awisus 2 - ŋuɽun ŋun ŋiya ŋun ŋikaiilo elo 1966

asa 2 ḏikədəḏinə ga ḏe ḏiŋiriḏa ḏeḏi elo

¹ na elo gwajimiḏi nyaŋa dino, gwune nyalaiyo ŋuɽun ŋe ŋalo ŋun ŋɩki na ḏɩkeḏa ḏalo,

² ḏun ḏaṯanyanwewele gwerre, nanyagwujane ŋuɽuna ŋeḏi gɩḏilio keno, na gwele gweḏi ŋele ŋe ḏɩron, gwun gwiro gwuɽɩwə gwun gwaṯape ŋɩru gwunnɩno gi nyaɽe nyun nyaṯakɩra ŋuɽuna duɽo de.

³ na kɩlɩgi ganu lagin liŋə dɩno ləṯɩwewele kaja geḏi gwerre gi ḏibunya ḏeḏi jiŋɩno jage na ŋadɩgɩɽe, na iljo gi ḏilɩŋino nyaɽe nye ḏɩɽeḏiḏia ganu gi lun liro kaja dino.

⁴ namɩni elo gwun gwutu gino, gi gwune ḏəmɩnyo ḏuŋun ḏun ḏutu ḏun ḏaminyijiḏe,

⁵ gwune aiyilo ŋuɽun ŋun ŋɩki mijimiḏi kɩrisṯoŋale—nyaŋa lɩməkədəḏɩni ga ḏiŋiriḏa ḏe—

⁶ manaldiɽi na manalijiga kalo geḏi ŋele ŋeḏi kanyin ḏi yecu kɩrisṯo,

⁷ kani kaja gun gila nuəŋiḏi ḏɩbona ḏe ḏiŋiriḏa ḏuŋun ḏun ḏutu gworki ŋino ŋe ŋun ŋəṯulo lage ḏi yecu kɩrisṯo.

⁸ gi gwune nyaŋa ḏiŋiriḏa ḏe nyalməkədəḏɩni ga ḏɩməṯo ḏe, na ŋədu ŋeḏi ŋuɽun ŋun ŋapanyalo no, namɩni ḏiḏəḏo ḏeḏi elo ḏiro;

⁹ na ŋədu ŋeḏi ŋɩru kani ate aṯɩn gwiji gwetɩdo abupaḏa ganu no.

¹⁰ gi gwune ilro ŋɩdi ŋun ŋɩkədɩnu di de ḏeḏi elo, ilgelɩnu ḏi yecu kɩrisṯo kani ilape ŋɩru ŋun ŋiŋir, ŋun ŋigelilo elo gwerre kani ilɩnduji.

liji lun liro ga dino na lun liro liju lɩmaṯiḏo kɩniso

¹¹ na dino aḏɩŋanɩl, gwerre ganu nyalro liji lun liro ga dino ŋuɽun ŋeḏi jiŋɩno, lun laṯɩleico late luɽəno no, luŋa le lun laṯɩleico luɽəno gi jiŋɩno ŋɩru ŋe ŋeḏi di,

¹² na kaja kono nyalduḏi ganu ḏi kɩrisṯo; nyalro liji liro kaja gi liji leḏi isreiyil, na nya late ləṯi gala ŋuɽun ŋun ŋikaiilo elo ŋan ḏiḏəḏo ḏeḏi kɩrisṯo no, na nya late ləṯi ḏiḏuḏɩnɩjo no, na nyalijo kɩḏilio late eloŋu no.

¹³ namɩni gwunnɩno ḏi yecu kɩrisṯo nyaŋa lun lijo uro kaja gwerre ganu, na nyalmaḏɩkaḏa ŋuwən ŋe ŋeḏi kɩrisṯo.

¹⁴ gi gwune ŋu gwiro ḏouwɩɽiḏa ḏage gwun ləwidiŋwul nanu lun liro ganu lɩttən nulduji letɩdo; na gwaki ḏimɩlia ḏun ḏijo kɩlɩgi ganu ḏun ḏiro ḏɩkiḏiḏia,

¹⁵ na kaŋɩnu yuŋun yɩmeti ŋuɽuna ŋun ŋigelijilo elo musaŋ ŋan ŋuɽun ŋun ŋɩtumuḏu na ŋun ŋilarre, nuarre dino kani ŋulkade lun liro lɩttən gwiji gwetɩdo gwun gwiya kwulo gwuŋun, na ŋiro dino gwugele ḏouwɩɽiḏa,

¹⁶ na dino nulouwɩɽiḏi lun liro lɩttən ḏi elo kaŋɩnu yetɩdo luɽi le luŋun lun lɩmalɩḏo ganu, gi gwune gwuɽinyiḏilo ḏɩkiḏiḏia ḏe luɽi le leno.

¹⁷ na ŋu mila nuŋwajuməḏɩjo ŋuɽuna ŋun ŋiŋir ŋe ḏouwɩɽiḏa lun lijo uro kaja na liji lun lijo gɩṯo,

¹⁸ gi gwune ŋu gwe liŋə kal gete iləṯi ḏəḏio kal gete gwuɽɩwə gwe gwetɩdo gwun gwɩpiḏo pɽul ḏi baba.

¹⁹ na dino nyaŋa late liro liji lun liro kaja gi ḏɩjaga kaja na lun liwɩreḏelo ga dino no, namɩni nyalro liji leḏi amɩrɩgen yete lijiŋale lun lɩpiḏo pɽul, na leḏi dunu gweḏi elo;

²⁰ luṯɩnu kama elo geḏi duwəjo na nebɩŋa, na yecu kɩrisṯo kwulo gwuŋun gwiro gɩdol gun giro lɽa leḏi gɩḏul,

²¹ na lugwun dunu gwuṯɩnu ldu muma, nubuḏi duno gweḏi elo gwun gwubuḏo gwun gwɩpiḏo pɽul kwele.

²² na lugwun nyaŋa dino lo luṯɩnu ldu kani nyaro ŋalo ŋun gaṯɩn elo je gwuɽɩwə gwe.