kulusi 2 - ŋuɽun ŋun ŋiya ŋun ŋikaiilo elo 1966

asa 2

¹ na nyi gwubunyu nyalalɩŋe ŋɩru ŋun ŋɩni ŋun ŋaṯɩlarre gwan nyaŋa na luŋa lun lijo laudikia, na wei lun laṯe lɩminyaŋu gi jei ganu no,

² nyi gwubunyu dugwor dagin dabɩɽe nanu almaṯaḏe gi ḏəmɩnyo kani alṯɩmi ḏɩbona ḏutu wei ḏeḏi ḏilɩŋeḏa muma nallɩŋe muma ŋuɽuna ŋun ŋɩlɩbo ŋeḏi elo, ŋun ŋiro kɩrisṯo,

³ na ḏɩbona wei ḏe ḏilɩŋeḏena na ḏilɩŋeḏa ḏɩlɩbo lugwun.

ḏikaiya ḏetɩdo yecu gwe na ḏidɩminu ga gwan ḏilɩŋeḏa ḏun ḏiro ŋɩwɩɽɩgal

⁴ na nyi gwaro dino kani gwatɩn gwetɩdo gwajirdeijo ganu ŋuɽun ŋe ŋe ḏinyinyiməḏeico no,

⁵ gi gwune ḏa nyi maje kaja kwe gwiro aŋɩnu namɩni ilo kwuɽɩwə, na nyi gwo gwidilo ganu gwune niagu ŋuɽuna ŋalo ŋun ŋaṯanyalgele muma na ḏimaṯaja ga ḏe ḏɩməṯo ḏalo ḏi kɩrisṯo.

⁶ na ŋiro gi nyalmaməṯo yecu kɩrisṯoŋ gwun gwiro gwele, na ḏino aṯanyamiəe ŋu gwe,

⁷ nanyalməḏɩje dro lugwun na gwuṯanyanelo, nanyalmaṯaḏo ga gi ḏɩməṯo, gi gwune alɩminanyane, nanyalutene ḏeico ḏe eloŋu sukran.

⁸ jil muma əri kəbe gwo gwete gwajɩngwulo ŋɩwainya ḏilɩŋeḏa ḏe ḏeḏi ŋadɩgɩɽe ŋuŋun na ḏirdeijo ganu ḏun ḏiro ga jai gwan ŋuɽun ŋeḏi liji, na ḏalɩmia ḏeḏi gɩḏilio ḏun ḏədu ḏeḏi kɩrisṯo no.

⁹ gi gwune ḏenyeḏa wei ḏeḏi elo ḏajaḏaṯa lugwun aŋɩnu ye,

¹⁰ na nyaŋa lenyeḏe lugwun, gwun gwiro lɽa leḏi ŋele ŋeḏi liji leḏi kanyin na ŋele ŋeḏi gɩḏilio.

¹¹ na lugwun ḏino nyaŋa luɽəno ḏuɽəno ḏe ḏəḏu ḏun ḏigelɩnu ḏi ḏe no, namɩni ḏuɽəno ḏe ḏeḏi kɩrisṯo gi ḏuwala aŋɩna yeḏi ŋuɽun ŋun ŋɩki,

¹² gi gwune gwukwurinanyale gi ḏibabṯaijɩno ḏun ḏidiɽinanyale dino ḏɩməṯo ḏe ŋɩru ŋun ŋapɩlo elo gwun gwiḏiɽiŋu gi liji lun laiyo.

¹³ na nyaŋa lun laiyo ŋuɽun ganu ŋun ŋɩki na gi jiŋɩno jalo jun jaɩe juɽəno no, elo gwanyalimiḏe mijiḏuḏɩjo ŋuɽun ganu wei ŋun ŋɩki,

¹⁴ na ŋumamuje ḏulio ḏun ḏɩkaiijɩlḏe ŋuɽun ŋun ŋigelijɩlo elo musaŋ. na ḏulio ṯeno ḏun ḏimuəbɩri lage nalabuje elo ŋi luɽi lun lɩmaliḏo ganu ḏimɩɽeno ŋwusmar ŋwe.

¹⁵ na elo mawal gwula gwuŋun ŋele wei ŋeḏi liji leḏi kanyin na ŋele ŋeḏi gɩḏilio, nulaŋinijo nuḏəga nulḏami wei luɽi le lun lɩmalɩḏo ganu.

¹⁶ na ḏino aṯanyouwɩrico gwete gwajanakɩmi gwan ḏiṯa i ḏiyo no, i gwan gɩmuri, i uwə gwun gwiya, i ŋwamon ŋweḏi sabiṯ no,

¹⁷ gi gwune ŋuɽun ŋeno ŋiro gi gɩdidɩŋil geḏi ŋuɽun ŋun ŋila; namɩni ŋuɽun ŋun ŋiro gwerkwe ŋeḏi kɩrisṯo ŋiro.

¹⁸ gwo gwanyanouwɩrico gwete gwanyanḏuji ŋɩdio ŋalo ŋuɽun ŋe ḏɩtieno gwula ga jai na ḏorṯeḏa liji leḏi kanyin, gi gwune gwiji gi kweno gwaṯɩḏuḏɩni ŋuɽun elo ŋun ŋaŋəḏulo ŋiro gi gwume, gwabupaḏe ganu jai ŋadɩgɩɽe ŋe ŋuŋun,

¹⁹ na gwate gwaṯɩməṯəḏə lɽa lun liro kɩrisṯo no. na gi lɽa aŋɩnu wei ŋwuɽugɩḏi ŋwe na dri de yaṯɩbuje ŋɩma gi ḏiṯa na ŋɩmamaṯaḏe ldu yaṯɩbuḏe ḏɩbuṯiena ḏe ḏeḏi elo.

²⁰ na ḏa nyalmai kɩrisṯoŋale gi ḏalɩmia ḏe ḏeḏi gwerre ḏeḏi gɩḏilio gwuḏaro gəko naṯanyalimiḏe gi gwune nyalro leḏi gɩḏilio? na gwudaro gəko nanyagele lula lalo ŋuɽun ŋun ŋigelɩlo liji ŋun ŋarno,

²¹ aṯanyalḏɩmuma nanu no, i ŋo ŋanyanŋiliŋəico, i ŋo ŋanyanɩḏɩgwoiny nanu,

²² na ŋɩdi ŋeno ŋiro ŋun ŋɩmape ŋɩru kəbe ŋɩmete? gi gwune ḏa nyalmaṯarre dino nyalgwujano ŋuɽuna ŋun ŋigelɩlo liji na ḏalɩmia ḏagin.

²³ na gwerkwe ŋuɽun ŋeno ŋəṯi ḏəŋinio ḏeḏi ḏɩlɩŋeḏa gi ḏorṯeḏa gi jei ganu jeḏi liji, na ḏɩtieno gwula ŋɩwɩɽɩgal ŋe, na ḏɩḏia jiŋɩno jagin, namɩni ŋate ŋaṯapa ḏinəjɩo ḏi elo no, na ŋate ŋijingelejo uwə ilaro lele leḏi ŋuɽun ŋun ŋɩki ŋeḏi jiŋɩno jage no.