awisus 6 - ŋuɽun ŋun ŋiya ŋun ŋikaiilo elo 1966

asa 6

¹ nyaŋa nyaɽe, deŋɩnejɩlo lun lilɩŋiḏaje kwele gwun gwiro elo, gi gwune ŋeno ŋiŋir.

² na ŋuɽun ŋun ŋiro lɽa kworo gwun gwugelijɩlo elo musaŋ ŋun ŋəṯi ŋuɽuna ŋe ḏiḏəḏo ŋiro ŋeno, nəji babaŋ gwuŋa na nanaŋ gwuŋa,

³ kani ŋəṯi ḏiŋiriḏa na ŋəṯi jɩḏilio jola ganu kɩḏilio

⁴ na nyaŋa babaŋa, aṯanyaɽia nyaɽe nyalo ganu no, nyalmɩni ḏuḏɩni ga ḏiḏuḏɩno ḏe ḏedi gwele gwun gwiro elo na ḏigireṯɩnyeḏa ḏuŋun.

⁵ nyaŋa lɩwainy, əṯeijɩlo nəni luŋa lun liro lele lalo kalo geḏi ŋɩru ŋagin, ŋɩḏe ŋe na ḏuba ḏe ga, na dugwor de detɩdo gi gwune nyanəpijo kɩrisṯoŋ ŋɩru,

⁶ ŋədu ŋɩru ŋe ŋeḏi gei ŋun ŋaṯiŋirj liji dugwore no, nyamɩni ro gi lɩwainy leḏi kɩrisṯo, ŋidujianyalo ŋuɽun ŋe ŋun ŋɩbunyɩlo elo gi dugwor.

⁷ ŋapanyalo ḏiḏino ḏe dugwor diŋir gi ŋeḏi gwele gwun gwiro elo, ate alro gi ŋe liji no.

⁸ nyalɩŋiḏi ḏa gwiji maduji ŋɩru ŋete ŋun ŋiŋir, na dino ŋaje ŋulape kwele gwun gwiro elo ḏa ŋu maro wainy i gwate maro wainy no.

⁹ na dino nyaŋa lele leḏi lɩwainy, dujɩlo ŋeno nyalouwɩrico ḏɩgɩreṯɩnyeḏa ḏe; nyalɩŋiḏi nanyarno, gwele gwalo dino gwo kanyin, na gwate gwaṯuəmɩmyene gwete kworo no.

ŋɩdi ŋe ḏɩrra ŋeḏi liji lun liro lɩkɩristin

¹⁰ na gɩdo ganu nyaŋa lɩmagəri, bɩɽiḏɩl nanu kwele gwun gwiro elo, na gi ḏibɩɽeḏa nanu ḏe ŋɩma ŋuŋun.

¹¹ kanɩl ŋɩdio wei ŋe ḏɩrra ŋeḏi elo, kani nyəṯi ŋɩma nyedɩminɩjo ŋɩdiginə ga ŋeḏi iblis.

¹² gi gwune ḏɩbula ḏage ḏədu aŋɩnu ye na ŋuwən ŋe no, numɩni ro leleŋale leḏi kanyin, na ŋele, na lele leḏi gɩḏilio leḏi girɩm keno geḏi gwunnɩno, na diŋeromŋale dun dɩki kalo geḏi kanyin.

¹³ na dino apɩlo ŋɩdio wei ŋe ḏɩrra ŋeḏi elo, kani nyəti ŋɩma nyajiḏuḏɩni gi lamon lun lɩki, na ḏa ŋɩmanyalduji wei, nyalaje muma.

¹⁴ ḏuḏɩnil muma dino ŋɩkananyalo ŋwɩbuɽi ŋeḏi ŋuɽun ŋun ŋiro gwerkwe, nyalkanu gwaŋe gwe ḏipiḏa pɽul gwun gwedɩme jabbaŋ jalo,

¹⁵ nyaldɩminu ŋwara ŋwalo ḏiḏɩmino ḏe ga ḏeḏi ŋuɽun ŋun ŋiŋir ŋeḏi yecu kɩrisṯo ŋe ḏouwɩɽiḏa,

¹⁶ ŋapanyalo kworo elo kweno wei ləru le ḏɩməṯo ḏun ḏanyaḏəṯi ŋɩma ŋanyaŋiɽinye nyire nyeḏi seiṯan nyun nyiido ganu gamgam.

¹⁷ na apul lumɩra le ḏɩkədəḏɩna ŋa, na kɩwiḏio ŋeḏi gwuɽɩwə gwun gwɩpiḏo pɽul ŋun ŋiro ŋuɽun ŋeḏi elo.

¹⁸ aṯanyuməḏɩjo eloŋu ḏuməḏɩjo ḏe wei, na ḏiɽoṯeḏa ḏe ŋwamon wei kwuɽɩwə, na ḏigɩrino ḏe aṯanyartonyiḏa no, na ḏiɽoṯeḏa ḏe gwan liji wei lun lɩpiḏo pɽul,

¹⁹ nyuməḏəṯɩjo eloŋu lugwi dino kani ŋwiḏəḏə ŋuɽuna kaja ge ḏiḏo linyu linyi ilteije ga puɽəny kani a liji lɩŋe ŋun ŋɩlɩbo ŋeḏi ŋuɽun ŋun ŋiŋir ŋeḏi yecu kɩrisṯo,

²⁰ na gwan ŋeno nyi gwiro ḏuwəjo nyikanano ga ajirɩjir ye, kani ilteije ga puɽəny gi gwune ŋideleḏo ŋiluma.

ŋuɽun ŋun ŋiro gɩdo

²¹ namɩni kani nyalɩŋe dino ŋɩrṯa ŋiro lugwi, na ŋɩrṯa ŋərrɩlo, ŋajɩl tikikus uməḏɩjo wei, gwun gwiro mage gwun gwəmɩnyɩnu na gaḏam gun giŋir gɩḏuḏɩnu ga kwele gwun gwiro elo,

²² gwun wəji lagalo ŋuɽunŋ ŋe kani nyalɩŋe ŋan anaŋa na ŋamoɽe dugwor dalo ŋanu.

²³ ḏouwɩɽiḏa ḏaje gi lɩmage na ḏəmɩnyo, ḏɩməṯo ḏe ḏeḏi elo gwun gwiro baba na gwele gwun gwan yecu kɩrisṯo.

²⁴ ḏiŋiriḏa ḏaje gi liji wei lun ləmɩnyu gwelɩnya gwage gwun gwan yecu kɩrisṯo ḏəminyo ḏe ḏun ḏate ḏai no.