lɩbrani 11 - ŋuɽun ŋun ŋiya ŋun ŋikaiilo elo 1966

asa 11 ŋoŋor ŋe ḏɩməṯo

¹ namɩni ḏɩməṯo ḏɩro ḏɩməṯɩno ga ḏun ḏeṯeijɩnu, na ḏiro ḏəŋidio ŋɩdio ŋun ŋaṯe ŋaṯɩlaŋu no.

² gi gwune ḏɩməṯo ḏe liji leḏi uro kili luməḏɩjɩlo elo nuleicɩno lɩŋir.

³ na ḏɩməṯo ḏe ilalɩŋe gɩḏilio ŋɩkədɩnu ŋuɽun ŋe ŋeḏi elo, na ŋun ŋaṯɩlaŋu ŋate ŋɩkədɩnu ŋɩdi ŋe ŋun ŋəŋinu no.

⁴ ḏɩməṯo ḏe abil magelijo eloŋu ḏiḏuga ḏiŋirano ḏi keiyin, na ḏɩməṯo ḏe gwumape ŋuɽuna ŋu gwiŋir gi gwune gwuməḏɩjo elo gwan ḏiḏəḏo ḏuŋun; namɩni ḏɩməṯo ḏe gwɩmai namɩni gwore gwaṯumə.

⁵ ḏɩməṯo ḏe akunuk gwumuape kani ate nuaŋu ḏaiya kaŋɩnu yuŋun no; namɩni gwate gwumabuḏini no, gi gwune na elo ape. na gwerre na ḏapa ḏuŋun ŋu gwəṯi ŋuɽuna ŋun ŋatuŋiŋiri eloŋu ḏugwore.

⁶ namɩni ḏa ḏɩməṯo ḏimete gwiji gwate gwəṯi ŋɩma gwiŋiri eloŋu ḏugwore ḏuṯ no, gi gwune gwun gwar gwele ḏi elo arram ŋu gwəmɩnyu nuarno ŋu gwo, na ŋu gwiro gwun gwaṯilḏəḏə ŋɩdio lun gwaṯilbunyi muma.

⁷ ḏɩməṯo ḏe nouwa ŋɩno na elo uməḏɩjo gwan ŋuɽun ŋun ŋate ŋɩmaŋino no, gwumaḏonye nukade murkab kani ŋwəbɩri liji leḏi dunu gwuŋun, na ŋuɽun ŋeno ŋu gwakɩmi gɩḏilio, nuro gwun gwaɽenyeḏe gi ḏiŋiriḏa ḏe ḏɩməṯo.

⁸ ḏɩməṯo ḏe ibraim gwune nuornɩḏini gwuməmɩnyi nudiŋɩni nutu nuwele kalo ŋun ŋunɽenyeḏe, nutu nuwele namɩni gwate gwilɩŋiḏi gala gun gar gunwele no.

⁹ ḏɩməṯo ḏe naṯuje kamɩrɩgen yun yuməḏɩjiye elo yar yuḏəḏə, yiro galo giro kaja, naṯɩlḏɩre ŋɩnəwei isak gwe na yagub lun liɽenyeḏo ŋuɽun ŋu gwe, gi jibar.

¹⁰ gi gwune ŋu gweṯeijo amɩrɩgena yun yəṯi jama, na gwun gwəṯi ŋadɩgiɽenyə gwan galo keno nukade, elo gwiro.

¹¹ ḏɩməṯo ḏe saraŋu ḏino gwumape ŋɩma ŋe ḏilɩŋeḏa ŋaɽe, na gwune nuro gəbɩrru nulɩŋe, gi gwune nuarno ŋu gwun gwuməḏɩjo ŋuɽuna gwaṯɩdime ŋuɽuna ŋuŋun.

¹² na dino kwiji gwetido na ŋu gwijo gɩṯo gi ḏaiya, nyaɽe nyimalɩŋini nyutu gi ŋwudum ŋweḏi kanyin gwun gwutu bucu, na gi amuɽ yun yaṯɩje ḏuwia ganu yun yate yəṯi ŋɩma ilḏuɽə no.

¹³ na liji leno wei lɩmai ḏɩməṯo ḏe, late lɩmape ŋuɽuna ŋun ŋuməḏɩjilɩlɩŋe ŋulɩḏəḏə no, namɩni lɩmaŋu uro kɩɽelo naləmɩnyi, nalteije ga luŋa liro kaja lɩwiwiḏi kaja kwɩnyəm.

¹⁴ na lun laṯare dino laṯilɩŋini libunyu gala giro kaja.

¹⁵ na luŋa ḏa laḏɩŋano gala gun gɩtuḏɩne ləṯi ŋwamon laŋaɽuwa,

¹⁶ namɩni libunyu gala giŋirano geḏi kanyin. na dino late lal elo api ḏare no naṯɩleico ŋu gwiro elo gwagin, gi gwune ŋu ligelijulo amɩrɩgena.

¹⁷ ḏɩməṯo ḏe ibraim gwune nuiḏeije, nugele isakŋ gi lobo elo, na ŋu gwun gwumape ŋuɽuna ŋun ŋuməḏɩjɩlo elo ŋulḏədə nugele ŋaɽe ŋuŋun ŋun ŋiro ŋetɩdo gi lobo elo.

¹⁸ gwun gwəri gwe no, gi jiri jeḏi isak nyaɽe nyalo nyaorniḏini nyiro lɩgwurnəlo.

¹⁹ gi gwune ŋu gwarno elo gwəṯi ŋɩma kalo ge ḏidiɽo ŋi ḏaiya, na ŋɩnəwei dino nuwəɽio gwiro gi sura je ḏidiɽo gi dḏaiya.

²⁰ ḏɩməṯo ḏe isak gwumərəḏi yagubŋ na yisu kalo geḏi ŋuɽun ŋun ŋar ŋila.

²¹ ḏɩməṯo ḏe yagub gwune nuje giṯo gwar gwai, gwumərəḏi nyaɽe nyeḏi yusib berene, nuorṯeḏa eloŋu nuriḏe lja le gi ḏaparra elo ḏuŋun.

²² ḏɩməṯo ḏe yusib gwune nuje gɩṯo gwar gwai, nuumə gwan ḏituḏo ḏeḏi liji leḏi isreiyil, nugele ŋuɽuna kalo geḏi ŋwuya ŋwuŋun.

²³ ḏɩməṯo ḏe gwune na musa liŋino, babaŋa nana gwe gwimalɩbiji kəbe na luwə ro ṯəɽɩl gi gwune luŋa laŋədi ŋaɽe ŋiŋir, na late lɩmaḏonye ŋuɽuna ŋeḏi gwele no.

²⁴ ḏɩməṯo ḏe musa gwune nubuḏe gwumadonye gi aleicɩno ŋaɽe ŋeḏi ŋaɽe ŋeḏi parouun ŋun ŋiro gwa,

²⁵ gwəmɩnyəno gwalwewele liji le leḏi elo ḏɩḏia ḏe gi ḏɩdila ganu ḏeḏi ŋuɽun ŋun ŋɩki kaja gɩti,

²⁶ nuarno gwape ḏare ḏɩbona ḏe ḏeḏi kɩrisṯo ḏɩbuṯano kworo gweḏi masɩr, gi gwune gwaṯɩgele gei ŋɩdi ŋun ŋila.

²⁷ ḏɩməṯo ḏe nuwalane ḏi masɩr gwate gwuḏonyo ḏɩɽeḏa ganu ḏeḏi gwele no, na ŋu gwuḏuḏɩnu muma nubɩɽe gi jei, gwiro gi gwune gwaṯuaŋu ŋu gwun gwate gwimaŋino no.

²⁸ ḏɩməṯo ḏe nugele gɩmuri ge ḏouwɩrico nuauce ŋuwən ŋe, kani gwun gwuɽinyiḏi nyaɽe nyun nyiro ŋwuɽa gwo gwalḏɩmumi nanu.

²⁹ ḏɩməṯo ḏe nalwele gi ḏirawe ḏun ḏure gi gwune galo gun gwuḏu; ŋuɽun ŋeno na lɩmasɩr ar liḏeije nalai ŋau ganu.

³⁰ ḏɩməṯo ḏe dimɩle dun dɩkədɩnu gi lirgwom leḏi ariya ḏimideḏe ga gwune naṯi liji wəɽeico galo ŋwamon kwoɽoṯəɽɩl.

³¹ ḏɩməṯo ḏe raʼab gwun gwumɩɽiḏi jei ganu gwate gwɩmalai liji le lun late ləṯəṯeijo eloŋu nəni no, gi gwune əmɩnyulo lun laṯɩdaŋa amɩrɩgena nyɩkwom ḏiŋiriḏa ḏe.

³² namɩni nyi gwumə ŋuɽuna ŋɩrṯa ŋutəno? na ŋwamon ŋwobɩla ganu gi nyi umə gwan jidawun, na barak, na samsun, na yapita, na ḏauuḏ na samuwil na nebɩŋa,

³³ lun lɩḏami ŋelɩnya ḏɩməṯo ḏe, nalape ŋuɽuna ŋun ŋɩḏuḏɩnu ga, nalape ŋuɽuna ŋun guməḏɩjilɩlo elo ŋwulɩḏəḏə, nalaŋiṯi ŋwinyu ŋweḏi ŋwima,

³⁴ nalɽinye diŋɩla deḏi igo, nalubɩḏɩni ŋuwio ŋeḏi cɩwiḏ, nalbɩɽi nanu kalo ge ḏirebɩnɩḏa, nalmɩni bɩɽene nanu kalo ŋe ḏɩrra nalḏami ajana yun yiro kaja.

³⁵ la lɩmape liji lagin lun laiyo ḏidiɽo ḏe, namɩni liji kworo laligwuruṯɩmini, nalmɩni ate laləmɩnyi gi ḏəbɩrino no kani alape ḏidiɽo ḏun ḏiŋirano.

³⁶ namɩni kwokworo lɩmaliḏeije ḏakia ḏe jumo na ḏipino ḏe, na ḏikaiya dino naləḏəḏɩje kɩrkon.

³⁷ lɩmalauce nyɩdol nye, lɩmaliḏirṯa ganu ḏiṯɩreṯ, lɩmaliḏeije, lɩmalɩɽinye cɩwiḏ je; lɩmawewele nalkani jɩrna je jeḏi juɽo na jeḏi joŋol, luwini ga dino jai, laiyo nanu, nalro lɩtilɩti.

³⁸ na liji leḏi gɩḏilio late lɩdeleḏo lagin no—labɩbɩrinu galo kalo gun gate gəṯi gwubəlo no, na ŋwurgwom elo, na gi nimu na ŋwubɩɽul kwɩnyəm.

³⁹ namɩni leno wei ḏɩməṯo ḏe luməḏɩjɩlo elo nuleicɩno liŋir, late lɩmape ŋuɽuna ŋun ŋuməḏɩjilɩlo elo ŋwulɩḏəḏə no,

⁴⁰ gi gwune elo gwaŋəḏi ŋɩdio gwerre ganu ŋun ŋiŋirano gwan liŋə, kani luŋa late laṯɩməḏini ḏi lɩmete no.