bilibi 1 - ŋuɽun ŋun ŋiya ŋun ŋikaiilo elo 1966

asa 1 ḏisalɩmia

¹ bulus na ṯimuṯawus, lun liro lɩwainy leḏi yecu kɩrisṯo, ano nulijo liji wei lun lɩpiḏo pɽul ḏi yecu kɩrisṯo lun lijo bilibi, luŋa leleŋale leḏi kɩniso na liji lun ləṯɩŋelejo lelɩnya uwə.

² ḏiŋiriḏa ḏaje lagalo na ḏouwɩɽiḏa ḏeḏi elo gwun gwiro baba gwage na gwele gwage gwun gwan yecu kɩrisṯo.

ḏeico eloŋu sukran na ḏidila ganu ḏeḏi bulus

³ nyi gwaṯeico eloŋu gwi sukran gi ḏaḏɩŋana wei nyaŋaije,

⁴ bubruṯ gi ḏuməḏɩjo eloŋu ḏinyi wei ŋiɽoṯeḏəṯɩlo lagalogwe wei ḏidɩla ḏe ganu,

⁵ ŋuɽun ŋe ŋouwiḏeicije ŋuɽun ŋun ŋiŋir ŋeḏi yecu kɩrisṯo gi lamon leḏi gwerre kəbe na gwunne.

⁶ ŋilɩŋiḏɩlo muma ŋeno gei ge nuarno, gwun gwiḏeijo ŋɩru galo lagalo ŋun ŋiŋir gulṯɩmi kəbe gi lamon leḏi yecu kɩrisṯo.

⁷ gi gwune ŋiŋir lugwi naṯɩlaḏɩŋane dino ŋe lagalo wei gi gwune nyi gwɩdɩmiḏeje gi ḏugwor ganu. nyaŋa wei ilro ŋɩmaga kal gete gi ḏiŋiriḏa, gi ḏikanana ga ḏinyi, na gi ḏiwəɽiḏino ŋuɽun ŋiŋir ŋeḏi yecu kɩrisṯo na gi ḏiḏuḏɩnio galo.

⁸ elo gwiro gwaŋiḏinyi galakwe jei jiɽinyiḏinyi kwururum ŋino ŋe ŋeḏi yecu kɩrisṯo.

ḏuməḏɩjo eloŋu ḏuŋun ḏan luŋa lun lapo jawab juŋun

⁹ na nyi gwaṯuməḏɩjo eloŋu kani a ḏəmɩnyo ḏalo baḏaṯe ḏutəno ḏutəno ḏilɩŋeḏa ḏe, nyalɩŋiḏene ŋuɽuna ŋun ŋiŋir na ŋun ŋɩki,

¹⁰ kani nyallɩŋe ŋun ŋiŋirano, nyaŋɩro liŋir nya late lape ḏare no kəbe gi lamon leḏi kɩrisṯo,

¹¹ nyaro lelenyeḏo nyaɽe nye nyeḏi ŋuɽun ŋun ŋiŋir nyun nyɩwiḏi yecu kɩrisṯo gwe, kani nyaŋaŋɩḏi ḏɩbuḏia ḏeḏi elo na ḏorṯeḏa.

ŋuɽun ŋun ŋɩmaje gi ḏikanana ḏuŋun

¹² na nyi gwubunyu nyalalɩŋe lɩmagəri, ŋuɽun ŋun ŋaṯɩnyiwilijo ŋiro ŋun ŋaṯaŋadikaḏaice kɩɽelo ŋuɽun ŋun ŋiŋir ŋeḏi yecu kɩrisṯo,

¹³ gi gwune ajana wei yeḏi dunu gweḏi gwele gwun gwubuḏo, na wei lun lɩṯanu lilɩŋiḏi galakwe nyikanano ga ḏi kɩrisṯo,

¹⁴ na lutəno lun liro limage lɩmabɩɽene nanu kwele gwun gwiro elo gi ḏikanana ga ḏinyi, naṯɩlumə ŋuɽuna ŋeḏi elo ḏibɩɽeḏa ḏe nanu late lɩḏonyo no.

¹⁵ na gwerkwe liji kworo nalumə kɩrisṯo gwe nalbunyi ḏɩkenyɩḏiḏia ganu ḏɩɽeḏa ḏe ganu, na kworo nalumə ḏiḏino ḏe dugwor.

¹⁶ na leno kworo nalumə ḏəmɩnyo ḏe, lilɩŋiḏi nyi gelɩnu ŋɩne ḏiwəɽiḏino ḏe ḏeḏi ŋuɽun ŋiŋir ŋeḏi yecu kɩrisṯo.

¹⁷ na lono kworo nalumə kɩrisṯo gwe ḏɩkenyɩḏiḏia ḏe ganu late ləṯɩn ŋuɽuna gi dugwor ganu ŋetɩdo no, nalro gi larno liɽiani ganu gi ḏikanana ga ḏinyi.

ŋu gwidilo ganu gi gwune liji laṯumə kɩrisṯo gwe

¹⁸ namɩni aŋ gwiro kwe? ŋiro ŋetɩdo, ḏa ŋɩmaro gwerkwe i ŋate ŋɩmaro gwerkwe no nalumə kɩrisṯo gwe; na ŋiro dino nyi gwadile ganu, yɩti, nyi gwadile ganu.

¹⁹ na nyi gwilɩŋiḏi ŋuɽuna ŋeno ŋakamana kəbe ŋinyikədəḏə ga ḏuməḏɩjo ḏe eloŋu ḏalo na ḏigeleja uwə ḏeḏi gwuɽɩwə gweḏi yecu kɩristo.

²⁰ na ŋuɽun ŋeno ḏeṯeḏa ḏinyi na ḏiḏuḏɩnɩjo ḏinyi ḏiwiḏi kal gete na ŋuɽun ŋədi ŋate ŋinapi ḏare no, namɩni ḏibɩɽeḏa ḏe nanu wei ḏiro gi bubruṯ, na gwunne dino kɩrisṯo gwubuḏi kaŋɩnu yinyi, na ḏa nyi mamiḏe i nyi mai.

ḏimiḏa na ḏaiya ŋiro ŋaḏa ŋun ŋiŋirano?

²¹ ḏɩmiḏa ḏinyi ḏiro kɩrisṯo, na ḏaiya ḏiro ḏiḏiena ga.

²² na ḏa nyi mamiḏe kaŋinu yinyi, ḏɩmiḏa ṯeno ḏiro ḏɩɽa ŋɩru ŋinyi. na nyi gwate gwilɩŋiḏi nyi gwaməṯo aŋe no.

²³ na ŋeno berene ŋɩmirgwogɩnyeje. nyi gwəṯi ḏugwor gworki nyi gwarno nyi gwele anaje kɩrisṯo gwe, na ŋeno ŋiŋirano gworki.

²⁴ namɩni ḏa nyi majɩre ŋɩne aginu ye, ŋeno ŋiŋirano gwerkwe ŋan nyaŋa.

²⁵ na gi gwune ŋilɩŋiḏɩlo ŋeno muma gei ge nyi malɩŋe nyi gwajɩre ŋɩne lagalo wei, nyi dikaḏaice ḏɩməṯo ḏalo kɩɽelo, na ḏidɩla ganu ḏalo lugwun.

²⁶ na nyi gwe ḏiḏɩla ḏe ḏalo ḏabəḏəṯɩni ḏi yecu kɩrisṯo gwan ḏaɽuwa ḏi lagalo mɩna.

ŋuɽun ŋe ḏibɩɽia liji nanu

²⁷ na ouwɩricil ŋuɽuna ŋalo wei ŋideleḏo ŋuɽun ŋiŋir ŋeḏi kɩrisṯo namɩni ḏi mila nyi gwajaŋu namɩni ḏa imanete, nyi gwadiŋɩni gwan nyaŋa, nyaŋa nyamaṯaḏe kwuɽɩwə gwetɩdo, lulo le letɩdo nyapade ŋɩru nyaje muma ḏɩməṯo ḏe ḏeḏi ŋuɽun ŋiŋir ŋeḏi yecu kɩrisṯo,

²⁸ nya lo lanḏe ŋuɽuna ŋədi gi liji lun lidonyaje, na ŋuɽun ŋeno ŋalilaŋijo daṯ dagin deḏi ḏaiya, namɩni ŋalo ŋajaŋijo ḏɩkədəḏɩnə ga, na ŋeno ŋeḏi elo ŋiro.

²⁹ na majiḏəḏə ŋuɽuna gwan kɩrisṯo nya lo ləmɩnyi kɩrisṯoŋ kuwei, namɩni ŋanje lagalo ŋajiniḏi gwan ŋu dino.

³⁰ na nyaŋa dino nyaləṯi ḏɩrra ḏun ḏaŋəḏenya lugwi na gwunne nyadiŋɩni ḏo lugwi.