lɩbrani 5 - ŋuɽun ŋun ŋiya ŋun ŋikaiilo elo 1966

asa 5

¹ na lele wei leḏi jɩsis lɩməṯɩnu gi liji nalɩduji jɩsis nalape ŋɩru ŋeḏi elo gwan liji, nalɩḏəḏə ŋɩdio ga dino na ŋɩdi ŋe ḏiḏuga ŋuɽun ŋun ŋɩki.

² luŋa ləṯi ŋɩma lalakɩmi ŋino ŋe lun liro jɩɽilo na lun laṯɩligwuloḏa kaja, gi gwune luŋa gi lulo lagin luɽeicɩlo ḏɩmumɩḏa ga;

³ na ŋiro dino arram lalɩḏəḏə ḏiḏuga ŋuɽun ŋun ŋɩki gwan lulo lagin gi gwune aṯɩlɩnḏəḏə gwan liji.

⁴ na dino gwete gwate gwanməṯo ḏinəjio ṯeno kaja ŋuŋun no, namɩni gwuməṯɩnu ḏi elo gi arun.

⁵ na dino kɩrisṯo gwate gwaṯɩbuḏi gwula gwuŋun gwaro gwele gweḏi jɩsis no; namɩni ŋu gwuməṯɩnu ŋu gwe gwun gweicɩno, ŋa gwiro ŋaɽe ŋinyi, gwunanyine nyi maŋalɩŋe.

⁶ na ŋu gwar dino kalo giro kaja no, ŋa gwiro gɩsis gi gɩḏilio ŋuɽun ŋe ŋeḏi malikisadak.

⁷ gwune ji yecu gwiro aŋɩnu, nuuməḏɩjo gwun gwəṯi ŋɩma gwəkədə ga gi ḏaiya ḏiɽoṯeḏa ḏe ŋun ŋɩbunyulo gwulo gwe gworki na ŋwal ŋwe, na elo diŋɩni gwan ḏiḏonyɩḏa eloŋu ḏuŋun.

⁸ na ŋu gwiro ŋaɽe, numɩni alɩmini ḏoṯeijo ḏe gəni ḏɩḏia ḏe;

⁹ gi gwune na gwəṯɩminu, ŋu maro gwun mapa ḏɩkədəḏɩnə ga gi gɩḏilio gi liji wei lun ləṯeijo nəni;

¹⁰ nuornɩḏini elo gwe gwele gweḏi jɩsis ŋuɽun ŋe ŋeḏi malikisadak.

arram lɩkɩrisṯin ladarka kiɽelo gi ṯaṯ ḏeḏi elo

¹¹ anəṯi ŋuɽuna ŋutu ŋan ŋuɽun ŋeno ŋun ŋɩbɩɽe lagəri gi analumə gi gwune nyalmarimi gi nəni gi nyalaḏiŋɩni.

¹² na nyalmadiŋɩni kaja gwola ganu, ŋiŋirano nyalaro lɩmualɩm, namɩni nya lore libunyu gwete gwajalimi ŋuɽuna ŋeḏi gwerre ŋeḏi elo. nyalo gi luŋa lun libunyu ŋan na late libunyu gia gun gɩbɩɽe no.

¹³ namɩni wei lun liduji ŋan gia gagin late luɽun ŋuɽun ŋun ŋiŋir no; namɩni loga.

¹⁴ namɩni gia gun gɩbɩɽe gagin giro lun luɽun, lun ləṯi ŋadɩŋɩɽenya ŋɩru ŋe lallɩŋe ŋuɽuna ŋun ŋiŋir na ŋun ŋɩki.