bilimun 1 - ŋuɽun ŋun ŋiya ŋun ŋikaiilo elo 1966

ŋuɽun ŋun ŋar ŋijaŋijo gworo gwun gwila

¹ nyi gwan bulus gwun gwiro babuny gweḏi yecu kɩrisṯo, na ṯimuṯawus gwun gwiro mage, ano nulijo bilimunŋ gwun gwəmɩnyɩlo na gwun gwaṯɩlape ŋɩru,

² na abipia gwun gwiro magəri gwun gwiro gwa, na arkibus gwun gwuduḏɩle ajana, na kɩniso gun gijo kwu dunu gwuŋa.

³ ḏiŋiriḏa ḏaje lugwuŋa na ḏouwɩɽiḏa ḏeḏi elo gwun gwiro baba gwage na gwele gwun gwan yecu kɩrisṯo.

ḏəmɩnyo ḏeḏi bilimun na ḏɩməṯo ḏuŋun

⁴ nyi gwaṯeico eloŋu gwi sukran bubruṯ na nyi gwaṯumə gwan ŋa ḏuməḏɩjo ḏe eloŋu ḏinyi,

⁵ gi gwune nyi gwaṯɩdiŋɩni gwan ḏəmɩnyo ḏuŋa na ḏɩməṯo ḏuŋa ḏun ḏəṯo kwele gwun gwan yecu na gi liji wei lun lɩpiḏo pɽul,

⁶ kani a ŋɩmaga ŋe ḏɩməṯo ḏuŋa ŋwubaḏaica ḏilɩŋeḏa ḏeḏi ŋuɽun wei ŋun ŋiŋir ŋun ŋijo lage gwan yecu kɩrisṯo.

⁷ gi gwune nyi gwəṯi ḏidila ganu gworki na ḏɩmoɽa ganu gi ḏəmɩnyo ḏuŋa, magəri, gi gwune dugwor deḏi liji lun lɩpiḏo pɽul dɩmabɩɽe nanu ŋa gwe.

ḏiɽoṯeḏa ḏan wainy gwun gwabɩro

⁸ na dino, nyi gwəṯi ḏibɩɽeḏa nanu yecu kɩrisṯo gwe nyi gwaŋaḏəḏə ŋuɽuna ŋɩbɩɽe ŋan ŋuɽun ŋun ŋideleḏo lugwuŋa,

⁹ namɩni gwan ḏəmɩnyo nyi gwuɽoṯeḏo lugwuŋa, nyi gwun gwiro ḏuwəjo ḏan bulus ḏun ḏuɽun, na gwunnɩno nyi gwiro wainy gweḏi yecu kɩrisṯo dino,

¹⁰ nyi gwuɽoṯeḏo lugwuŋa gworki gwan ŋaɽe ŋinyi ŋun ŋan unsimus ŋun ŋiliŋidi ḏɩməṯo ḏe gaja ge gun gijige kɩrkon,

¹¹ na kaja ke gɩmete ŋaɽe ŋeno ŋate ŋəṯi ŋɩru lugwuŋa no, namɩni gwunnɩno ŋəṯi ŋɩru lugwuŋa na lugwi ŋun ŋiŋir.

¹² na ŋu ŋun ŋiwəḏijaŋa mɩna, na dino ŋa ŋəmɩnyi gi ḏugwor ḏinyi,

¹³ ŋun ŋəmɩnyi ŋanaŋije, kani ŋinəpijo ŋɩru gi gwune ŋa ŋouwɩɽəga gi ḏikanana ga ḏinyi ḏeḏi ŋuɽun ŋun ŋiŋir ŋeḏi yecu kɩrisṯo.

¹⁴ namɩni nyi gwate gwəmɩnyu gwanape ŋuɽuna ŋəḏi no na da nyi gwate mandiŋɩni ŋuɽuna ŋuŋa no, kani a ḏiŋiriḏa ḏuŋa ate ŋwuro ḏiremeṯeḏeica no, namɩni ḏeḏi ŋuɽun ŋun ŋəmɩnyəlo ḏiro.

¹⁵ gi gwune gwəti, ŋiduḏi lugwuŋa dino ŋwamon ŋwouwɩrio kani ŋəmɩnyi gi gɩḏilɩo,

¹⁶ ŋate ŋiro gi wainy gwunnɩno no, namɩni ŋɩbuṯano kwu wainy, nuro gi mage gwun gwəmɩnyɩlo, na ŋəmɩnyeni ŋamɩni əmɩnyi ŋutəno ŋa gwe kaŋnu na kwele gwun gwiro elo.

¹⁷ na dino ḏa ŋa mieicɩno gwun gwowɩḏaṯanagwe, ŋəmɩnyiŋu gi gwulo gwinyi.

¹⁸ na ḏa maŋərrɩjo ŋuɽuna ŋɩki i nəṯi gəmɩju lugwuŋa gelɩl gi ḏiḏuɽəḏo ḏinyi.

¹⁹ nyi gwan bulus gwulɩjaŋa ḏi ḏe ḏinyi, nyi gwaŋawoɽəṯɩjo gəmɩju namɩni nyi gwar gwaŋeico no, ŋa gwəṯi gəmɩju lugwi gan gwulo gwuŋa dino.

²⁰ i magəri, ouwɩrico nyidile ganu ŋa gwe kwele gwun gwiro elo. bɩɽi ḏugwor ḏinyi nanu kwele.

²¹ gi gwune nyi gwilɩŋiḏi muna ŋa gwaṯəṯeijo ŋuɽuna ŋinyi gani, nyi maŋulijo ŋalɩŋe ŋarno, ŋalarre ŋutəno gi gwune ŋarɩŋe.

ŋuɽun ŋun ŋiro gɩdo

²² nanmi ŋuɽun wei gelijinyil gala dino ginḏire, gi gwune nyi gwəmɩnyu ḏuməḏɩjo ḏe eloŋu ḏalo namɩni elo gwinyiapaḏa lagalo.

²³ abaparas gwun gwijanagwe kɩrkon gwan yecu kɩrisṯo gwusalɩmiaŋa.

²⁴ na markus, na ariṯakus, na ḏimas, na luka lun laṯanalape ŋɩru.

²⁵ ḏiŋiriḏa ḏeḏi gwele gwage gwun gwan yecu kɩrisṯo ḏaje gwuɽɩwə gwe gwuŋa. gwerkwe.