awisus 5 - ŋuɽun ŋun ŋiya ŋun ŋikaiilo elo 1966

asa 5

¹ arrɩlo dino gi elo gi nyaɽe nyun nyəmɩnyɩnu,

² na aṯanyawewele gi ḏəmɩnyo ganu gi gwune əmɩnyijine kɩrisṯo dino, nuḏəḏə gwula gwuŋun ḏaiya gwan liŋə gi ŋɩdi ŋun ŋiḏəḏɩlo elo ga dino na ḏiḏugɩno ḏun ḏəṯi ŋɩḏini.

³ namɩni ŋuɽun gi ŋeḏor na wei ŋun ŋiro ŋɩrleḏ, na ŋuɽun ŋun ŋaṯajɩŋi ŋɩdi dela ganu ŋeḏi liji, aṯanyanuməḏo minu no, gi gwune ŋate ŋideleḏo gi liji lun lɩpiḏo pɽul no.

⁴ nya lo luməḏə ŋuɽuna ŋun ŋɩki, na ŋuɽun ŋun ŋɩki ŋe ḏara ŋɩɽilo ŋe, na ŋuɽun ŋun ŋɩkeḏo, ŋun ŋate ŋideleḏo no; namɩni ŋiŋirano aṯare sukran.

⁵ namɩni lɩŋiḏɩlo ŋeno muma, gwiji gwun gwaṯure, na gwun gwɩki, na gwun gwideleḏi ŋɩdi ganu na ŋuɽun ŋeno ŋiro ḏorṯeḏa ŋɩdio, gwate gwaɽenyeḏe ŋele ŋeḏi kɩrisṯo na elo no.

⁶ aṯanyouwɩrico gwete gwajirdəḏeico ŋuɽun ŋe ŋun gate jei ganu no, gi gwune ŋuɽun ŋeno ŋaṯɩɽi eloŋu ganu gi nyaɽe nyun nyaṯakɩra ŋuɽuna duɽo de.

⁷ aṯanyalijaga kal gete no,

⁸ gi gwune gwerre nyalro girɩm, namɩni gwunnɩno nyalmaro bure kwele; wiwiḏɩl gi nyaɽe nyeḏi bure,

⁹ gi gwune nyaɽe nyeḏi bure nyaɽe gi ḏiŋiriḏa wei na ŋuɽun ŋun ŋɩŋɩr, na ŋuɽun ŋun ŋiro gwerkwe,

¹⁰ giluḏɩl ga ŋiro ŋaḏa ŋe ŋun ŋai gwele əmɩnyi gwun gwiro elo.

¹¹ aṯanyalouwiḏaṯa ŋɩru ŋeḏi girɩm no ŋun ŋate ŋəṯi nyaɽe no, namɩni lanyaloɽa.

¹² gi gwune ḏuməḏəṯo ŋuɽun elo ŋun ŋapɩlo nyikwom ḏare ḏiro.

¹³ gi gwune wei ḏa lɩmanyaloɽa gwaŋini kwu bure, gi gwune wei ŋun ŋaŋinu ŋu gwiro bure.

¹⁴ na dino nuarno, girinu, ŋa gwun gwuḏɩro ŋadiɽi gi liji lun laiyo, na kɩrisṯo gwaŋuɽəḏɩjo ŋa.

¹⁵ jil muma galakwe nyalawewele miloḏ mice, nyaduḏa gi liji lun liro jɩɽilo no, nyamɩni ro gi lun ləṯi ŋadɩgɩɽenya,

¹⁶ nyaməṯo gaja gi gwune ŋwamon ŋwɩki.

¹⁷ na dino nyaduḏa jɩɽilo no, nyamɩni ro lun liri jei ŋa ŋɩrṯa ŋiro ŋun ŋɩbunyɩlo gwele gwun gwiro elo.

¹⁸ aṯanyɩrləlo ŋɩmidiə ŋe no, ŋun ŋaṯɩgwuloḏa gwiji gi ḏapa ŋuɽuna ŋun ŋɩki gwun gwate gwiro gwele kaŋɩnu yuŋun no, aṯanyamɩni enyeḏe gwuɽɩwə ganu gwun gwɩpiḏo pɽul,

¹⁹ nyuməḏəṯe lagaloŋu delɩŋa de de ḏorṯeḏa eloŋu, na delɩŋa de ḏeḏi gwuɽɩwə nyalelɩŋe delɩŋa gi dugwor ganu dalo kwele gwun gwiro elo,

²⁰ ḏeico ḏe eloŋu sukran gɩṯogɩṯo gwun gwiro baba ŋɩdi wei jiri je jeḏi gwele gwage gwun gwan yecu kɩrisṯo.

²¹ dɩtienɩjil gworo ŋɩḏe ŋe ŋeḏi kɩrisṯo.

ḏɩmiḏa ḏeḏi liji leḏi dunu lun liro lɩkɩrisṯin

²² nyaŋa la, deŋɩnejil ləmɩnyəŋe lalo gi nyandeŋɩnejo gwelɩnya gwun gwiro elo.

²³ gi gwune gwəmɩnyo gwiro lɽa leḏi gwa ŋiro gi gwune kɩrisṯo dino gwiro lja leḏi kɩniso. na ŋu gwiro gwun gwukədəḏi aŋɩna ga.

²⁴ namɩni gi gwune aṯi kɩniso deŋɩnejo kɩrisṯoŋ, na dino la deŋɩnejo ləmɩnyəŋe lagin ŋuɽun ŋe wei.

²⁵ nyaŋa ləmɩnyo, amɩnyul la lalo ŋiro gi gwune əmɩnyu kɩrisṯo dino kɩniso, nuḏəḏə gwula gwuŋun gwan ŋu,

²⁶ kani nupiḏi pɽul nuwei ŋau ŋe ŋeḏi ŋuɽun,

²⁷ kani nuwəɽijo gwula gwuŋun kɩniso giŋir gworki ŋate gəṯi gwaŋ gwədi nanu no, i jirigiginya nanu no, i gwaŋ gwetɩdo gwiro dino no, numɩni ro gun gipiḏo pɽul gate gəṯi ḏare nanu no.

²⁸ na ŋiro dino arram ləmɩnyo aləmɩnyi la lagin gi jiŋɩno jagin, na ŋu gwun gwəmɩnyu gwa gwuŋun gwəmɩnyu gwula gwuŋun.

²⁹ gi gwune gwiji gwatɩn gwetɩdo gwaṯɩdonye aŋɩna yuŋun ḏuṯ no, namɩni yaṯuʼi nudɩme, gi gwune kɩrisṯo dino gwaṯiʼi nudɩme kɩniso,

³⁰ gi gwune liŋə ileḏi aŋɩnu yuŋun.

³¹ na ŋuɽun ŋeno gwəmɩnyo gwawalane ḏi baba gwuŋun na nana gwuŋun almaṯiḏe gwa gwe gwuŋun, na leno lɩttən laro aŋɩnu yetɩdo.

³² ŋeno ŋiro ŋuɽun ŋun ŋɩlɩbo, namɩni nyi gwuməḏəṯi ḏi kɩrisṯo na kɩniso.

³³ namɩni nyaŋa gwete gwete naṯuəmɩnyi gwa gwuŋun na dino gi aŋɩnu yuŋun, namɩni gwa aṯujənijo gwəmɩnyaŋe gwuŋun.