lɩbrani 10 - ŋuɽun ŋun ŋiya ŋun ŋikaiilo elo 1966

asa 10 ḏiḏugɩno ḏeḏi kɩrisṯo ḏimiŋirano gworo gweḏi musa

¹ gi gwune ŋuɽun ŋun ŋigelijɩlo elo musaŋ ŋiro gi gworo gweḏi ŋuɽun ŋiŋir ŋun ŋila; ŋate ŋiro ŋeno no; ŋate ŋəṯi ŋɩma ŋulṯɩməḏɩjo liji lun lila lugwun ḏuṯ ḏiḏuga ḏe ḏun ḏaṯilḏuge jɩḏilio wei no.

² na ḏa ḏiḏuga ṯeno ḏɩmaje ḏəṯi ŋɩma luŋa late laḏuḏɩni ḏalgele na? gi gwune liji lun laṯorṯeḏa lɩmapiḏe pɽul late lilɩŋiḏi gi lulo lagin ləṯi ŋuɽuna ŋun ŋɩki mɩna no.

³ namɩni ḏiḏuga ṯeno laṯaḏigane ŋuɽuna ŋɩki jɩḏilio wei;

⁴ gi gwune ŋuwən ŋeḏi nyiḏri na nyo ŋate ŋəṯi ŋɩma ŋəbɩri ŋuɽuna ŋun ŋɩki no.

⁵ gwune na kɩrisṯo əḏio kɩḏilio nuarno, ŋa gwate gwəmɩnyu ḏiḏuga na ŋɩdi ŋun ŋiḏəḏɩlɩlo ga dino no, namɩni ŋa gwugicɩŋi aŋɩna muma.

⁶ na ga gwate gwiŋir ḏugwore ŋɩdi ŋun ŋaṯɩnoneḏe gi lobo elo na ḏiḏuga ḏeḏi ŋuɽun ŋun ŋɩki no.

⁷ na ŋɩno niarno, elo, nyi gwiro gwun gwumila, kani nyiape ŋuɽuna ŋun ŋɩbunyalo gi gwune ŋulinu dino kɩḏam ŋan nyi.

⁸ gwerre nuarno, ŋa gwate gwubunyu ḏiḏuga no na ŋɩdi ŋun ŋiḏəḏɩlɩlo ga dino no, na ŋɩdi ŋun ŋaṯɩnoneḏe gi lobo elo no, na ḏiḏuga ḏeḏi ŋuɽun ŋun ŋɩki no, na ŋa gwate gwiŋir ḏugwore ŋɩdi ŋeno no, ŋun ŋiḏəḏaŋalo ŋuɽun ŋe ŋun ŋuməḏɩjaŋe musaŋ no.

⁹ na dino nuarno, nyi gwiro gwun gwumila kani nyiape ŋuɽuna ŋun ŋɩbunyalo. nuəbɩri ŋeḏi gwerre kani ŋwulape ŋwulməṯini ga ŋeḏi gɩdo,

¹⁰ na ŋuɽun ŋe ŋeno ŋun ŋɩbunyulo ilmapide pɽul ḏiḏugɩno ḏe ḏeḏi aŋɩnu yeḏi yecu kɩrisṯo yun yiḏugɩnu lamtɩdo.

¹¹ na dino jɩsis wei jəṯɩdiɽi ŋwamon wei nalape ŋɩru nalgele ḏiḏuga ḏun ḏaṯilduge bubruṯ ŋwamon gwutu ḏun ḏate ḏəṯi ŋɩma ḏəbɩri ŋuɽuna ŋun ŋɩki ḏuṯ no;

¹² namɩni kɩrisṯo, gwune nugele ḏiḏugɩno ḏetɩdo ḏeḏi ŋuɽun ŋun ŋɩki gi gɩḏilio, nujiga gi ḏi ḏun ḏiro ḏiŋir ḏeḏi elo.

¹³ na uro kaja kono nuḏuḏɩnɩjo kəbe nal elo duji liji lun lɩkiḏiḏɩle nalro gɩḏoɽ geḏi ŋwara ŋwuŋun.

¹⁴ gi gwune ḏiḏugɩno ḏe ḏetɩdo nulṯɩməje gi gɩḏilio luŋa lun lɩmulpiḏi pɽul.

¹⁵ na gwuɽɩwə gwun gwɩpiḏo pɽul gwiteiḏijije ga dino, gi gwune arune gwerre,

¹⁶ ŋuɽun ŋiro ŋeno ŋun ŋɩkaianalo gwune na ŋwamon ete ŋweno gwarno gwele gwun gwiro elo: nyi gwagele ŋuɽuna ŋinyi gi dugwor ganu dagin ŋiluli ŋadɩgɩɽe ŋagin,

¹⁷ na nyi gwate gwaḏɩŋane ŋuɽuna ŋagin ŋun ŋɩki no na ḏɩkeḏa ḏagin ḏeḏi ŋuɽun ŋun ŋɩḏuḏɩnu ŋa ḏuṯ no.

¹⁸ na ḏa ḏəbɩrio ḏɩmaje ḏeḏi ŋuɽun ŋeno ŋun ŋɩki, namɩni ḏiḏuga ḏeḏi ŋuɽun ŋun ŋɩki ḏete no.

ḏibɩɽia nanu na dɩminu ga

¹⁹ na ŋiro dino lɩmagəri, iləṯi ḏibɩɽeḏa nanu iləḏi kalo ŋun gɩpiḏano pɽul ŋuwən ŋe ŋeḏi yecu,

²⁰ ḏəḏio ḏe ḏun ḏiḏijije, ṯaṯ ḏe ḏun ḏiya na ḏun ḏɩmiḏo, giria ge gun guɽəḏi gala ganu ḏun ḏiro aŋɩnu yuŋun,

²¹ na iləṯi gɩsis gun gɩbuḏo geḏi dunu gweḏi elo.

²² ouwɩricije ildikəḏaṯa nanu dugwor de detɩdo denyeḏo ḏɩməṯo giu gwune dugwor ḏage doucɩnu gwan lulo lun lɩki, na jiŋɩno jage jɩmawone ŋau ŋe ŋun ŋiŋir.

²³ ouwɩricije ilməṯo ḏiḏuḏɩnɩjo dun ḏiteijilo ga ilate iləṯɩn dugwor ganu dɩttən no, gi gwune ŋu gwun gwuməḏɩjije ŋuɽuna gwaṯɩdɩme ŋuɽuna ŋuŋun.

²⁴ ouwɩricije ilirijo jei galo iliḏeije lageŋu iləmɩnyi ilarre ŋɩru ŋiŋir.

²⁵ ilo lanouwɩrico ḏaɽuwaḏa ldu ḏage gwiro gi gwune kworo, namɩni ilbɩɽe nanu kal gete, iliduji ŋutəno gi gwune nyalaŋu lamon leḏi elo lila.

²⁶ na ḏa liŋə ilmape ŋuɽuna ŋun ŋɩki kaja gage gwune nilape ḏilɩŋeḏa ḏeḏi ŋuɽun ŋun ŋiro gwerkwe, ḏate ḏaro ḏiḏuga ḏeḏi ŋuɽun ŋun ŋɩki mɩna no,

²⁷ namɩni ḏiḏuḏɩnɩjo ḏeḏi ŋɩde ḏe ḏakɩmiḏa ḏeḏi elo, na ḏɩɽeḏa ŋanu ḏeḏi iŋo ḏun ḏaʼe liji lun lɩkiḏiḏɩlo eloŋale.

²⁸ ḏa gwete gwimabɩlaṯe ŋuɽuna ŋeḏi musa, na ŋu gwai ŋino ŋate no ḏa lɩmaje liji lun laŋiḏi lun liro lɩttən i ṯəɽɩl.

²⁹ namɩni ḏakɩmiḏa ḏiro ḏəḏə ḏun ḏutəno ḏanyaḏarno gwete gwedeleḏo ḏa madoṯa ŋaɽe galo ŋeḏi elo, na marno ŋuwən ŋeḏi ŋuɽun ŋun ŋɩkaiilo ŋiro ga dɩno jai ŋun ŋɩmapiḏi pɽul, nuiḏi gwuɽɩwə gi jei gwe ḏiŋiriḏa?

³⁰ na liŋə ililɩŋiḏi ŋu gwun gwarno, ḏiwəɽəṯɩjo ḏakɩmiḏa ḏinyi ḏiro, nyilwəɽəṯɩjo gi gwune arune, gwarno gwele gwun gwiro elo; na dino, gwele gwakɩmi liji luŋun.

³¹ ḏidio gi ḏi ḏeḏi elo gwun gwumiḏo ḏɩni bucu.

ŋuɽun ŋe ḏibɩɽia nanu ŋalinjaḏaṯa ŋɩma ŋe

³² namɩni aṯanyaḏɩŋane ŋwamon ŋwun ŋwimadarane galo ŋwun ŋwiɽo gwune na nyoɽa galo nyalməṯɩnu ga ḏibula ḏe ḏɩḏia ḏun ḏutu.

³³ nyalaŋinu ŋilɩŋiḏanyalo jigwulo je na ḏigwuriṯɩminio ḏe, nalijanyale kal gete lun ləṯi ŋuɽuna ŋɩbɩɽe ŋiro gi gworo kweno.

³⁴ na linaḏanyalo lun likanano ga, nyaldonyo ḏɩkeḏa ḏe ḏɩbona ḏalo ḏiŋiriḏa ḏe, nyalɩŋiḏi gi dugwor ganu dalo nyaləṯi ḏɩbona ḏiŋirano ḏun ḏar ḏajaḏaṯa.

³⁵ na ŋiro dino nyawino ḏibɩɽeḏa ḏe nanu ḏalo no ḏun ḏanyaḏape ḏidiena ŋa ḏɩbuḏo.

³⁶ gi gwune nyalbunyu ḏɩməṯo ḏugwore kəbe ḏa nyalmape ŋɩru ŋun ŋɩbunyɩlo elo, nyalape ŋun ŋaruge no ŋajilḏəḏə:

³⁷ na gwaje ga gwɩti na ŋu gwun gwar gwila gwila, gwate gwila gɩdo no.

³⁸ namɩni gwun gwɩpiḏo pɽul gwamɩḏe ḏɩməṯo ḏe ḏuŋun, namɩni ḏa ŋu gwumaɽuṯe ḏuɽo ḏe, na gwate gwiŋidili ganu no.

³⁹ namɩni liŋə ilədu leḏi aɽuṯa duɽo de gi ḏaiya no, namɩni iləḏi liji lun ləmɩnyu kəbe gi ḏɩkədaḏɩnə ga ḏeḏi lulo lagin.