awisus 3 - ŋuɽun ŋun ŋiya ŋun ŋikaiilo elo 1966

asa 3 ḏuwəja ḏeḏi bulus ḏiro ḏəŋinio ŋuŋun ŋun ŋɩlɩbo ŋeḏi elo

¹ na gwan ŋuɽun ŋeno, nyi gwan bulus gwun gwiro babuny gweḏi yecu kɩrisṯo gwan nyaŋa lun liro liji lun liro ga dino,

² gi gwune nyaldiŋɩnu ŋɩru ŋe ŋeḏi ḏiŋiriḏa ḏeḏi elo ḏun ḏiḏəḏɩnyi gwan nyaŋa,

³ na galakwe ŋu gwaŋijɩnyi ŋuɽuna ŋun ŋɩlɩbo, gi gwune gwulijaje gwerre ŋuɽuna ŋɩti,

⁴ na ŋanyaləgɩri ŋeno nyalalɩŋe ḏilɩŋeḏa ḏinyi ŋuɽun ŋun ŋɩlɩbo geḏi kɩrisṯo,

⁵ ŋun ŋate ŋilɩŋiḏɩnu gi nyaɽe nyeḏi liji leḏi jɩḏilio jeḏi gwerre no, gi gwune ŋaŋinu gwunnɩno gi duwəjo duŋun dun dɩpiḏdo pɽul na nebɩŋa, gwuɽɩwə gwe gwun gwɩpiḏo pɽul.

⁶ na ŋuɽun ŋeno ŋun ŋɩlɩbo ŋiro dino, liji lun liro ga dino liɽenyeḏo kal gete lijuŋale, lɩkanano kaŋɩnu yetɩdo, naləṯi ŋɩmaga ŋuɽun ŋun ŋarɩŋe elo ŋulɩḏəḏə ḏi kɩrisṯo gwun gwan yecu, ŋun ŋaŋinu ŋuɽun ŋe ŋun ŋiŋir geḏi yecu kɩrisṯo.

⁷ na ŋuɽun ŋeno nyi gwidujɩnu gaḏam ḏiḏəḏo ḏe ḏiŋiriḏa ḏeḏi elo ḏun ḏiḏəḏinyi, ŋɩma ŋe ŋuŋun ŋun ŋaṯape ŋɩru lugwi.

⁸ namɩni nyi gwun gwɩtieno gi liji wei lun lɩpiḏo pɽul nugwiḏəḏə ḏiŋiriḏa ṯeno, kani nyiuməḏɩjo liji lun liro ga dino ŋuɽuna ŋun ŋiŋir ŋe ḏɩbona ḏeḏi kɩrisṯo ḏun ḏate ḏəṯi ŋɩma ḏa liji lɩŋe no,

⁹ na ŋwoɽejo liji galo wei gwan ḏidujia ḏeḏi ŋuɽun ŋun ŋɩlɩbo ŋun ŋɩlɩbo ḏi elo gwerre gwune gelu gɩḏilio, gwun gwugelo ŋɩdio wei;

¹⁰ kani a liji leḏi kanyin na ŋele ŋeḏi kanyin allɩŋe gwunnɩno kɩniso ge, ḏilɩŋeḏena ḏeḏi elo ḏun ḏutu ḏutu ganu,

¹¹ ŋiro gi ŋuɽun ŋun ŋaṯijaḏaṯa gi gɩḏilio ŋun ŋarɩŋe elo ŋularre kɩrisṯo gwe gwun gwiro gwele gwage,

¹² na lugwun iləṯi ḏibɩɽeḏa nanu nildɩrkaḏaṯa ḏi elo ilate ləṯɩn ŋɩḏe no, ḏɩməṯo ḏe lugwun.

¹³ na dino nyi gwuɽoṯeḏo lagalo gworki, nya lo lartonyiḏe gi ḏɩḏia ḏinyi gwan nyaŋa: gi gwune ṯeno ḏiro ḏoɽeḏa ḏalo.

ḏuməḏɩjo eloŋu ḏan ḏiḏɩŋina ŋuɽuna ŋun ŋiŋir ŋeḏi yecu kɩrisṯo

¹⁴ na gwan ŋuɽun ŋeno nyi gwuculɩjo babaŋ ga ŋwurko ŋwe,

¹⁵ na lugwun əriḏ wei kanyin na kwɩnyəm yaṯape jiri jagin.

¹⁶ na nyi gwuɽoṯeḏo lugwun kani gwajilḏəḏə ŋiro gi ḏɩbona ḏe ḏoɽeḏa ḏuŋun nyabɩɽe nanu ŋɩma ŋe gwuɽɩwə gwe gwuŋun gi dugwor ganu dalo,

¹⁷ kani a kɩrisṯo jaḏaṯa gi dugwor ganu dalo ḏɩməṯo ḏe, nanyaləḏɩjo dro ga nyaməṯo ga gi ḏəmɩnyo,

¹⁸ na nyəṯi ŋɩma nyalɩŋe muma lijiŋale wei lun lɩpiḏo pɽul, na nyalaməṯo aŋ gwiro wɩraga na gwola nanu, na gwola ganu, na ḏolenelo ḏe ḏeḏi ḏəmɩnyo ḏeḏi elo,

¹⁹ na nyalɩŋe ḏəmɩnyo ḏeḏi kɩrisṯo ḏun ḏutu gworki kəbe na gwatɩn gwetɩdo ḏunlɩŋe no, kani nyenyeḏe ḏenyeḏa ḏe wei ḏeḏi elo.

²⁰ na elo gwun gwəṯi ŋɩma ŋwulduji ŋutəno gworki ŋun ŋaṯɩliɽoṯeḏe i ŋun ŋaṯɩluməḏɩni ŋɩro gi ŋɩma ŋun ŋərrulo lage,

²¹ ḏoɽeḏa ḏaje lugwun kɩniso na yecu kɩrisṯo gwe jɩḏilio wei gi gɩḏilɩo. gwerkwe.