bilibi 2 - ŋuɽun ŋun ŋiya ŋun ŋikaiilo elo 1966

asa 2 ḏiɽoṯeḏa ḏan ḏikaiya ḏetɩdo na tia gwula

¹ na ḏa ŋɩmaje ḏibɩɽeḏa ḏe nanu ḏi kɩrisṯo, na ḏa ḏəmɩnyo ḏɩməṯi ŋɩma gwido nanu, na ḏa ŋɩmaga ŋɩmaje ŋeḏi gwuɽɩwə gwun gwɩpiḏo pɽul, na ḏa ŋino ŋe ḏugwor ŋɩmaje,

² enyeḏeico ḏidila ganu ḏinyi, kani anije lagalo gi ḏuməḏɩno ṯeno ḏetɩdo, nyəṯi ḏaminyiḏa ṯeno detɩdo, lulo le letɩdo alro ŋetɩdo.

³ aṯanyadujia ŋɩḏio ŋədi ḏɩkenyɩḏiḏio ḏe na ḏɩbuḏia lula lalo no, namɩni ḏɩtieno ḏe ouwɩricil gwete gwete aṯunarno gwiro kaja gwubuṯano kwulo gwuŋun.

⁴ aṯanyaŋalaḏa ŋɩdi ŋalo kuwei no, nyamɩni bunyi ŋɩḏio ŋun ŋiŋir ŋi liji lun liro kaja dino.

ḏəŋinio ḏe ḏɩṯieno gwula ḏeḏi yecu na ḏiḏəḏo gwula gwuŋun gwerkwe

⁵ na ŋeno alje lagalo ŋun ŋijo ḏi yecu kɩrisṯo dino,

⁶ gwun gwiro gi elo, namɩni ŋe ŋubiḏilɩŋe ŋɩma elo nate nulməṯo ŋono didir no,

⁷ numɩni duji gwula gwuŋun gi gwate gwəṯɩn ŋuɽuna ŋəḏi no, numɩni ro gi wainy numɩni lɩŋini nuro ŋi liji.

⁸ na gwune juga gwijoga gi gwiji, nuḏuji gwula gwuŋun gwɩti, nuəṯeije eloŋu gəni kəbe nuai, i ḏaiya gi luɽi lun lɩmalɩḏo ganu.

⁹ na ŋiro ŋeno ŋɩmaŋi elo diɽi nubuṯiane, nuḏəḏə jiri jolenelo gi jiri wei jun jiro kaja.

¹⁰ na gi jiri jeḏi yecu nalculɩjo ga ŋwurko ŋwe wei kanyin na ŋwun ŋwijo kwɩnyəm, na ŋwun ŋwijo kwɩnyəm ganu,

¹¹ na ḏiŋɩla wei dɩteijo ga nalarno yecu kɩrisṯo gwiro gwele, na ŋeno ŋəpijo eloŋu ḏɩbuḏia gwun gwiro baba.

ḏitɩnio ḏe ḏɩkədəḏɩnə ga

¹² na ŋiro dino nyaŋa lun ləmɩnyɩlo, gi gwune aṯeijonyalo nani bubruṯ, gwune gwədu jilo kuwei no, namɩni gwunnɩno ŋutəno ḏi mete no, enyeḏeicilo gi ḏɩkədəḏɩnə ga ḏalo ŋɩḏe ŋe na ḏubaga.

¹³ na elo gwiro gwun gwaṯape ŋɩru lagalo nyəmɩnyi nyanarre ŋuɽuna ŋun ŋəmɩnyulo.

¹⁴ apɩlo wei nyanɽudirḏɩno ganu no nyanpəḏiḏio ga no,

¹⁵ kani nyate nyəṯi ḏare no na ḏirḏeijo ganu no, nyaɽe nyeḏi elo nyun nyate nyəṯɩn ŋuɽuna nanu ŋədi no kɩlɩgi ganu gi liji lun late lɩḏuḏɩnu ga no na lun ləṯi ŋuɽuna ŋɩmanɩḏo ganu, nyoɽa ga kɩlɩgi ganu lagin gi lɩbure kɩḏilio;

¹⁶ nyalḏəḏə ŋuɽuna ŋe ḏɩmiḏa, na nyi gwabupaḏe ganu gi lamon leḏi kɩrisṯo, na nyi gwate gwaṯeneneḏe ŋa jai no, na dino nyi gwate gwaṯape ŋɩru kwɩḏon no.

¹⁷ yɩti, na ḏa ŋuwən ŋinyi ŋɩmadoijini ga gi ḏiḏuga ḏun ḏiro ḏɩməṯo ḏalo ḏun ḏaṯəpijo eloŋu, nyi gwadile ganu na iladile ganu wei.

¹⁸ na ŋiro dino nyaŋa nyaladile ganu, na iladile ganu nyi.

ṯimuṯawus

¹⁹ namɩni nyi gwuḏuḏɩnɩjo ŋuɽuna ŋeḏi gwele gwun gwan yecu nyi gwajiwəḏɩjo ṯimuṯawusŋ ŋwamon ŋwədi, nimɩni bɩɽe nanu gwune nidiŋɩni ŋuɽuna lagalo.

²⁰ namɩni gwate gwəṯɩn gwiro kaja gwiro gi ŋu no gwun gwanyagwideije ga ŋuɽun ŋalo.

²¹ gi gwune luŋa wei laṯɩbunyi ŋuɽuna ŋan lulo lagin, namɩni ŋədu ŋeḏi yecu kɩrisṯo no.

²² namɩni gwilɩŋiḏanya ŋɩru ŋe ŋuŋun galakwe gi ŋaɽeŋa baba gwe ŋapɩlŋe ŋɩru gi ḏidikaḏaica ŋuɽuna ŋiŋir ŋeḏi yecu kɩrisṯo.

²³ na ḏa nyi malɩŋe ŋuɽuna ŋun ŋiwilijo namɩni gwuŋwajiwəḏɩjo;

²⁴ namɩni nyi gelo ḏugwor ḏinyi kwele gwun gwiro elo nyi dino nyi gwara gwila ŋwamon ŋwədi.

abapruḏiṯus

²⁵ namɩni nyi gwarno arram nyi gwajiwəḏɩjo abapruḏiṯusŋ, gwun gwiro magəri gwapanagwe ŋɩru kal gete, na gwiro ajana yun yirranaye, na gwiro ḏuwəjo ḏalo lugwi na gwaṯɩnyiəpijo ŋɩdio ŋun ŋɩbɩɽaṯo lugwi.

²⁶ namɩni ŋu gwuɽinyiḏi kwururum lagalo na gwɩpiḏi ḏugwor gworki gi gwune nyaldiŋɩnu gwo gweḏeḏo nanu.

²⁷ na gwerkwe gwedeḏo nanu gwijo gɩṯo gwar gwai, namɩni ma elo inəḏo; na ŋu gwədu cucun no na nyi dino, kani ate a ḏɩrona baḏaṯa kworo elo no.

²⁸ na ŋiro dino nyi gwajiwəḏɩjo cou, na ḏa mara manyaŋu mɩna, namɩni nyaladile ganu na ḏɩrona ḏi ḏaro ḏɩtieno.

²⁹ na ŋiro dino maṯiḏile kwele gwun gwiro elo ḏidila ḏe ganu; aṯanyanəji gworo gi ŋu,

³⁰ gi gwune gwan ŋɩru ŋeḏi kɩrisṯo gwijo gɩṯo gwar gwai, namɩni gwate gwidɩmiḏi ḏɩmiḏa ḏuŋun no, kani ŋwenyeje ŋɩru lugwi ŋun ŋate ŋapanyalo no.