lɩbrani 7 - ŋuɽun ŋun ŋiya ŋun ŋikaiilo elo 1966

asa 7 yecu gwun gwiro gɩsis gun gɩbuḏo gwiro gi malikisadak

¹ na malikisadak kweno gwiro gwele gweḏi salim na gɩsis geḏi elo gwun gwolenelo, nalobeḏe ibraim gwe gwune nuaɽuwa maḏama lelɩnya numora.

² na ibraim ḏəḏə ŋɩdio nanu ŋete ŋete gi loro lun liro di wei. na jiri juŋun jan gwele gweḏi ŋuɽun ŋun ŋiŋir gwerre, na gɩdo jan gwele gweḏi salim dino jiri ceno jarno gwele gweḏi ḏouwɩɽiḏa.

³ ŋu gwate gwəṯi babaŋ na nana no, gwate gwəṯɩn əriḏo no, gwate gwilɩŋinu no na gwate gwanai no, namɩni gwuranaḏɩlo ŋaɽe ŋe ŋeḏi elo, gwajaḏaṯa gwiro gɩsis gi gɩḏilio.

⁴ iril jei ga gi ḏɩbuḏia ḏeḏi gwiji kweno muma. ibraim gwun gwiro gwurninyo miḏəḏə ŋɩdio nanu ŋete ŋete gi loro lun liro di ŋe ḏɩrra ŋun ŋiro ŋwuɽa.

⁵ na nyate nyeḏi lawi nyun nyɩməṯɩnu ŋɩru ŋeḏi jɩsis ŋuɽun ŋe ŋun ŋigelijɩlo musaŋ nyape ŋɩdio gi liji ŋete gi loro lun liro di, na luŋa liro ŋɩmaga, nalro nyaɽe nyeḏi ibraim dino;

⁶ na gwiji kweno gwun gwate gwuduḏi lagin no, məṯi ŋɩdio ŋete gi loro lun liro di ḏi ibraim, numora gwun gwəṯi ŋuɽuna ŋun ŋuməḏɩjɩlo elo ŋar ŋulḏəḏə.

⁷ na ŋuɽun ŋeno ŋilɩŋiḏɩlo liji, gwiji gwun gwɩtieno gwaṯɩmərəḏɩni gworo gwe gwun gwubuṯano.

⁸ na ŋuɽun ŋeno ŋarno liji lun laje lai laṯape ŋɩdio ŋete gi loro lun liro di, na ŋuɽun ŋono ŋarno ŋɩdi ŋete gi loro lun liro di ŋaṯapini kwiji gwete, gwun gwəri gwe no ŋu gwumiḏo.

⁹ gwəṯi gwiji gwanarno, lawiŋu dino gwun gwaṯape ŋɩdio ŋete gi loro lun liro di, ḏəḏi ŋɩdio ŋete gi loro lun liro di ibraim gwe;

¹⁰ gi gwune ŋu gwore kaŋɩnu yeḏi gwurnən kaja gun gɩmalgwobeḏe malikisadak gwe.

ŋɩru ŋeḏi gɩsis ŋeḏi kɩrisṯo ŋiŋirano gworki ŋɩru ŋeḏi jɩsis jeḏi liju

¹¹ na dino liji lɩmape ŋuɽuna ŋun ŋigelijɩlo elo musaŋ ŋuɽun ŋeḏi jɩsis junjiro lilawi. na ḏa ŋuɽun ŋeḏi jɩsis ŋṯɩɩmi liji muma arram gwudaro gəko na gɩsis ŋun ŋiro kaja diɽi ŋuɽun ŋe ŋeḏi malikisadak, ŋate giməmɩḏe ŋuɽun ŋe ŋeḏi arun no?

¹² na ḏa ŋuɽun ŋeḏi jɩsis ŋɩmalɩbi ganu arram ŋuɽun ŋun ŋigelijɩlo elo musaŋ ŋəbini ganu dino.

¹³ na ŋu gwun gwarɩlgwe dino gwiro əriḏo kaja, na gwete kəriḏ yeno gwate gwanape ŋɩru kalo geḏi lobo no.

¹⁴ na ŋilɩŋeno gwele gwage gwun gwiro elo gwuduḏi kəriḏ yeḏi yauḏa; na musa gwate gwanumə ŋuɽuna ŋədi ŋan jɩsis jeḏi əriḏ yeno no.

¹⁵ na ŋuɽun ŋaŋino ŋutəno gwune na gɩsis gun giro kaja giro gi malikisadak madiɽo,

¹⁶ gun gate manduji gɩsis ŋuɽun ŋe ŋeḏi əriḏ no, namɩni ŋɩma ŋe ḏɩmiḏa ḏun ḏate ḏete no.

¹⁷ gi gwune uməḏɩnɩlo ŋan ŋu, ŋa gwiro gɩsis gi gɩḏilio ŋuɽun ŋe ŋeḏi malikisadak.

¹⁸ na dino ŋuɽun ŋeḏi gwerre ŋɩmagelini kaja gi gwune ŋɩrebɩna ŋate ŋəṯi jei ganu no,

¹⁹ gi gwune ŋuɽun ŋun ŋigelijɩlo elo musaŋ ŋate ŋɩmanṯɩmi ŋɩdio ŋədi no, namɩni ŋɩmaɽenyeḏe ḏiḏudɩnɩjo ḏun ḏiŋirano, na ḏiḏuḏɩnɩjo ḏe ṯeno liŋə ilmadɩka ḏi elo.

²⁰ na ŋuɽun ŋeno ŋate ŋɩmila ḏərɩmiə ḏate no.

²¹ liji lun lɩməṯɩnu jɩsis gwerre nalro jɩsis ḏərɩmiə ḏate no, namɩni gəwei maro gɩsis ḏərɩmiə ḏe ḏeḏi gwun gweicɩno, gwele gwun gwiro elo mərɩmi gwate manbi ŋuɽuna ŋuŋun ganu no, ŋa gwiro gɩsis gi gɩḏilio.

²² na ŋiro dino yecu gwiro gwuməṯi ŋuɽuna ŋun ŋɩkaiilo ŋun ŋiŋirano.

²³ na dino gwerre jɩsis jutu nal ḏaiya donye naljaḏaṯa nyoŋon;

²⁴ namɩni ŋu gwajaḏaṯa gi gɩḏilio gwəṯi ŋɩru ŋeḏi gɩsis ŋun ŋate ŋani gwiji ɽenyeḏe no.

²⁵ na ŋiro dino ŋu gwəṯi ŋɩma lulkədə ga wɽi gi gɩḏilio lun lidɩkəḏi ḏi elo ŋu gwe, gi gwune ŋu gwumiḏo gi gɩḏilio kani aṯuɽoṯəḏɩjo eloŋu gwan luŋa.

²⁶ na gwele gweḏi jɩsis gwun gwiro dino gwiŋir lage: gwupiḏo pɽul, gwate gwəṯi ḏare no, gwate gwɩki ḏuṯ no, gwijo kaja gi liji lun lɩki, na gwobɩḏəṯɩni elo uro kanyin.

²⁷ ŋu gwate gwəṯi ŋuɽuna gwaɽe ŋɩdio ŋe ḏiḏuga bubruṯ gwerre gwan ŋuɽun ŋuŋun ŋun ŋɩki no, na gɩdo gwan ŋuɽun ŋun ŋɩki ŋeḏi liji, ŋiro gi lele leḏi jɩsis cono; na ŋu ŋarrulo lamtɩdo gwune ḏəḏu gwula gwuŋun.

²⁸ na ŋuɽun ŋun ŋigelijɩlo elo musaŋ ŋɩmaməṯo ləmɩnyəŋe lun lɩmumɩḏo alro lele leḏi jɩsis, namɩni ŋuɽun ŋe ḏərɩmiə ŋuməḏɩlo kɩɽelo ŋuɽun ŋun ŋigelijɩlo elo musaŋ, ŋɩmaməṯo ŋaɽe ŋeḏi elo ŋun ŋiro muma gi gɩḏilio.