ŋeḏi nebɩŋa wei ŋun ŋirəḏi ga uro kaja gun gigelɩlge gɩḏilio,

⁵¹ uro ŋuwən ŋeḏi abil kəbe ŋuwən geḏi sakaria gun gwaiyo kɩligi ganu geḏi lobo na dunu ŋweḏi elo gwun gwubuḏo. i, nyi gweiceijɩno, ŋaɽoṯeḏini gi liji leḏi gwunne.

⁵² ŋɩki lagalo, nyaŋa lun liro lɩmualɩm leḏi ŋuɽun ŋun ŋigelijɩlo elo musaŋ, gi gwune nyalmape mubɩa gwe ḏilɩŋeḏa; nyaŋa gi lulo lalo nya late lɩməḏi no, nanyalakajo lun lar ləḏi.

⁵³ na gi gwune duḏu ŋɩnəwei, na jalgaṯɩm na lɩbarɩsi nalɩkiḏiḏi gworki naliḏeije gwuluməḏɩjo ŋuɽuna gwan ŋɩdi ŋutu;

⁵⁴ nalgwujane nalbunyi ləḏiŋɩni ŋuɽuna ŋədi gi linyu luŋun ŋaliŋicɩgi.