kulusi 4 - ŋuɽun ŋun ŋiya ŋun ŋikaiilo elo 1966

asa 4

¹ nyaŋa lun liro lele leḏi lɩwainy, arrɩlo gi lɩwainy lalo ŋuɽun ŋe ŋun ŋɩḏuḏɩnu ga na ŋun ŋideleḏo lagin, nanyalɩŋiḏi nanyarno nyaŋa dino nyaləṯi gwelɩnya kanyin.

² aṯanyauməḏɩjo eloŋu bubruṯ nya lo lanirtonyɩḏe, nyagirini gi ḏuməḏɩjo eloŋu ḏalo na gi ḏeico eloŋu sukran,

³ na aṯanyauməḏəṯɩjo eloŋu lagəri dino kani ŋiji elo iḏijo ouwɩr yeḏi ŋuɽun ŋeḏi elo, kani aṯɩlumə ŋuɽuna ŋun ŋɩlɩbo ŋeḏi kɩrisṯo, na gwan ŋeno nyi gwijo kɩrkon,

⁴ kani nyilaŋiḏi muma gi gwune ŋɩdeleḏo ŋilumə.

⁵ aṯanyawewele ḏilɩŋeḏa ḏe gi jei ganu jeḏi luŋa lun late ləmɩnyu no, na aṯanyaməṯo ŋwamon ŋweḏi ḏapa ŋɩru ŋiŋir.

⁶ ouwɩrɩcɩl ŋuɽuna ŋalo alro ḏiŋiriḏa ḏe, alḏɩnye ŋwuco ŋe, kani nyalɩŋe galakwe nyalwɩrlijo liji wei ŋuɽuna.

ḏisalɩmia ḏeḏi bulus na ŋuɽun ŋun ŋiro gɩdo

⁷ tɩkikus gwun gwiro mage gwun gwəmɩnyɩlo, na gwiro gaḏam gun giŋir na gwiro wainy gwun gwapile ŋɩru kwele gwun gwiro elo, gwajaŋijo ŋuɽuna wei ŋun ŋaṯiŋiwilijo,

⁸ gwun gwuwəḏijeje gwan ŋuɽun ŋeno kani ŋulɩŋeḏa ŋuɽuna ŋun ḏaṯajiwilijo na gwabɩɽi dugwor dalo nanu,

⁹ nilwəjo unsimus gwe gwun gwiro mage gwun gwiŋir gwəmɩnyilo, gwun gwiro gwete lagalo. na luŋa lajaŋijo ŋuɽuna wei ŋun ŋɩmila ŋɩne.

¹⁰ aristarkus gwun gwijanagwe kɩrkon gwusalɩmiaje, na markus dino gwun gwiro ŋaɽe ŋeḏi megin gweḏi barnaba, na ŋɩmanyaldiŋɩni ŋun ŋɩmajɩlaŋijo gwar gwanyalarra, ḏa mila lagalo nyəmɩnyi gworki;

¹¹ na yecu gwun gwaṯileico yusṯus, lun luɽəno, leno kuwei liro lun lapanale ŋɩru gwan ŋele ŋeḏi elo, na luŋa laṯiŋimoɽa ganu.

¹² abaparas gwun gwiro gwete lagalo gwusalɩmiaje, gwun gwiro wainy gweḏi yecu kɩrisṯo, na gwaṯɩɽoṯəḏəṯɩjo lagalo gworki gi ḏuməḏɩjo eloŋu ḏuŋun, kani nyaḏuḏɩni muma gi liji lun luɽun na lɩbɩɽe nanu ŋuɽun wei ŋun ŋɩbunyɩlo elo.

¹³ gi gwune nyi gwaṯiteije ga gwan ŋu na ŋu gwaṯape ŋɩru gworki gwan nyaŋa, na gwan luŋa lun lijo laudɩkia na lun lijo irabulis.

¹⁴ luka gwun gwiro lakim lun ləmɩnyɩnu gwo gwusalɩmiaje na dimas.

¹⁵ salɩmi lɩmage lun lijo laudikia, na gwa gwun gwan nimabasa, na kɩniso gun gijo kwu dunu gwuŋun.

¹⁶ ḏa nyalməgɩri jawab ceno kɩlɩgi ganu lagalo, ouwɩricil alagirini dino kɩniso geḏi laudikia, na nyaŋa dino nyəgɩri jawab jun jɩwiḏi laudɩkia.

¹⁷ nanyeico arkibusŋ no, ji muma gi ḏapa ŋɩru ŋun ŋɩməṯəlo kwele gwun gwiro elo kani galṯɩmi wutiwuti.

¹⁸ nyi gwan bulus gwo gwulijaje ḏisalɩmia ṯeno ḏi ḏe ḏinyi. aḏɩŋanɩl ḏikanana ga ḏinyi. ḏiŋiriḏa ḏaje lagalo. gwerkwe.