lɩbrani 13 - ŋuɽun ŋun ŋiya ŋun ŋikaiilo elo 1966

asa 13 ḏisalɩmia

¹ na ouwɩricil ḏəmɩnyo gwuməṯini ga ŋɩmaga ŋe.

² nyaḏuḏa ganu gi ḏɩməṯo liji lun liro kaja no, gi gwune liji kworo lɩməṯi liji leḏi kanyin lun liro kaja, na luŋa late lilɩŋiḏi liji leḏi kanyin liro no.

³ aḏɩŋanɩlo lun lijo kɩrkon liro gi gwune lijanyale kɩrkon; na lun liḏo, gi gwune nyaŋa ləṯi jiŋɩno dino.

⁴ ouwiricil ḏaga ŋwiŋir kalo geḏi ŋuɽun wei, na kalo gun gaṯɩniḏɩre ŋɩrleḏ ŋate no; gi gwune elo gwakɩmi liji lun lɩmɩɽiḏi ganu na lun laṯure.

⁵ na ḏɩmiḏa ḏalo gwuro kaja gi ḏəmɩnyo ḏɩbona. diliḏilɩne ganu ŋun ŋəṯanyalo gi gwune eloŋu gwarno, nyi gwate gwaŋouwɩrico galo dino jai no namɩni nyi gwate gwaŋanwalane ḏuṯ no.

⁶ na ŋiro dino ilumə ḏibɩɽeḏa ḏe nanu gwele gwun gwiro elo gwiro gwinyigelejo uwə nyi gwate gwaḏonye no; gwiji gwar gwinyieijico?

ḏija muma gi liji le ləṯi ŋelɩnya

⁷ aḏɩŋanɩlo lun ləṯi ŋelɩnya lagalo lun luməḏɩjaje ŋuɽuna ŋeḏi elo. aŋəḏɩl gɩdo ganu gwe ḏɩmiḏa ḏagin, nyalarre gi luŋa kalo geḏi ḏɩməṯo ḏagin.

⁸ yecu kɩrisṯo gwate gwaṯɩnbini ganu gilkarage na gwunanyine na bubruṯ gi gɩḏilio no.

⁹ nyagwuloḏena ḏalɩmia ḏe ḏun ḏiro kajakaja no, gi gwune ŋiŋir ḏugwor ḏəməṯini ga ḏiŋiriḏa ḏe ŋuɽun ŋədu ŋe ḏiṯa no, ŋun ŋate ŋəṯi jei ganu gi liji lun lɩmadeŋɩnejo no.

¹⁰ iləṯi lobo namɩni lun laṯape ŋɩru kibar late ləṯi ŋelɩnya alʼe kalo geḏi lobo no.

¹¹ na ḏa gwele gweḏi jɩsis gwumape ŋuwəno ŋeḏi almal ŋɩmuŋəḏi kalo geḏi ḏɩpiḏa pɽul gwan ŋuɽun ŋun ŋɩki, almal yaṯɩlnuni ga kɩluḏo.

¹² na dino yecuŋu dino gwumɩḏe kɩluḏo kani ŋwupɩḏi liji pɽul ŋuwən ŋe ŋuŋun.

¹³ na ŋiro dino ouwɩricije ilɩu lugwun kɩluḏo ilape ḏare gwan ŋu.

¹⁴ gi gwune ilate ləṯi amɩrɩgena yun yaṯɩnjaḏaṯa ŋɩne no, namɩni ilbunyi amɩrɩgena yun yar yəŋino.

¹⁵ ouwɩricije ilḏəḏə eloŋu yecu gwe ḏiḏuga ḏe ḏorṯeḏa bubruṯ, ḏun ḏiro nyaɽe nyeḏi ŋwinyu ŋwun ŋwaṯiteije ga jiri je juŋun.

¹⁶ namɩni nyaḏuḏa ganu gi ḏarra ŋuɽuna ŋun ŋiŋir na gi ḏuno ŋɩdio ŋalo no; gi gwune ḏiḏuga ḏiro gi ṯeno ḏaṯɩdili eloŋu ganu.

¹⁷ deŋɩnejil lelɩnya lalo leḏi kɩniso nyaldɩtienɩjo, gi gwune luŋa laṯajidaŋaḏa ga gwan lulo lalo, nalro gi luŋa lun ləḏəḏə eloŋu ḏiḏuɽəḏo, kani alape ṯeno ḏidila ḏe ganu, namɩni ḏɩrona ḏate no, gi gwune ŋeno ŋate ŋiŋir lagalo no.

dɩsalɩmɩa

¹⁸ uməḏɩjil eloŋu gwan anaŋa. gi gwune anəmɩnyi anarno anəṯi dugwor diŋir anabunyi anape ŋɩru ŋiŋir kalo geḏi ŋuɽun wei.

¹⁹ namɩni nyi gwuɽoṯeḏo lagalo gworki nyape ŋuɽuna ŋeno kani gwajilwəɽɩjo ŋwobɩleno ganu.

²⁰ na elo gweḏi ḏouwɩɽiḏa, gwun gwumadiɽo kalo geḏi ḏaiya gwaɽa gweḏi joŋol gwun gwunəno, gwun gwiro gwele gwage gwan yecu ŋuwən ŋe ŋeḏi ŋuɽun ŋun ŋɩkaiilo gi gɩḏilio,

²¹ ŋwajiḏəḏə ŋɩdio wei ŋun ŋiŋir gi ḏapa ŋuɽuna ŋun ŋɩbunyulo, gwaṯape ŋɩru lagalo ŋun ŋiŋir gi jei ganu juŋun yecu kɩrisṯo gwe. ḏoɽeḏa ḏaje lugwun bubruṯ gi gɩḏilio. gwerkwe.

²² nyi gwuɽoṯəḏaje gworki lɩmagəri, nya ləṯi ŋino lugwi ŋuɽun ŋeno ŋe ḏibɩɽeḏa nanu, gi gwune ŋwulijejilo ŋun ŋɩti.

²³ lɩŋinɩl ganu mage mətuḏo kɩrkon gwun gwan ṯimuṯawus; nyi gwajaŋu ŋu gwe ḏa ŋu mila cou.

²⁴ salɩmilo wei lun liro lele lalo na wei lun lɩpiḏo pɽul. liji leḏi italia lisalɩmiaje.

²⁵ ḏiŋiriḏa ḏaje lagalo wei. gwerkwe.