lɩbrani 4 - ŋuɽun ŋun ŋiya ŋun ŋikaiilo elo 1966

asa 4 ḏobiḏa uwə gwe ḏe sabiṯ ḏeḏi elo

¹ na gi gwune ŋuɽun ŋun ŋɩḏəḏijɩlo elo ŋijəḏəṯi gi ḏəḏio gi ḏobɩḏa uwə gwe gwuŋun, ouwɩricil ilḏonye, gwəṯi gwete lagalo nuarno gwate gwaṯɩmi gi ḏəḏio no.

² na ŋuɽun ŋun ŋiŋir ŋeḏi elo ŋuməḏɩjijɩlo na luŋa dino; na ŋuɽun ŋun ŋuməḏɩjijɩlo luŋa ŋate gideleḏo lagin no, gi gwune lun lɩdiŋɩnu ŋate ŋaluɽuḏi ganu ḏɩməṯo ḏe no.

³ na liŋe lun ləmɩnyu iləḏi gi ḏobɩḏa uwə gwe ṯeno, gwiro gi gwune arune, gi gwune ərɩminyi gi ḏɩɽeḏa ganu ḏinyi, luŋa late ləḏi gi ḏobɩḏa uwə gwe ḏinyi no, na ŋɩru ŋuŋun ŋɩṯɩminu kama ga geḏi gɩḏilio.

⁴ na ŋu gwar kalo gete no gwan lamon lun laduji loro kwoɽoṯəɽɩl dino, na elo obe uwə gwe gi lamon lun laduji loro kwoɽoṯəɽɩl ŋɩru ŋuŋun wei.

⁵ na kalo kono dino, luŋa late ləḏi gi ḏobɩḏa uwə gwe ḏinyi no.

⁶ na gi gwune ḏobɩḏa uwə gwe ḏijəḏəṯi naləḏi kworo, na luŋa lun luməḏɩjɩlo gwerre late lɩməḏi no gi gwune laṯakɩra ŋuɽuna duɽo de,

⁷ na ŋu gwugelo mɩna lamon lete nuarno ḏauuḏ gwe, gwunanyine, ŋɩno na gaja gwola ganu gi gwune ərune gwerre, gwunanyine, ḏa nyalmadiŋɩni gwula gwuŋun, aṯanyabɩɽeḏa gi dugwor ganu no.

⁸ na ḏa yasua malḏəḏə ḏobɩḏa uwə gwe, elo gwate gwanumə ŋuɽuna ŋan lamon lede no.

⁹ na ŋiro dino ḏobɩḏa uwə gwe ḏe sabiṯ ḏijəḏəṯi gi liji leḏi elo.

¹⁰ na ŋu gwun gwəḏi gi ḏobɩḏa uwə gwe ḏeḏi elo gwuḏuḏɩnu kalo geḏi ŋɩru ŋuŋun gi gwune elo ŋɩru ŋuŋun.

¹¹ ouwɩricije iliḏeije gworki iləḏi gi ḏobɩḏa uwə gwe ṯeno, gwəṯi gwiji gwete maici ga ŋiro gi ḏakɩraḏa ŋuɽuna duɽo de gi gworo gweḏi liji ləwei.

¹² gi gwune ŋuɽun ŋeḏi elo ŋimiḏo ŋaṯape ŋɩru; na ŋutəno ŋuwio gi cɩwiḏ jun jəṯi ŋuwio ŋwuɽa ganu berene; naṯɩluɽə ganu naṯɩlkenyə ganu kɩlɩgi ganu kwulo na kwuɽɩwə, na ŋwuɽigiḏi ganu na dujo deḏi ŋwuya; naṯɩlakɩmi ḏuməḏɩno ḏeḏi ḏugwor na ŋuɽun ŋun ŋɩbunyɩlo ḏugwor.

¹³ na gwatɩn gwun gwugelɩnu gwanlɩbe gi jei ganu lugwun no, namɩni ŋɩdi wei ŋijiga ŋɩmuɽino na ŋaŋinu gi jei ganu jeḏi ŋu gwun gwəṯɩle ŋuɽuna ŋan lulo lage.

yecu gwun gwiro gwele gweḏi jɩsis gwun gwubuḏo gwiŋirano gworki ḏi arun

¹⁴ na gi gwune iləṯi gwelɩnya gweḏi jɩsis gwun gŋwubuṯano gwuməḏi kanyin, yecu gwun gwiro ŋaɽe ŋeḏi elo, ouwɩricije ilməṯo muma ḏɩteijo ga ḏage.

¹⁵ gi gwune ilate iləṯi gwelɩnya gweḏi jɩsis gwun gwate gwilɩŋiḏi ḏɩmumɩḏa ḏage no; namɩni gwiḏeijinu ŋuɽun wei gi liŋə, namɩni gwate gwapɩne ŋuɽuna ŋun ŋɩki no.

¹⁶ ouwɩricije ilwele gɩṯo ḏibɩɽeḏa ḏe nanu kɩḏoɽ ge ḏiŋiriḏa kani ilape ŋino ilbuje ḏiŋiriḏa ḏijigelejo uwə kaja gun gilgibunyi.