lɩbrani 12 - ŋuɽun ŋun ŋiya ŋun ŋikaiilo elo 1966

asa 12 yecu gwiro ḏəŋinio ḏe ḏɩməṯo ḏun ḏiro lɽa

¹ na ŋiro dino, gi gwune iləṯi jəbɩɽə jun jiro liji lutu lun lɩwəɽəicije galo ŋejiniŋalaḏe, ouwɩricije dino ilwini ŋɩdi ŋe wei ŋun ŋɩni kaja, na ŋuɽun ŋun ŋɩki ŋun ŋɩmaṯaḏɩje nanu, nileneḏeṯe gi ṯaṯ ḏun ḏo kɩɽelo lage, ildɩrna jei ḏɩməṯo ḏe dugwore.

² ilaŋalaḏe ḏi yecu gwun gwiro gwele gwe ḏɩməṯo na ḏiṯɩmio ḏuŋun, gwun gwuməṯi ḏugwore kalo geḏi luɽi lun lɩmalɩḏo ganu gi gwune ḏidila ganu kɩɽelo lugwun, nuabɩlaṯe ḏare ki nudijiga gi ḏi ḏun ḏiro ḏiŋir ḏeḏi gɩḏoɽ geḏi elo.

ḏigɩreṯɩnyeḏa ḏirṯa

³ irɩl jei ga ŋu gwun gwimape ḏikidiḏia gi liji lun lɩki, kani nyate nyartonyiḏe nyai nanu gi lulo lalo no.

⁴ na nya late lakajo ŋuɽuna ŋun ŋɩki no nyarre kəbe na ŋuwən ŋalo irəḏe ga,

⁵ namɩni nyalmaḏuḏe ganu gi ḏuməḏɩjo ḏun ḏuməḏɩjaje gi nyaɽe nyun nyoga ḏun ḏarno, ŋaɽe ŋinyi, ŋabɩlaṯa ḏigɩreṯɩnyeḏa ḏeḏi gwele gwun gwiro elo no, namɩni ŋa gwo gwidi gi jei ḏa maŋagɩreṯɩnya;

⁶ gi gwune gwun gwəṯi gwele əmɩnyi gwaṯugɩreṯɩnya, na gwakɩrɩnya nyaɽe wei nyun nyiməṯulo.

⁷ ḏa nyalməṯi ḏigɩreṯɩnyeḏa, elo gwajiduji gi nyaɽe. namɩni ŋaɽe ŋiro ŋaḏa ŋun ŋate ŋaṯɩn baba pi no?

⁸ namɩni ḏa nya late lɩməṯi ḏigɩreṯɩnyeḏa ḏun ḏəṯi liji gɩreṯɩnya nyaɽe nyagin wei no, nyiro romel na nyaɽe nyagin nyədu no.

⁹ na dino iləṯi babaŋaije gi jiŋɩno jage lun ligɩreṯɩnyeḏɩje namɩni laṯilɩdeŋɩnejo; namɩni ilate ilɩtienɩjo babaŋ gweḏi gwuɽɩwə gworki ki ilamɩḏe na?

¹⁰ namɩni luŋa ligɩreṯɩnyeḏɩje ŋwamon ŋwɩti kalo ge ḏiŋiriḏa ḏeḏi ŋadɩgiɽe ŋagin, namɩni ŋu gwugɩreṯɩnyeḏɩje gwan ŋuɽun ŋun ŋəṯi jei ganu lage kani ilaɽuwaḏe ldu ḏɩpiḏa ḏe ḏuŋun pɽul.

¹¹ namɩni ḏigɩreṯɩnyeḏa ḏate ḏetɩḏo ḏilaŋu ḏiŋiriḏa gwunnɩno no, numɩni ro ḏɩrona; namɩni gɩdo ganu ḏəduḏo nyaɽe nye ḏɩpiḏa pɽul ḏouwɩɽiḏa ḏe gi liji lun lapo ŋuɽuna ŋeno.

¹² na ŋiro dino dijeijɩl di elo dun dɩmɩde ganu; na ḏugwunyɩḏi ŋwurko ŋwun ŋwɩrebɩna.

¹³ gelɩl daṯ dun diḏuḏɩnu ga gwan ŋwara ŋwalo, kani a lara lun lirebɩna ŋwate ŋwabɩraḏe galo no namɩni lamule.

ŋuɽun ye ḏibɩɽia nanu na dɩminu ga

¹⁴ bunyɩl ḏouwɩɽiḏa lijiŋale wei, na ḏɩpiḏa pɽul, namɩni ḏa ḏɩpiḏa pɽul ḏɩmete gwatɩn gwetɩdo gwanaŋu gwelɩnya gwun gwiro elo no.

¹⁵ gelɩl gei galo didir kani gwatɩn gwete gwaɽuṯa ḏuɽo ḏe kalo geḏi ḏiŋiriḏa ḏeḏi elo no; na ḏro ḏətuḏo ḏun ḏiɽi ganu ḏajubiuḏa, na liji lutu laro ŋwuṯə gu gwe;

¹⁶ na gwate gwanje lagalo gwun gwaṯure i gwun gwaṯɩdonye eloŋu gi yisu gwun gwiḏɩli ŋelɩnya ŋuŋun ŋun ŋiduḏuŋe lɽa gwan gia gɩti.

¹⁷ na nyalɩŋiḏi gɩdo ganu gwune nuar gwaɽenyeḏe gi ḏɩmoreḏa gwumadonyini. gi gwune ŋu gwate gwumabuje lamon le ḏuwɩrla ga ŋuɽun ŋuŋun no, numɩni bunyi gworki ŋwal ŋwe.

siʼun gweḏi gwɩnyəm na siʼun gweḏi kanyin

¹⁸ namɩni nyaŋa late lɩwiḏi gŋ lɩrgwom lun lɩḏɩmumɩnu nanu na lun linunu igo no, i kirɩm na kwubəl gweḏi girɩm no, na kalo geḏi ḏɩron ḏun ḏutu na ŋwɩɽilo,

¹⁹ i ŋwal ŋweḏi lɩməki no, na ŋwal ŋweḏi ŋuɽun no. na lun lɩdiŋɩnu nalɽoṯəḏɩjʼo nate lalɩḏiŋɩni ŋutəno no,

²⁰ gi gwune luŋa late ləṯi ŋɩma ləməṯini ga ŋuɽun ŋe ŋun ŋuməḏɩjilɩlo no, namɩni ḏa ŋɩmɩɽo ŋeḏi geḏo ŋɩmaḏɩmumi lɩrgwoma nanu ŋalauce nyɩdol nye.

²¹ na ḏəŋinio eno ḏiro ḏun ḏɩkeno gi jei kəbe na musa arno, nyi gwuḏonyo bucu niubəga.

²² namɩni nyalmila gi lɩrgwom lun lan siʼun kamɩrɩgen yeḏi elo gwun gwumiḏo, urucəlim gweḏi kanyin, na gi liji leḏi kanyin lun lutu late liliḏuɽə no, lɩkanu nanu,

²³ na gi liji leḏi kɩniso geḏi ŋaɽe ŋun ŋiro lɽa lun lulinu kanyin, na ḏi elo gwun gwiro gaḏi geḏi liji wei, na kwuɽɩwə gweḏi liji lun lɩpiḏo pɽul lun lɩmalɩduji muma,

²⁴ na ḏi yecu gwun gwiro gɩlɩgi geḏi ŋuɽun ŋun ŋiya ŋun ŋɩkaiilo, na ŋuwən ŋe ḏiḏauca ŋun ŋaṯumə ŋuɽuna ŋiŋirano kworo gweḏi abil.

²⁵ jil muma gwate gwudonyanya gwun gwaṯumə no. na ḏa luŋa late lɩmabirini no lidonyo gwun gwuməḏi kwɩnyəm, namɩni late ilabɩrini no na ḏa ilmawɩwɩrle ganu lugwun gwun gwaṯumə kanyin.

²⁶ kaja gawei ŋwal ŋwuŋun ŋwimagɩɽiḏi gwɩnyəmə ganu, namɩni gwuməḏi nuarno, lamtɩdo mɩna nyi gwadigi gwɩnyəmə ganu gwate gwiro cucun no, namɩni kanyin dino.

²⁷ na ŋuɽun ŋeno lamtɩdo mɩna ŋijaŋajo galakwe na ḏɩbajia gala ŋɩdio ŋun ŋɩmagɩɽiḏini ganu ŋun ŋɩkəḏɩnu kani ŋɩdi ŋun ŋate ŋəṯi ŋɩma ŋagɩɽiḏini ganu no aljaḏaṯa.

²⁸ na dino liŋə iləməṯo ŋelɩnya ŋun ŋate ŋaṯɩmamɩliḏe ganu no, ouwɩricije iləṯi ḏiŋiriḏa kani iləpijo eloŋu ŋɩru ŋun ŋəmɩnyɩlo ŋun ŋiŋir miloḏ na ḏinəjio ḏe.

²⁹ gi gwune elo gwage gwiro igo yun yiṯi gikɩlam.