kulusi 1 - ŋuɽun ŋun ŋiya ŋun ŋikaiilo elo 1966

asa 1 ḏisalɩmia

¹ bulus gwun gwiro ḏuwəjo ḏeḏi yecu kɩrisṯo ŋuɽun ŋe ŋun ŋəmɩnyɩlo elo, na ṯimuṯawus gwun gwiro magəri,

² ano nulijilo liji lun lɩpiḏo pɽul na lɩmage lun ləṯi ḏɩməṯo muma ḏi kɩrisṯo lun lo kulusi, ḏiŋiriḏa ḏaje lagalo na ḏouwɩɽiḏa ḏeḏi elo gwun gwiro baba gwage.

bulus gweico eloŋu sukran na ḏuməḏɩjo eloŋu ḏuŋun

³ anaṯeico eloŋu sukran gwun gwiro baba gweḏi gwele gwage gwun gwan yecu kɩrisṯo, anaṯuməḏəṯɩjo eloŋu lagalo bubruṯ,

⁴ gi gwune anmadiŋɩni gwan ḏɩməṯo ḏalo ḏi yecu kɩrisṯo, na ḏəmɩnyo ḏun ḏəṯanya gi liji wei lun lɩpiḏo pɽul,

⁵ gi gwune ḏiḏuḏɩnɩjo ḏun ḏigelijajɩlo kanyin. na nyalmadiŋɩni gwerre gwan ḏiḏuḏɩnɩjo ṯeno ŋuɽun ŋun ŋɩro gwerkwe ŋeḏi ŋuɽun ŋun ŋiŋir geḏi yecu kɩrisṯo,

⁶ ŋun ŋɩwilijeje gi gwune kɩḏilio wei, na ŋaṯɩlɩŋeḏa nyaɽe, naṯɩlbuḏa ŋɩro gi gwune ŋaṯɩndro lagalo dino uro gi lamon lun lɩdiŋɩnanyale nanyalɩŋe ḏiŋiriḏa ḏeḏi elo gwerkwe.

⁷ gi gwune nyalmalɩmini ŋuɽun ŋeno ḏi abaparus gwun gwapanale ŋɩru gwun gwəmɩnyɩnu, gwun gwiro gaḏam gun giŋir gɩḏuḏɩnu ga geḏi kɩrisṯo lagalo gwan liŋə,

⁸ na dino ŋu gwijiuməḏɩjo gwan ḏəmɩnyo ḏalo kwuɽɩwə gwun gwɩpiḏo pɽul.

⁹ na gwan ŋuɽun ŋeno, anaŋa dino uro gi lamon lun lɩdiŋɩnanale anaṯuməḏəṯɩjo eloŋu lagalo na anate naṯɩḏuḏɩni no, anaɽoṯeḏo kani nyalenyeḏe ḏilɩŋeḏa ḏe ḏeḏi ŋuɽun ŋun ŋɩbunyulo, ŋadɩgɩɽe ŋe wei na ḏilɩŋeḏa ḏeḏi gwuɽɩwə,

¹⁰ kani aṯanyawewele lɩdeleḏo kwele gwun gwiro elo, nyiŋiri ŋuɽun ŋe wei, naṯanyaɽe nyaɽe ŋɩru ŋe wei ŋun ŋiŋir, naṯanyautene gi ḏilɩŋeḏa ḏeḏi elo.

¹¹ na nyalabiɽe nanu ŋɩma ŋe wei gi gwune ŋɩma ŋe ŋe ḏoɽeḏa ḏuŋun, kəbe ḏɩməṯo ḏe ḏugwore wei, na ḏidodeica ŋuɽuna ga wei ḏidila ḏe ganu,

¹² nyalaṯeico babaŋu sukran gwun gwidujije lɩdeleḏo iləṯi ŋɩmaga gi ḏiɽenyeḏa lijiŋale luŋun lun lɩpiḏo pɽul kwu bure.

¹³ na ŋu gwumijikədə ga ŋele ŋeḏi girɩm, nuŋwijapa ŋele ŋeḏi ŋaɽe ŋuŋun ŋun ŋəmɩnyu.

¹⁴ na ŋaɽe ŋe ŋeno iləṯi ḏɩkədəḏɩnə ga ŋuwən ŋe ŋuŋun, na ḏɩḏuḏɩjo ŋuɽun ganu ŋage ŋun ŋɩki.

ḏugwor na ŋɩru ŋeḏi yecu

¹⁵ na ŋu gwuwəɽəno elo gwun gwate maŋino no, na gwun gwilɩŋinu gwiro lɽa leḏi ŋɩdi wei ŋun ŋigelɩnu,

¹⁶ gi gwune ŋu gwe ŋɩdi wei ŋigelɩnu, ŋun ŋijo kanyin na ŋun ŋijo kwɩnyəm, ŋun ŋaŋəḏɩlo na run ŋate ŋaŋəḏɩlo no, na ḏa ŋɩmaro jɩḏoɽ jeḏi ŋele, i jɩmɩrɩgen jun jɩməṯulo ŋelɩnyo, i ŋele, i ŋele ŋeḏi liji; ŋɩdi wei ŋɩkədɩnu ŋu gwe na lugwun.

¹⁷ na ŋu gwo kɩɽelo ŋɩdi wei, na ŋɩdi wei ŋɩkanu lugwun.

¹⁸ na ŋu gwiro lɽa leḏi aŋɩnu yun yiro kɩniso; gwun gwiḏeijo ŋɩdio ŋa wei na gwun gwilɩŋinu gwiro lɽa ŋi liji lun laiyo, kani ŋwuro lɽa leḏi ŋuɽun wei.

¹⁹ gi gwune ŋəmɩnyɩlo baba ḏenyeḏeno wei ḏeḏi elo ḏajaḏaṯa lugwun,

²⁰ na ŋu gwe gwouwɩɽiḏi ŋɩdio wei kwulo gwuŋun, na ḏa ŋimaro ŋɩdi ŋeḏi gwɩnyəm i ŋeḏi kanyin, gi gwune gelu ḏouwɩɽiḏa ŋuwən ŋe ŋeḏi luɽi luŋun lun lɩmalɩḏo ganu.

²¹ na nyaŋa lun lɩkenyɩḏiḏi ganu gwerre na lɩkiḏiḏi ŋadɩgɩɽe ganu ŋalo naṯanyape ŋɩru ŋun ŋɩki, namɩni gwunnɩno majouwɩɽiḏi

²² kaŋɩnu yeḏi jɩḏḏi juŋun ḏaiya ḏe ḏuŋun, kani ŋwajigele gi jei ganu lugwun lɩpiḏo pɽul, nya late ləṯin ŋuɽuna nanu ŋəḏi no, i ŋe ḏicɩgio no,

²³ na ḏa nyalmamaṯaḏe gi ḏɩməṯo nanyalmaḏɩje dro ga didir, na nya late laṯɩnwɩrla ganu gi ḏiḏuḏɩnɩjo ḏeḏi ŋuɽun ŋun ŋiŋir ŋeḏi yecu kɩrisṯo ŋun ŋidiŋɩmanyalo no, ŋun ŋɩmuməḏɩni ŋi liji wei kɩḏɩlio, na nyi gwan bulus gwɩmaro gaḏam geḏi ŋuɽun ŋeno.

ḏijaga kal gete ḏeḏi bulus ŋɩru ŋeḏi yecu kɩrisṯo

²⁴ na gwunnɩno nyi gwadile ganu gi ḏɩḏia ḏinyi gwan nyaŋa, na kaŋɩnu yinyi nyi gwenyeji ḏɩḏia ḏun ḏiṯanu ḏeḏi kɩrisṯo gwan aŋɩnu yuŋun yun yiro kɩniso.

²⁵ na nyi gwugelɩnu niro gaḏam geḏi kɩniso keno ḏigelɩno ḏe ḏeḏi elo ḏun ḏiḏəḏɩnyilo ḏan nyaŋa, kani nyiṯɩmi ḏuməḏɩjo ŋuɽuna wei ŋeḏi elo,

²⁶ ŋuɽun ŋun jɩlɩbo gun ŋikɩɽɩbəḏɩnu ga gi liji leḏi uro kili kəbe na gwunne, namɩni gwunnɩno ŋɩmaŋino gi liji lugun lun lɩpiḏo pɽul.

²⁷ na gi liji leno lɩmal elo əmɩnyi alilɩŋe aŋ gwɩro ḏɩbona ḏe ḏoɽeḏa ḏeḏi ŋuɽun ŋeno ŋun ŋɩlɩbo gi liji lun liro ga ḏino, ḏun ḏɩro karisto lagalo, gwun gwiro ḏiḏuḏɩnɩjo ḏe ḏoɽeḏa.

²⁸ na anaṯumə gwan ŋu, naṯanalkɩrinya naṯanalalɩmi gweṯe gweṯe ḏilɩŋeḏeno ḏe wei, kani ilgele liji muma ḏi yecu kɩrisṯo,

²⁹ na gwan ŋeno nyi gwape ŋɩru ŋutu dino, nyi gwaṯarre ŋɩma ŋe ŋuŋun wei ŋun ŋərrulo lugwi.