lɩbrani 9 - ŋuɽun ŋun ŋiya ŋun ŋikaiilo elo 1966

asa 9 galo ge ḏorṯeḏa gun guɽun giro sura jeḏi gworo gwun gwiya

¹ na ŋuɽun ŋun ŋɩkaiilo ŋeḏi gwerre ŋəṯi ŋuɽuna ŋeḏi ŋɩru na ŋeḏi ŋalo ŋun gaṯɩn liji orṯeḏa eloŋu geḏi gɩḏilio.

² gi gwune gwumakade gibar na galo gijo gun giro gɩdo gun gaṯɩleico gɩpiḏo pɽul, gəṯi gwaŋ gwun gwuməṯəḏi lambə, na ṯarabesa, na gia gun gaṯɩlgegɩle;

³ na gi ḏuɽo ganu gɩria gun guɽəḏi gala ganu kɩlɩgi ganu, galo gijo gun gaṯɩleico galo gun gɩpiḏano pɽul.

⁴ galo keno gəṯi gwaŋ gwun gwukəḏɩnu ḏab ḏe gwaṯinŋele ŋɩlun, na sanduk jeḏi ŋuɽun ŋun ŋɩkaiilo eloŋa liji le luŋun jun jijo ḏab nanu wutiwuti, jun jəṯi lɩbi lɩkədɩnu ḏab ḏe lun ləṯi gia gun gan manna, na ḏaparra ḏeḏi arun ḏun ḏɩbɩnano jaɽe nanu, na nyɩdol nyun nyulinu ŋuɽuna ŋun ŋɩkaiilo.

⁵ na gi sanduk elo laŋ lijo le ḏoɽeḏa ga lun ləṯi nɩbu niriḏo ŋwuɽa ŋwe kalo ge ḏouwɩɽiḏa; na gwunne nyi gwate gwəṯi ŋɩma gwajaŋijo ŋuɽuna ŋeḏi ŋɩdi ŋeno ŋete ŋete no.

⁶ na gwune na ŋɩdi ŋeno ŋɩgelɩnu dino, na jɩsis jaṯəḏi kalo ŋun ŋiro gɩdo bubruṯ naṯɩlape ŋɩru.

⁷ namɩni kalo gun gijo gi ḏuɽo ganu na gwele gweḏi jɩsis gwiro gwetɩdo gwaṯəḏi lamtɩdo jɩḏilio wei ŋuwən ŋe ŋate no, ŋulgele ŋan ŋu na ŋan ŋuɽun ŋun ŋɩki ŋeḏi liji ŋun ŋiro ŋɩɽilo.

⁸ na ŋaŋijilo gwuɽɩwə gwun gwɩpiḏo pɽul dino, ṯaṯ ḏe ḏəḏio kalo gun gipiḏano pɽul ḏore ḏate ḏɩmaŋini no, gi gwune ŋalo ŋun gijo gɩdo gwore.

⁹ na galo keno ŋiro sura jeḏi gaja keno. ḏidəḏo ḏijo ḏeḏi ga dino na ḏiḏuga ḏun ḏate ḏəṯi ŋɩma ḏagele ḏugwor ḏeḏi gwiji muma gwun gwapo ŋɩru ŋeno no,

¹⁰ na galo keno gaṯəṯi ŋuɽuna ŋe ḏiṯa na ḏiyo na ḏuweia ḏutu ḏun ḏiro kajakaja, na ŋuɽun ŋeḏi aŋɩnu mino, ŋɩgelijujɩlo kəbe gaja wila ge ḏigela ŋuɽuna muma.

ŋɩma ŋeḏi ŋɩpiḏo pɽul ŋe ḏiḏugɩno ḏeḏi kɩrisṯo

¹¹ namɩni kɩrisṯo mila gwiro gwele gweḏi jɩsis gweḏi ḏiŋiriḏa ḏun ḏar ḏila, ŋu məḏi kalo gun gɩbuṯano na ŋun ŋiro muma ŋun ŋate gikədɩnu di de no, na gədu geḏi gɩḏilio keno no;

¹² ŋuwən ŋədu ŋe ŋeḏi nyo na nyidri nyun nyoga no, namɩni ŋuwən ŋe ŋeḏi aŋɩnu yuŋun gwuməḏi lamtɩdo kalo gun gɩpiḏano pɽul gwumabuje numəṯo ḏɩkədəḏɩnə ga gi gɩḏilio.

¹³ gi gwune ḏa ḏauca ŋuwən ŋe ŋeḏi nyidri na nyo, na jaro je jeḏi galajal gapiḏi liji pɽul lun lɩki kalo geḏi jiŋɩno,

¹⁴ namɩni ŋiro gada ŋutəno ŋuwən ŋeḏi kɩrisṯo, gwun gwugelijo eloŋu gwula gwuŋun gwate gwətɩn ŋuɽuna ŋədi ŋun ŋɩki no, gwuɽɩwə gwe gwun gwɩpiḏo pɽul gweḏi uro gwerre kəbe gi gɩḏilio, ŋawei dugwor dalo ŋɩru ŋun ŋaiyo kani nyapijo eloŋu ŋɩru gwun gwumiḏo?

¹⁵ na kalo geḏi ŋuɽun ŋeno, ŋu gwiro gɩlɩgi geḏi ŋuɽun ŋun ŋiya ŋun ŋɩkaiilo elo ḏaiya ḏe ḏe ḏɩkədəḏɩnə ga ŋuɽun ŋun ŋɩki ŋun ŋijo ŋuɽun ŋun ŋɩkaiilo elo gwerre, kani luŋa lun lorniḏɩnu nalɽenyeḏe ŋuɽun ŋun ŋarɩŋe elo no ŋulilḏəḏə gi gɩḏilio.

¹⁶ na ḏa ŋuɽun ŋɩmaje ŋun ŋarɩŋe gwiji ŋan ḏɩbona ḏuŋun gwune gwijɩre gwumiḏo, na dino arram ḏəŋinio ḏijo ḏe ḏaiya ḏeḏi gwiji kweno gwerre ŋuɽun ŋeno ŋəṯi jei ganu;

¹⁷ gi gwune ŋuɽun ŋeno ŋɩməṯɩno ga gwune nuai, namɩni ŋate ŋəṯi ŋɩma ḏa majɩre miḏo no.

¹⁸ na dino ŋuɽun ŋun ŋɩkaiilo elo ŋeḏi gwerre ŋate ŋɩgelɩnu ŋuwən ŋe ŋate no.

¹⁹ gwune na musa uməḏɩjo liji wei ŋuɽuna wei ŋun ŋigelijɩlo elo nuape ŋuwəno ŋeḏi nyidri nyun nyoga na ŋeḏi nyo ŋau ŋe, na jola na kwui gwun gwure, na gwuḏɩrən, nuauce gɩḏam nanu na liji wei ḏɩno,

²⁰ nuarno, ŋuwən ŋiro ŋeno ŋeḏi ŋuɽun ŋun ŋɩkaiilo ŋun ŋumədɩjajɩŋe elo.

²¹ na dino nuauce gibar ŋuwən ŋe na ŋɩdi wei ŋeḏi ŋɩru dino.

²² na ŋɩdi wei ca ŋapiḏe pɽul kalo geḏi ŋuɽun ŋun ŋigelijɩlo elo musaŋ ŋuwən ŋe; namɩni ḏa ŋuwən ŋate ŋɩmagireṯeḏe ga no, na ḏəbɩrio ŋuɽuna ŋun ŋɩki ḏate.

ḏiḏugɩno ḏeḏi kɩrisṯo ḏate ḏəṯɩne gworo gwiro dino no

²³ na arram ŋiro dino na ŋɩdi ŋeno ŋun ŋɩkədɩnu ŋiro gi gworo gweḏi kanyin ŋapiḏe pɽul ŋuɽun ŋe ŋeno, namɩni ŋɩdi ŋeḏi kanyin ŋapiḏe pɽul ḏiḏuga ḏe ḏiŋirano ŋuɽun ŋeno.

²⁴ gi gwune kɩrisṯo gwate gwuməḏi kalo gun gɩpiḏo pɽul gikədinu di de no, gun gate gaŋinu gwerkwe no, numɩni əḏi kanyinŋu kani ŋwaŋini gwunne gi jei ganu gedi elo gwan liŋə.

²⁵ namɩni gwate gwaḏəḏə gwula gwuŋun daiya ŋwamon ŋwutu no, gi gwune naṯi gwele əḏi gweḏi jɩsis kalo gun glɩpiḏo pɽul jɩḏilio wei ŋuwən ŋe ŋədu ŋuŋun no.

²⁶ ḏa ŋu maro dino ŋu gwiḏe ŋwamon ŋwutu uro kili gelɩnu gɩḏilio. namɩni gwunnɩno ŋu gwimaŋɩno lamtɩdo ŋɩno gɩdo ganu kɩḏilio nuəbɩri ŋuɽuna ŋun ŋɩki ḏiḏugɩno ḏe ḏuŋun.

²⁷ na gi gwune magelijo liji ḏaiya lamtɩdo, na gɩdo ḏakɩmiḏa ḏaje,

²⁸ na dino kɩrisṯo maḏugɩni lamtɩdo kani nuape ŋuɽuna ŋun ŋɩki geḏi liji lutu, na ŋu gwaŋino mɩna gi liji lun lɩḏuḏɩnɩjo, gwate gwan ŋuɽun ŋun ŋɩki no, namɩni lulkədə ga.