lɩbrani 2 - ŋuɽun ŋun ŋiya ŋun ŋikaiilo elo 1966

asa 2

¹ na ŋiro dino arram liŋə ilagŋele nəni muma ŋuɽun ŋun ŋidiŋɩnilo, gwəṯi ŋaja gədi ilwele ga mɩloḏ kəbe iladarane.

² gi gwune ḏa ŋuɽun ŋun ŋumaməḏɩl liji leḏi kanyin ŋɩmaro gwerkwe, na liji lun lɩki na lun laṯete nəni ganu lɩmape ḏakɩmino ḏun ḏɩḏuḏɩnu ŋa,

³ namɩni ilədu galakwe ḏa ilmabɩlaṯe ḏɩkədəḏɩnə ga ḏun ḏɩbuḏo gworki? gwerre ganu na gwele gwun gwiro elo gwiḏeijo ga nuumə ḏɩkədəḏɩnə ḏe ŋa ṯeno, na liji lun lɩdiŋɩnu lugwun liro lɩmijaŋijo ŋeno ŋiro gwerkwe;

⁴ na elo dino gwaŋiḏɩlo ŋuɽun ŋe ŋun ŋɩbuḏo, na ŋuɽun ŋun ŋɩmobeje liji ga ṯuṯ, na ŋɩru ŋe ŋeḏi ŋɩma ŋuŋun ŋun ŋiro kajakaja, na ḏiḏəḏo ḏe ḏun ḏibunyulo ḏiliḏəḏə ḏeḏi gwuɽɩwə gwun gwɩpiḏo pɽul.

⁵ na elo gwate gwugelo gɩḏilio gun gila ga ŋwara ganu ŋweḏi liji leḏi kanyin no, lun luməḏɩlle.

⁶ na gwiji gweṯe gwiteijo ga kalo gete nuarno, gwiji gwɩrṯa naṯamɩni aḏɩŋane? na ŋaɽe ŋeḏi gwiji ŋɩrṯa naṯamɩni ŋalaḏe ŋagelejo uwə?

⁷ ŋa gwugeloŋu ga gelio gwe gi liji leḏi kanyin ŋwamon ŋwouwɩrio, namagele laḏe kɩɽelo lugwun ḏoɽeḏa ḏe na ḏinəjio ḏe, naḏəḏə ŋelɩnya ŋɩru geḏi di duŋa.

⁸ ŋa magele ŋɩdio wei ga ŋwara ganu ŋwuŋun. na gi gwune nugele ŋɩdio wei ga ŋwara ganu ŋwuŋun gwate gwanouwɩrico gwaŋ gwetɩdo gwun gwate gwanjiga ŋwara ganu ŋwuŋua no. namɩni gwunnɩno ilate ilmanaŋu ŋɩdio wei ŋigelɩnu ŋwara ganu ŋwuŋun no;

⁹ namɩni ilaŋu yecuŋ magelini ga gelio gwe gi liji leḏi kanyin ŋwamon ŋwouwɩrio, gwəṯi laḏe ḏoɽeḏa ḏe na ḏinəjio ḏe gwan ḏɩḏia ḏe ḏaiya, kani nuai ḏaiya ḏiŋiriḏa ḏe ḏeḏi elo gwan liji wei gwete gwete.

¹⁰ ŋɩdi wei ŋijo gwan ŋu na ŋijo ŋu gwe, na ŋiŋɩr lugwun gi ḏapa nyaɽe nyutu gi ḏoɽeḏa ganu, nuṯɩməje gwelɩnya gwe ḏɩkədəḏɩnə ga ḏagin ḏɩḏia ḏe.

¹¹ gi gwune ŋu gwun gwɩpiḏi liji pɽul na liji lun lɩpiḏo pɽul lɩwiḏi kal getɩdo, na ŋiro dino ŋu gwate gwape ḏare no gwarno ŋu na luŋa liro ŋɩmaga.

¹² nuarno, nyi gwuməḏi ga jiri je juŋa gi lɩmagəri. nyi gwaṯelɩŋi kɩlɩgi ganu gi liji kɩniso ŋaŋorṯeḏa.

¹³ na dino, nyi gwagele dugwor ḏinyi lugwun. na dino, eʼe nyi na nyaɽe nyun nyiḏəḏilo elo.

¹⁴ na nyaɽe nyəṯi jɩḏḏi na ŋuwəno, na ŋu kwulo gwuŋun dino gwapo ŋuɽun ŋeno gwɩro gi luŋa, na ḏaiya ḏe nuduji iblisŋ gwate gwəṯi ŋelɩnya no gwun gwəṯi ŋelɩnya ŋe ḏaiya,

¹⁵ nulkədə ga lun lɩməṯɩnu ŋwara ganu ŋweḏi ŋɩwainy ŋɩḏe ŋe ŋe ḏaiya gi ḏɩmiḏa ḏagin wei.

¹⁶ na gwerkwe ŋu gwate gwuməṯi liji leḏi kanyin no; namɩni gwuməṯi nyaɽe nyeḏi ibraim.

¹⁷ na ŋiro dino arram gwaro gi lɩmegin ŋuɽun ŋe wei, kani ŋwuro gwele gweḏi jɩsis gwəṯi ŋino na gwiŋir gwuḏuḏɩnu ga ḏi elo ŋɩdi ŋe ŋuŋun, kani nugele ḏouwɩɽiḏa gwan ŋuɽun ŋeḏi liji ŋun ŋɩki.

¹⁸ na gi gwune gwiḏo ḏɩḏeijo ḏe, gwəṯi ŋɩmə lulgelejo uwə lun laṯɩliḏeije.