lɩbrani 6 - ŋuɽun ŋun ŋiya ŋun ŋikaiilo elo 1966

asa 6

¹ na ŋiro dino ilouwɩrice ḏalɩmia ḏeḏi kɩrisṯo ḏun ḏiro gwerre ilweleḏeṯa kɩɽelo iləṯɩməje. ilo lagele mɩna gama ge ḏuwɩrla ga ŋɩru ŋun ŋaiyo na ḏɩməṯo ḏi elə,

² na ḏalɩmia ḏe ḏuwona, na ḏigela di ŋwuɽelo, na ḏidiɽo ḏe ḏeḏi liji lun laiyo, na ḏakɩmino ḏeḏi gi gɩḏilio.

³ ilɩnarre ŋeno ḏa elo məmɩnyi.

⁴ ŋate ŋiro dino no, luŋa lun laɽəḏi ga lamtɩdo nalɩŋaico ḏiḏəḏo ḏun ḏɩro ga dino ḏeḏi kanyin, nalro kal gete gwuɽɩwə gwe gwun gwɩpiḏo pɽul,

⁵ nalɩŋaico ŋuɽuna ŋeḏi elo ŋun ŋiŋir, na ŋɩma ŋeḏi gɩḏilio gun gila,

⁶ nalauce ga, nyalduji lawɩrla ga mɩna, gi gwune luŋa liɽinyiḏi ŋaɽe ŋeḏi elo gi luɽi lun lɩmalɩḏo ganu mɩna, lɩdonyo lula lagin, nalabuje elo gi ḏare gi jei ganu jeḏi liji.

⁷ na gwɩnyəm gwun gwiyu ŋau ŋun ŋaṯɩnna lugwun ŋwamon ŋwutu, naṯɩlobɩḏa ŋun ŋiŋir lagin ŋun ŋɩkwuḏɩlo gwan luŋa, na gwɩnyəm kweno ape ḏɩŋiriḏa ḏi elo;

⁸ namɩni ḏa gwɩnyəm mobɩḏa jugi na ŋiɽebeny nalɩdonye nuje gɩṯo gwalḏene, na gɩdo ganu gwɩnyəm kwono igo yiro.

⁹ na anuməḏɩjaje ŋiro dino, namɩni nyaŋa lun ləmmyɩlo, analɩŋe muma ŋɩdio ŋun ŋiŋirano ŋɩduḏi lagalo ŋun ŋɩwiḏi ḏɩkədəḏɩnə ḏe ga.

¹⁰ na elo gwuḏuḏɩnu gwate gwanḏuḏe ganu ŋɩru ŋalo na ŋɩru ŋun ŋɩni ŋalo ŋe ḏəmɩnyo, ŋun ŋaŋijanyalo gwan jiri juŋun no, nanyaləpijo ŋɩru lun lɩpiḏo pɽul na nya lore lanyaləpijo ŋɩru.

¹¹ na anabunyu gworki nyaŋa wei nyalaŋijo ḏibɩɽeḏa nanu ṯeno ḏeḏi ŋɩru ḏun ḏaṯɩbuḏe ḏiḏuḏɩnɩjo ḏalo kəbe ḏenyeḏe kəbe na gɩdo,

¹² kani ate aṯanyapiḏe ŋɩru no, nyalmɩni gwuje lun laṯiɽenyeḏe ŋuɽuna ŋun ŋuməḏɩjilɩlo elo ḏɩməṯo ḏe na ḏɩməṯo dugwore.

ŋuɽun ŋun ŋarɩŋe elo ŋijilḏəḏə ŋijibɩɽi nanu ḏiḏuḏɩnɩjo ḏe

¹³ na gwune na elo uməḏɩjo ibraimŋ ŋuɽuna, nuərɩmi kwulo gwuŋun, gi gwune gwate gwəṯi gwiji gwun gwubuṯano no,

¹⁴ nuarno, gwerkwe nyi gwaŋamora na gwaŋabəḏəṯɩjo;

¹⁵ na dino ibraim ŋɩno nueṯeḏa ḏɩməṯo ḏe ḏugwore, nuape ŋuɽuna ŋun ŋuməḏɩjɩlo elo.

¹⁶ na liji laṯərɩmi gwiji gwe gwun gwubuṯano lagin, na ḏərɩmiə ḏiro ḏəŋinio lagin ḏeṯɩmi ḏɩbereḏa wei.

¹⁷ na ŋiro dino elo gwubunyano lulaŋijo lun laɽenyeḏe ŋuɽun ŋun ŋuməḏɩjɩlo ŋate ŋanlɩbini ganu no, namɩni ŋɩməṯulo ḏərɩmiə ḏe,

¹⁸ na dino ŋuɽun ŋɩttən ŋun ŋate ŋanbini ganu no, ŋate ŋiro dino no elo gwate gwiro wɩɽɩgal no, liŋə lun lɩmabɩre limele gi ḏijaga, iləṯi ḏɩmoɽa ganu ḏun ḏibɩɽe nanu ilɩməṯo ḏiḏuḏɩnɩjo ḏun ḏijo kɩɽelo lage.

¹⁹ gwiro gi gwune gwaŋ gwun gwɩni bucu ŋau ganu gwun gwaṯɩḏuḏɩni murkab, iləṯi ḏiḏuḏɩnɩjo ṯeno ḏun ḏaṯɩməṯo dugwor dage muma, ḏun ḏɩməḏi kiria ganu gun guwɩɽəḏi gala ganu gɩttən naləḏi gɩdo gwe,

²⁰ na yecu dare gwerre lage nuəḏi kɩɽelo kalo keno gwan liŋə. na ŋu maro gwele gweḏi jɩsis gi gɩḏilio ŋuɽun ŋe ŋeḏi malikisadak.