lɩbrani 8 - ŋuɽun ŋun ŋiya ŋun ŋikaiilo elo 1966

asa 8 ŋɩru ŋeḏi gɩsis ŋeḏi kɩrisṯo na ŋuɽun ŋun ŋɩya ŋun ŋɩkaiilo elo

¹ na ŋuɽun ŋun ŋiro lɽa gi loro ŋun ŋarɩlŋe dino: iləṯi gwelɩnya gweḏi jɩsis gwun gwaṯijiga gi ḏi ḏun ḏiro ḏiŋir ḏeḏi elo kanyin,

² gwun gwaṯape ŋɩru kalo gun gɩpiḏo pɽul, na kibar gun giro gwerkwe, gwugelo gwele ga gwun gwiro elo, gwiji gwate gwiro no.

³ na lele leḏi jɩsis wei lɩməṯɩnu lagele ŋɩdio ga dino na ḏiḏuga; na ŋiro dino arram gɩsis keno gəṯi ŋɩdio ŋulgele dino.

⁴ na ḏa ŋu gwijo kɩḏilio gwate gwaŋar gɩsis no, gi gwune jɩsis jo jun jaṯɩgele ŋɩdio ga dino ŋuɽun ŋe ŋun ŋigelijɩlo elo musaŋ.

⁵ namɩni ceno jaṯape ŋɩru gi sura na gɩdidɩŋil geḏi ŋɩdi ŋeḏi kanyin, gwiro gi musa gwune nuje gɩṯo gwar gwagele gibar geḏi elo, na elo arno, gelɩn gei muma ŋalarre wei muma gi gwune aŋajaŋalo gi lɩrgwom elo.

⁶ namɩni gwunnɩno yecu gwumaməṯo ŋɩru ŋun ŋiŋirano gworki, gwiro gɩlɩgi geḏi ŋuɽun ŋun ŋɩkaiilo ŋun ŋiŋirano dino, ŋun ŋɩmaṯaḏo ga ŋuɽun elo ŋun ŋarɩŋe elo no ŋun ŋiŋirano.

⁷ na ḏa ŋuɽun ŋun ŋɩkaiilo ŋeḏi gwerre ŋenyeḏo ŋate ŋaŋal elo bunyi ŋede no.

⁸ nulbuje ŋun ŋɩki lagin nuarno, eʼe, ŋwamon ŋwila nyi gwaduji ŋuɽuna ŋun ŋiya ŋun ŋɩkaiilo liji le leḏi isreiyil na liji leḏi yauḏa, gwele gwar dino gwun gwiro elo;

⁹ ŋate ŋiro gi ŋun ŋɩkaiilo lɩgwumon lagin le lamon lun lɩməṯɩlle ḏi ḏe nilgwuloḏa kamɩrɩgen yeḏi masɩr no; gi gwune late lijiga nyoŋon ŋuɽun ŋun ŋɩkaianalile no, niniŋeləḏəṯɩni ganu, gwele gwar dino gwun gwiro elo.

¹⁰ na gwele gwar dino, na ŋeno ŋiro ŋuɽun ŋun ŋɩkaianalo liji le leḏi isreiyil gwune na ŋwamon ŋwono ete; nyi gwagele ŋuɽuna ŋinyi ŋadɩgɩɽe ŋagin, ŋiluli gi dugwor ganu dagin; na nyi gwaro elo gwagin na laro liji linyi.

¹¹ na luŋa gwete gwete late laṯɩlalɩmi lun lijaḏɩle ga na lɩmegin no naleicɩno, lɩŋiḏɩl gwelɩnya gwun gwiro elo, gi gwune luŋa wei gwallɩŋe gi gwune loga kəbe na liro luɽun.

¹² nyi gwiro gwɩno ḏɩkeḏa ḏagin ḏeḏi ŋuɽun ŋun ŋɩḏuḏɩnu ga, na nyi gwate gwanaḏɩŋane ŋuɽuna ŋagin ŋun ŋɩki ḏuṯ no.

¹³ na gi gwune arune ŋan ŋuɽun ŋun ŋiya ŋun ŋɩkaiilo nulduji ŋeḏi gwerre ŋuɽun. na gwaŋ gwatɩn gwete gwəṯi ŋɩru no gwuɽun gwo gɩṯo gwete.