bilibi 3 - ŋuɽun ŋun ŋiya ŋun ŋikaiilo elo 1966

asa 3 ḏɩbuḏia ḏun ḏate dutu jilɩnya no

¹ na gɩdo ganu lɩmagəri, dilil ganu kwele gwun gwiro elo. na ŋeno ŋate ŋiro ḏirtonyiḏa lugwi no nyi gwajulijo ŋuɽuna ŋeno ŋwamon ŋwutəno na ŋeno ŋiŋir lagalo.

² jil muma nyino, jil muma gi liji lun laṯape ŋɩru ŋɩki, jil muma gi liji lun laṯɩjuɽə jiŋɩno.

³ na liŋə iluɽəno gwerkwe lun lorṯeḏi eloŋu gwuɽɩwə gwe gwun gwɩpiḏo pɽul, na ilabupaḏe ganu ḏi yecu kɩrisṯo, na ilate lagele ḏɩməṯo ḏage gi jiŋɩno no.

⁴ namɩni nyi gwəṯi ŋɩma nyi gwagele ḏɩməṯo kaŋɩnu, na ḏa gwete manarno gwəṯi ŋuɽuna ŋe ḏɩməṯo kaŋɩnu, namɩni ŋəṯilo ŋutəno.

⁵ nyi gwuɽəno gi lamon lun laduji loro dubə, nyilɩŋinu gi liji leḏi isreiyil, kəriḏ yeḏi benyamɩn, nyi gwiro gwubrani niro ŋaɽe ŋeḏi lɩbrani, na gwan ruɽun ŋun ŋigelijɩlo elo musaŋ nyi gwiro gwubarɩsi.

⁶ na gwan diɽijo ŋuɽuna ganu nyi gwuwɩriḏi ga kɩniso ge, na gwan ŋuɽun ŋun ŋiŋir ŋeḏi ŋuɽun ŋun ŋigelijɩlo elo musaŋ nyi gwate gwəṯi dare no.

ḏibunya bucu gwerkwe ḏeḏ bulus ilro letɩdo yecu kɩrisṯo gwe

⁷ namɩni ŋɩdi ŋun ŋidieniŋga ŋiḏuɽəḏɩlo ŋeno ŋakeḏe ga ŋan kɩrisṯo.

⁸ i gwerkwe, nyi ŋɩmilḏuɽə wei ŋe ŋɩmakeḏe ga gi gwune ḏilɩŋeḏena ḏe ḏun ḏiŋirano ḏeḏi yecu kɩrisṯo gwun gwiro gwele gwi. na ŋu gwe ŋɩmaki ŋɩdi wei na ŋɩmilḏuɽə nalro gi ci, gi gwune nyi gwəməṯo kɩrisṯoŋ gwigwidiene ga,

⁹ na nyi gwabuḏini lugwun, nyi gwate gwəṯi ŋuɽuna ŋiŋir ŋinyi ŋun ŋɩwiḏi ŋuɽɩm ŋun ŋigelijɩlo elo musaŋ no, namɩni ŋun ŋiwiḏi ḏɩməṯo ḏe ḏi kɩrisṯo, ŋuɽun ŋiŋir ŋun ŋɩwiḏi ḏi elo ḏɩməṯo ḏe.

¹⁰ kani ilɩŋe, na ŋɩma ŋe ḏidiɽo ḏuŋun gi ḏaiya, na ŋɩmaga ŋe ḏɩḏia ḏuŋun, na nyi gwəmɩdini gi ŋu gi ḏaiya ḏuŋun,

¹¹ ŋatoro ŋəḏi, namɩni nyi gwəṯɩmi gi ḏidiɽo gi liji lun laiyo.

¹² ŋate ŋiro gi nyi manṯɩmi i nyi maro muma no, namɩni nyi gweneḏeṯe kɩɽelo kani nyilməṯo ŋeno ŋun ŋɩməṯaninyilo yecu kɩrisṯo.

¹³ lɩmagəri, nyi gwate gwuḏuɽəḏɩjo gwula gwi nuarno nyi məṯeno no, namɩni ŋimilduji ŋetɩdo, nyi gwaḏuḏe ganu ŋɩdi ŋeḏi gɩdo, namɩni ŋinoleḏe ŋun ŋijo kɩɽelo lugwi gwe,

¹⁴ nyi gwadirinaje kəbe nyi gweṯɩmi kalo kono, nyi gwəməṯo ḏiḏienə ga ḏun ḏornijije elo kanyin ḏi yecu kɩrisṯo.

¹⁵ na ŋiro dino ouwɩricil liŋə wei lun luɽano ilŋele ŋwuɽa ŋwage ŋuɽun ŋeno; na ḏa nyalmanəṯi ŋuɽuna ŋədi ŋun ŋiro kaja ŋajil elo aŋijo ŋeno dino.

¹⁶ namɩni ŋuɽun ŋun ŋɩmilinṯɩmi ouwɩricɩlo iligwuje bucu ŋeno.

bulus gwarno gwujanil

¹⁷ limagəri, nyaŋa lagaloŋu ərrɩlo gi nyi, nyagele gei gi liji lun ligwujo ŋuɽuna ŋun ŋaŋəḏanyalo lagəri.

liji lun lɩkiḏiḏɩl luɽi le lun lɩmalɩḏo ganu leḏi kɩrisṯo

¹⁸ gi gwune lutu laṯɩwewele gi gwune luməḏɩjejɩle gwerre ŋwamon ganu ŋwutu, na gwunnɩno nyi gwajuməḏɩjo mɩna ŋwal ŋwe, lɩkiḏiḏɩl luɽiŋale lun lɩmalɩḏo ganu leci kɩrisṯo.

¹⁹ na gɩdo ganu lagereḏe ga, na nare nagin niro elo gwagin, na ḏabupaḏa ganu ḏagin ḏo gi ḏare ḏagin, na laṯaḏiḏɩŋane ŋɩdio ŋeḏi gɩḏilio.

²⁰ namɩni liŋə amɩrɩgen yage yo kanyin, na kanyin ilḏuḏɩnɩjo gwun gwijikədə ga, gwun gwiro gwele gwun gwan yecu kɩrisṯo,

²¹ gwun gwəbi jiŋɩno ganu jage jun jɩtijɩti kani alro gi aŋɩnu ye ḏoɽeḏa ḏuŋun, ŋɩru ŋe ŋeḏi ŋɩma ŋuŋun na ŋeno ŋu gwəṯi ŋɩma ŋulgele wei ŋele ŋuŋun.