kulusi 3 - ŋuɽun ŋun ŋiya ŋun ŋikaiilo elo 1966

asa 3 ŋuɽun ŋun ŋɩmila na ḏa luŋa limadiɽɩ yecuŋale

¹ na dino ḏa nyalmadiɽi kɩrisṯoŋale, bunyɩl ŋuɽuna ŋun ŋijo kanyin, kalo gun gijɩne kɩrisṯo ŋi ḏi ḏun ḏiro ḏiŋir ḏeḏi elo.

² aṯanyagele dugwor dalo ŋuɽun ŋun ŋijo kanyin, ŋədu ŋun ŋijo kwɩnyəm no.

³ gi gwune nyalmai na ḏɩmiḏa ḏalo ḏilɩbiḏɩnu kɩrisṯoŋale ḏi elo.

⁴ na ḏa kɩrisṯo gwun gwiro ḏɩmiḏa ḏage gwimaŋino, na kaja kono nyaŋa dino nyalaŋini ŋuŋale gi ḏoɽeḏa.

⁵ na dino ɽinyiḏɩl ŋuɽuna ŋun ŋɩki ŋun ŋijo lagalo ŋeḏi gɩḏilɩo: ŋeḏor, na ŋɩrleḏ, na ḏɩbunya ḏun ḏɩki ḏeḏi jiŋɩno, na ḏibunya ḏun ḏɩki, na ḏideleḏa ganu gi gwune ḏiro ḏorṯeḏa ŋɩdio,

⁶ na gi gwune ŋuɽun ŋeno ŋaṯɩɽi eloŋu ganu gi nyaɽe nyun naṯakɩra ŋuɽuna duɽo de.

⁷ na nyaŋa dino nyalwele ŋuɽun ŋanu ŋeno gwerre, kaja ke ganyagijiga lagin.

⁸ namɩni gwunnɩno winɩl ŋuɽun ŋe ŋeno wei lagalo: ḏɩɽeḏa ganu, na ḏɩɽeḏa ganu gworki, na ḏɩkino maga, na ḏɩḏenɩḏia, na ŋuɽun ŋun ŋiro ŋɩrleḏ ŋwinyu ŋwalo.

⁹ aṯanyauməḏəṯo lagaloŋu ŋɩwɩɽɩgala no, gi gwune nyalmawala ŋuɽuna ŋun ŋəṯanyalo gwerre na ŋɩru ŋuŋun,

¹⁰ nanyalmakaii lula lalo ŋuɽun ŋe ŋun ŋiya ŋun ŋaṯɩdujini ŋiya bubruṯ ḏilɩŋeḏa ḏe ŋiro gi gworo gweḏi elo gwun gwugelu.

¹¹ na gi ḏigelɩno ṯeno ḏun ḏiya ḏijɩn gwugrigi ganu i gwiju no, na ḏate ḏijɩn ḏuɽəno ganu i ḏijiga ḏate ḏuɽəno no, i gwubarabia i gwusakitu, i wainy i gwun gwate gwiro wainy no; namɩni kɩrisṯo gwiro ŋuɽun wei na gi wei.

¹² na dino kaiil lula lalo gi lun lɩməṯɩnu leḏi elo, lun lɩpiḏo pɽul na ləmɩnyɩnu, ḏugwor ḏe ḏeḏi gino na ḏəmɩnyo, na ḏɩtieno ḏe dugwor na ḏeḏi lulo, na ḏɩməṯo dugwore,

¹³ nyaməṯə dugwore ŋɩmaga lagaloŋu bubruṯ, naṯanyaḏuḏɩjo gworo ganu lagaloŋu ḏa gwete məṯi ŋuɽuna ŋe ḏicɩgio gworo; na ŋiro gi gwune kɩrisṯo majiḏuḏɩjo ganu nyalarre dino.

¹⁴ namɩni kworo elo ŋeno wei kanil lula lalo ḏəmɩnyo ḏe ḏun ḏaṯɩgaki ŋuɽuna wei ldu alro muma.

¹⁵ na ouwɩricil ḏouwɩɽiḏa ḏeḏi kɩrisṯo ŋwuro gwele gi dugwor ganu dalo, gi gwune nyaləmɩḏɩnu ŋuɽun ŋeno kaŋɩnu yetɩdo. naṯanyeico eloŋu sukran.

¹⁶ aṯanyouwɩrico ŋuɽuna ŋeḏi kɩrisṯo aljaḏaṯa gi dugwor ganu dalo ḏɩbona ḏe, naṯanyalmiḏe nyalo ŋɩmaga lagaloŋu ḏilɩŋeḏa ḏe wei delɩŋa ḏe ḏe ḏorṯeḏa eloŋu, na delɩŋa de ḏeḏi gwuɽɩwə, nyalelɩŋe gi dugwor ganu dalo ḏi elo ḏiŋiriḏa ḏe.

¹⁷ na wei ŋun ŋanyanarre, ŋuɽun ŋe i ŋɩru ŋe, nyalərrɩjo wei gi jiri jeḏi gwele gwun gwan yecu, na ŋu gwe aṯanyeico eloŋu sukran gwun gwiro baba.

ḏɩmiḏa ḏeḏi liji leḏi dunu lun liro lɩkɩrisṯin

¹⁸ nyaŋa la, deŋɩnejɩl ləmɩnyəŋe lalo gi gwune ŋuɽun ŋun ŋideleḏo kwele gwun gwiro elo.

¹⁹ nyaŋa ləmɩnyo, əmɩnyɩl la lalo na nya lo laɽe ganu lagin.

²⁰ nyaŋa nyaɽe, əṯeijɩlo nəni lun lilɩŋiḏaje ŋuɽun ŋe wei, gi gwune ŋuɽun ŋeno ŋiŋir kwele gwun gwiro elo.

²¹ nyaŋa babaŋa, aṯanyərio nyaɽe nyalo galo no, kani ate a dugwor dagin ro jɩɽilo no.

²² nyaŋa lɩwainy, əṯeijɩlo nəni lun liro lele lalo kalo geḏi ŋɩru ŋagin ŋuɽun ŋe wei, ŋədu ŋiro ŋe ŋeḏi gei ŋe ŋaṯiŋiri liji dugwore no, namɩni ḏugwor ḏe ḏeṯɩdo ḏɩḏonyɩḏa ḏe gwelɩnya gwun gwiro elo.

²³ na wei ŋun ŋidujianyalo, dujɩlo dugwor de gi gwune kwele gwun gwiro elo, ŋədu ŋeḏi liji no.

²⁴ nanyalɩŋe ŋeno nanyarno, gwele gwun gwiro elo gwajiwəɽɩjo ḏiwəɽɩjo ḏe ḏiɽenyeḏa, gi gwune nyaləpijo gwelɩnya ŋɩru gwun gwan kɩrɩsto.

²⁵ gi gwune ŋu gwun gwaṯape ŋuɽuna ŋɩki ŋaŋalwəɽɩjo ŋe ŋɩki ŋun ŋərrulo, na elo gwate gwaṯuəmɩnyene gwete kworo no.