lɩbrani 1 - ŋuɽun ŋun ŋiya ŋun ŋikaiilo elo 1966

asa 1 ŋuɽun ŋun ŋar ŋijaŋijo gworo gwun gwila

¹ uro gwerre na elo uməḏɩjo lɩgwurnɩnyo ŋwinyu ŋwe ŋweḏi nebɩŋa ŋuɽun ŋe gutugutu na daṯ ḏe diro kajakaja.

² namɩni gɩdo ganu ŋwamon ŋweno nuijuməḏɩjo ŋaɽe ŋuŋun ŋe ŋun ŋudujiŋu ŋaɽenyeḏe ŋɩdi wei, na ŋu gwe gwugelo gɩḏilio dino.

³ ŋu gwiro bure gwe ḏoɽeḏa ḏeḏi elo, na ŋau ŋɩwəɽənu, na ŋɩdi wei ŋo gi ḏi ganu ḏuŋun ŋuɽun ŋe ŋeḏi ŋɩma ŋuŋun. na gwune ŋu ŋwijimudɩjo ŋuɽuna ganu ŋage ŋun ŋɩki, nujiga gi ḏi ḏun ḏiro ḏiŋir ḏeḏi elo kanyin,

⁴ na ŋu maro gwiŋirano gworki gi liji leḏi kanyin, gwiro gi gwuɽenyeḏo gi jiri jiŋirano gworki lagin.

ŋaɽe ŋeḏi elo ŋiŋirano gworki gi liji leḏi kanyin

⁵ na əḏi gwiro gi liji leḏi kanyin gaja gədi na elo arno, ŋa gwiro ŋaɽe ŋinyi, na gwunanyine nyi maŋalɩŋe? na dino, nyi gwiro baba gwuŋun, namɩni ŋu gwaro ŋaɽe ŋinyi?

⁶ na gwune nuapa ŋaɽe ŋun ŋiro lɽa mɩna kɩḏilio, nuarno, ouwɩricil liji leḏi kanyin wei leḏi elo alorṯeḏaŋuŋu.

⁷ na gwan liji leḏi kanyin gwar dino, ŋu gwukado liji leḏi kanyin lɩro ḏɩron, na jaḏam juŋun diŋɩla deḏi igo;

⁸ namɩni gwan ŋaɽe ŋuŋun nueicɩno, gɩḏoɽ geḏi ŋele ŋuŋa, elo, gaṯɩje gi gɩḏilio; ḏaparra ḏeḏi ŋele ŋuŋa ḏaparra ḏeḏi ŋuɽun ŋiŋir ḏiro.

⁹ a gwəmɩnyu ŋuɽuna ŋiŋir namɩni de ŋuɽuna ŋun ŋɩki. na ŋiro dino elo, elo gwuŋa maŋawɩrṯi ŋila ŋe ŋe ḏidila ganu ŋutəno gi liji lun lijaḏanyale ŋa.

¹⁰ na, ŋa gwele gwun gwiro elo, ŋa gelo gama geḏi gɩḏilio uro gwerre, na kanyin gwiro ŋɩru ŋeḏi di duŋa;

¹¹ luŋa lai namɩni ŋa gwajaḏaṯa; na luŋa wei laro jəbɩrru gi giria,

¹² na ŋa lalmɩɽi ldu gi giria ge ḏimɩɽino nanu, nalamɩdini; namɩni ŋa, ŋa gwajaḏaṯa, na jɩḏilio juŋa jate jete no.

¹³ na əḏi gwiro gi liji leḏi kanyin gaja gədi nuarno, jiga gi ḏi ḏinyi ḏun ḏiro ḏiŋir, kəbe nyiduji liji lun lɩkiḏiḏianyale gɩḏoɽ geḏi ŋwara ŋwuŋa?

¹⁴ na liji leḏi kanyin wei late liro gwuɽɩwə gwun gwuwəjɩnu ŋɩru ŋeḏi elo gwan liji wei lun laɽenyeḏe gi ḏɩkadəḏɩnə ga na?