awisus 4 - ŋuɽun ŋun ŋiya ŋun ŋikaiilo elo 1966

asa 4 ḏorniḏa ḏagin ḏi elo na ḏikaiya ḏeṯɩdo

¹ na dɩno nyi gwun gwiro babuny gwan gwele gwun gwiro elo, gwuɽoṯeḏo lagalo gworki aṯanyawele ŋuɽun ŋe ŋun ŋideleḏo ḏorniḏa ḏe ḏun ḏorniḏajilḏe,

² ḏɩtieno ḏe ḏeḏi gwulo na gwuɽɩwə, aṯanyaməṯo ḏugwore ŋɩmaga lagaloŋu ḏəmɩnyo ḏe.

³ na ŋɩma ŋalo wei nyaliḏeije nyaladɩmiḏe ḏɩmaṯiḏa ḏe ḏeṯɩdo ḏeḏi gwuɽɩwə gwun gwɩpiḏo pɽul gi ḏɩkanana ḏe ḏouwɩɽɩḏa.

⁴ aŋɩnu yo yetɩdo, na gwuɽɩwə gwo gwetɩdo gwun gwɩpiḏo pɽul, ŋiro gi gwune orniḏajilo dɩno gi ḏiḏuḏɩnɩjo ḏetɩdo ḏe ḏorniḏa ḏalo.

⁵ na gwele gwo gwetɩdo gwun gwiro elo, na ḏɩməṯo ḏo ḏetɩdo, na ḏibabṯaijɩno ḏo ḏetɩdo;

⁶ na elo na baba gwo gwetɩdo gweḏi liŋə wei, gwun gwiro kɩɽelo lage wei, na gwəṯɩje kalo wei, na gwəṯɩje lagalo wei.

⁷ na ḏiŋiriḏa ḏun ḏiḏəḏijɩlo gwete gwete, ḏiḏəḏije ŋiro gi ḏigəgɩnyəḏɩjo ganu ḏe ḏiḏəḏo ḏeḏi kɩrisṯo.

⁸ na ŋuɽun arno, gwune nuabo kanyin nulgwulo lutu lun lɩkaiulo lun lɩmulḏami, nuḏoḏo lijɩ ḏiḏəḏo.

⁹ namɩni ŋu mabo namɩni ŋate ŋaro dino gwugwulu gwerre kalo gun gelio gwe kwɩnyəm na?

¹⁰ na ŋu gwun gwugwulu gwiro gwun gwɩmabo dino kɩɽelo ŋɩdi wei ŋeḏi kanyin kani ŋuenyeji ŋɩdio wei.

¹¹ nulḏəḏə kworo alro duwəjo, na kworo alro nebɩŋa, na kworo alro lun laṯuməḏɩjo liji ŋuɽuna ŋiŋir ŋeḏi yecu kɩrisṯo, na kworo alro laɽa na limuwalɩm,

¹² kani a liji lun lɩpiḏo pɽul alro muma ŋɩdi wei, gi ḏapa ŋɩru ŋeḏi kɩniso geḏi elo, na ḏuṯa ḏeḏi aŋɩnu yeḏi kɩrisṯo,

¹³ kəbe liŋə wei ilṯɩmi gi ḏɩmaṯiḏa ḏetɩdo ḏe ḏɩməṯo na ḏilɩŋeḏa muma ḏeḏi ŋaɽe ŋeḏi elo, na ilmaro gi gwiji gwun gwuɽun, na ilməṯɩmi kəbe milidaḏiga ḏenyeḏa ḏeḏi kɩrisṯo,

¹⁴ nate nilro nyaɽe minu no, ilo ŋilinuri ga ŋiro kaja ḏɩron ḏe ḏeḏi ḏalɩmia ḏiro kajakaja, ḏirdəḏeico ḏe ḏeḏi liji ḏun ḏaṯijigwuloḏa kaja ŋuɽun ŋun ŋɩki;

¹⁵ nilmɩni ro lun laṯumə ŋuɽuna ŋun ŋiro gwerkwe gi ḏəmɩnyo, ilbuḏe lugwun ŋuɽun ŋe wei. na ŋu gwiro lɽa gwun gwan kɩrisṯo,

¹⁶ na aŋɩnu wei yɩkanu kal gete ŋu gwe na yɩmaṯiḏo ganu ŋwuɽigiḏi ŋwe na dri de dun diḏəḏɩnu lugwun, na ŋiro gi ŋɩdi wei gete gete ŋaṯape ŋɩru muma ŋɩma ŋe ŋuŋun, ŋaṯɩbuḏi aŋɩna nalbɩɽi gwula gwuŋun nanu gi ḏəmɩnyo.

ḏɩmiḏa ḏun ḏuɽun na ḏun ḏiya

¹⁷ na dino nyi gwuməḏɩjaje ŋuɽuna ŋeno niteije ga kwele gwun gwiro elo, nya lo lawewele ŋwamon ŋwutəno gi gwune aṯɩn liji wewele lun liro ga dino, ŋuɽun ganu ŋun ŋiro ga jai geḏi ŋadɩgɩɽe ŋagin,

¹⁸ nalrimi gadɩgɩɽenya ganu, nalmaro kaja ḏi elo ŋɩɽilo ŋe ŋun ŋijo lagin, gi gwune dugwor dagin dɩbɩɽe,

¹⁹ naldarane kəbe nate naldiŋɩni ŋuɽuna ŋeḏi gwuɽɩwə no, nalḏəḏə lula lagin ŋuɽuna wei ŋun ŋɩki ŋe ḏidonyɩḏa ḏɩməṯo jiŋino, nalbunyi gworki nalduji ŋuɽuna wei ŋun ŋiro ŋɩrleḏ.

²⁰ namɩni nya late lalɩminu dino ḏi kɩrisṯo no—

²¹ ḏa ŋɩmaro gwerkwe ŋɩdiŋɩnanyalo na nyalɩmini lugwun, gi gwune ŋiro gwerkwe ḏi yecu,

²² nyawal ŋuɽuna ŋun ŋuɽun ŋun ŋəṯanyalo gwerre ŋun ŋaṯɩdigɩɽe ḏibunya ḏe ḏalo ḏaṯajirdeijo ganu,

²³ nyalkədini liya kwuɽɩwə gwalo na ŋadɩgɩɽe ŋalo.

²⁴ nanyakaii lula lalo ŋuɽun ŋe ŋun ŋiya ŋun ŋiro gi gworo gweḏi elo na ŋaŋinu ŋuɽun ŋe ŋun ŋiŋir na ḏɩɽiḏa pɽul.

ŋuɽun ŋun ŋigelejilɩlo uwə gi ḏɩmiḏa ḏagin

²⁵ na dino aṯanyawini ŋɩwɩɽɩgal ŋe lagaloŋu, nyumə ŋuɽuna ŋun ŋiro gwerkwe wei gwete gwete lun lijaḏanyale ga, gi gwune liŋə ilro ŋɩmaga kaŋɩnu yetɩdo.

²⁶ na ḏa nyalmaɽe ganu namɩni nya lo lanouwɩrico ḏɩɽeḏa ŋanu ḏalo ḏajigwuloḏa ŋuɽun ŋanu ŋun ŋɩki; nya lo laje ŋanu kəbe anyin yabɩɽe,

²⁷ na nya lo ləḏəḏə iblisŋ gala.

²⁸ na ŋu gwun gwiro gwuɽam gwo gwanape ŋuɽama min, ŋumɩni ape ŋɩru muma di de ŋɩru ŋun ŋiŋir, kani ŋuəṯi ŋɩdio ŋulḏəḏə gwun gwibɩɽaṯo ŋɩdio.

²⁹ nya lo louwɩrico ŋuɽuna ŋun ŋɩki ŋəduḏə ŋwinyu ŋwalo, namɩni wei ŋun ŋiŋir nyaŋabɩɽi gwiji nanu, na ŋalḏəḏə ḏiŋiriḏa lun lɩdiŋɩnu.

³⁰ nya lo laroni gwuɽɩwə gweḏi elo gwun gwɩpiḏo pɽul, na lugwun nyalmamɩɽeḏini kaṯɩm ge gwan lamon le ḏɩkədəḏɩnə ga.

³¹ winil lagaloŋu ŋuɽun ŋe wei ŋun ŋɩɽi, na ḏɩɽeḏa ganu, na ḏɩɽeḏa ganu gworki, na ŋɩrəkwəno, na ḏuməḏəṯo gi liji elo ŋuɽun ŋun ŋɩki, na ḏɩkia mage,

³² na duḏil lijo ŋɩmaga lagaloŋu, nyorowe dugwor, aṯanyaḏuḏɩjo gworo ganu gi gwune ḏuḏijejɩne elo ganu dino kɩrisṯo gwe.