lɩbrani 3 - ŋuɽun ŋun ŋiya ŋun ŋikaiilo elo 1966

asa 3 kɩrisṯo gwiŋirano gworki ḏi musa

¹ na ŋiro dino lɩmagəri lun lɩpiḏo pɽul, dija kal gete ḏorniḏa ḏeḏi kanyin, iril jei galo gwan yecu gwun gwuwəjɩnu gwiro gwele gweḏi jɩsis gwe diteijo ga dage,

² gwun gwiŋir gwuḏuḏɩnu ga lugwun gwun gwumatu gwiro gi musa gwiŋir gwuḏuḏɩnu ga dino wei kwu dunu gweḏi elo.

³ na gu gwuḏuɽəḏɩnu gwɩdeleḏo ḏoɽeḏa ḏe ḏutəno kworo gweḏi musa, gi gwiji gwun gwaṯuṯe duno gwaṯɩlnəjiene kwu dunu.

⁴ na lɩdunu wei laṯɩl liji uṯe, namɩni ŋu gwaṯuṯe ŋɩdio wei ŋiro elo.

⁵ na gwerkwe musa gwiŋir gwuḏuḏɩnu ga wei kwu dunu gweḏi elo gwiro gi gaḏam, kani ŋwaŋiḏi ŋuɽun ŋono ŋun ŋaje ŋuməḏɩni;

⁶ namɩni kɩrisṯo gwiŋir gwuḏuḏɩnu ga kwu dunu gweḏi elo gwiro gi ŋaɽe. na liŋə ilro dunu gwuŋun ḏa ilmaməṯəḏo ḏiḏuḏɩnɩjo ḏage ḏiḏir na ḏiḏɩla ḏe ganu kəbe na ḏiḏuḏɩnɩjo ṯɩmi.

⁷ na ŋiro dino gi gwune ar gwuɽɩwə gwun gwɩpiḏo pɽul no, gwunanyine ḏa nyalmadiŋɩni gwula gwuŋun,

⁸ aṯanyabɩɽeḏa gi dugwor ganu no gwiro gi lamon le ḏɩḏeijo kiḏɩwer.

⁹ na gi lamon lono lun lɩḏeijɩlo lɩgwurnəlo lalo nilbuje gwerkwe, nalaŋu ŋɩru ŋinyi jɩḏilio ḏuɽi kwoɽo.

¹⁰ na ŋiro dino nike ḏugwore gi liji lono niarno, luŋa laṯɩwewele kaja bubruṯ; nate nallɩŋe daṯ ḏinyi no.

¹¹ na dino niərɩmi ḏɩɽeḏa ḏe ganu ḏinyi, luŋa late ləḏi gi ḏobɩḏa uwə gwe ḏinyi no.

¹² lɩmagəri jil muma, gwəṯi gwete lagalo gwəṯi ḏugwor ḏɩki ḏate ḏəṯi ḏɩməṯo no, nyalḏuḏɩni ga kaja ḏi elo gwun gwumiḏo.

arram ḏiməṯɩno ga kəbe na gɩdo

¹³ nyalmɩni bɩɽi nanu lagaloŋu bubruṯ na ḏa gaja ge ḏorniḏa gwunanyine gɩmaje, gwəṯi gwete lagalo gwabɩɽe ḏugwor nanu ŋuɽun ŋe ḏirdəḏeico ḏeḏi ŋuɽun ŋun ŋɩki.

¹⁴ na liŋə ilmaro kal gete kɩrisṯoŋale, ḏa ilmaməṯəḏo ḏəmɩnyo ḏage didir ḏun ḏəṯɩlo kəbe na gɩdo.

¹⁵ na ḏa mumə, gwunanyine na ḏa nyalmadiŋɩni gwula gwuŋun, aṯanyabɩɽeḏa gi dugwor ganu no, gwiro gi lamon le ḏɩḏeijo.

¹⁶ na əḏɩŋa liro lun lɩdiŋɩnu gwiḏeijɩlo? late liro wei lun liduḏi masɩr nal musa gwulo na?

¹⁷ na əḏɩŋa liro lun gwumalki ḏugwore jɩḏilio ḏuɽi kwoɽo? lədu luŋa lun laṯape ŋuɽuna ŋɩki na jiŋɩno jagin jun jaiyo jɩmido ga kiḏɩwer na?

¹⁸ na ŋu gwarɩmijo ədɩŋaije luŋa late ləḏi ŋi ḏobɩḏa uwə gwe ḏuŋun no, namɩni liro luŋa lun late lateijo nəni no?

¹⁹ na ŋiro dino ilaŋu luŋaije late ləṯi ŋɩma ləḏi no gi gwune late ləṯi ḏɩməṯo no.