awisus 1 - ŋuɽun ŋun ŋiya ŋun ŋikaiilo elo 1966

asa 1 ḏisalɩmia

¹ nyi gwan bulus gwun gwiro ḏuwəjo ḏeḏi yecu kɩrisṯo ŋuɽun ŋe ŋun ŋɩbunyɩlo elo, nyi gwo gwulijo liji lun lɩpiḏo pɽul lun lijo awɩsus, na lun ləṯi ḏɩməṯo muma ḏi yecu kɩrisṯo,

² ḏiŋiriḏa ḏaje lagalo na ḏouwɩɽiḏa ḏeḏi elo gwun gwiro baba gwage, na gwele gwun gwan yecu kɩrisṯo.

ḏɩbuḏia eloŋu

³ ḏɩbuḏia ḏaje ḏi elo na baba gweḏi gwele gwage gwun gwan yecu kɩrisṯo, gwun gwimorəḏɩje ḏi kɩrisṯo ḏɩmoreḏa ḏe wei ḏeḏi gwuɽɩwə kalo geḏi ŋele ŋeḏi kanyin,

⁴ ŋiro gi gwune məṯije ḏi kɩrisṯo uro gwerre ganu gɩḏilio ŋate ŋɩmagelini no, kani ilro lɩpiḏo pɽul, late ləṯɩn ŋuɽuna nanu ŋədi gi jei ganu juŋun no,

⁵ na gi ḏəmɩnyo ḏuŋun numijiməṯo uro gwerre, kani nuŋwijiduji nyaɽe nyuŋun yecu kɩrisṯo gwe, ŋiro gi ŋuɽun ŋun ŋɩbunyulo ŋun ŋiŋir ŋun ŋiŋiri ḏugwore,

⁶ kani ilbuḏi ḏoɽeḏa ḏe ḏiŋiriḏa ḏuŋun, ḏun ḏiḏəḏije ga dino ŋaɽe ŋe ŋuŋun ŋun ŋəmɩnyu.

⁷ na lugwun ilkədəḏɩnu ga, ŋuwən ŋe ŋuŋun, na ŋɩmilɩnḏuḏɩjo ŋuɽun ganu ŋage ŋun ŋɩki, ŋiro gi ḏɩbona ḏeḏi ḏiŋiriḏa ḏuŋun,

⁸ ḏun ḏiḏəḏije ḏutəno ḏilɩŋeḏena ḏe wei, na ŋadɩgɩɽe.

⁹ gi gwune gwilɩŋiḏije ŋuɽun ŋun ŋɩlɩbo ŋeḏi ŋuɽun ŋun ŋɩbunyulo, ŋiro gi gwune ŋu gwar gwerre no gwagele kɩrisṯo gwe,

¹⁰ gwune na gaja ṯɩmi wɽi ŋu gwar gwəwəɽeice ŋɩdio wei ldu ḏi kɩrisṯo, ŋun ŋijo kanyin na kwɩnyəm dino,

¹¹ na lugwun dino ilmaro ḏiɽenyeḏa ḏeḏi elo ŋiro gi gwune ilməṯɩnu gwerre gwan ŋuɽun ŋun ŋəruŋe no ŋularre, gwun gwaṯarre ŋɩru wei ŋiro gi gworo gwun gwaŋədu gwəmɩnyu,

¹² kani anaŋa lun ləṯi ḏiḏuḏɩnɩjo ḏi kɩrisṯo gwerre ganu lagalo anmiḏe gi ḏɩbuḏia ḏe ḏoɽeḏa ḏuŋun.

¹³ na lugwun nyaŋa dino gwune nanyadiŋɩni ŋuɽuna ŋun ŋiro gwerkwe, ŋun ŋiro ŋuɽun ŋun ŋiŋir ŋe ḏɩkədəḏɩnə ga ḏalo, nanyaləmɩnyi nyalməmɩɽəḏini kaṯɩm ge ŋun ŋiro gwuɽɩwə gwun gwɩpiḏo pɽul, gwun gwarɩgwe elo gwijiḏəḏə,

¹⁴ na gwuɽɩwə kweno gwiro ḏigɩɽio ḏeḏi ŋɩdi gun ŋijilɩnɽenyeje, na ḏigiɽio ḏe ḏɩkədəḏɩnə ga jili je ḏeḏi liji leḏi elo gi ḏɩbuḏɩa ḏe ḏoɽeḏa ḏuŋun.

ḏuməḏɩjo eloŋu ḏan ḏilɩŋeḏa ḏeḏi elo

¹⁵ na gwan ŋuɽun ŋeno, gi gwune nyi madiŋɩni gwan ḏɩməṯo ḏalo ḏi gwele gwun gwan yecu, na ḏəmɩnyo ḏun ḏəṯanyalo gi liji wei lun lɩpiḏo pɽul,

¹⁶ nyi gwate gwaṯɩnḏuḏɩni gi ḏeico eloŋu sukran gwan nyaŋa, na nyi gwaṯajaḏɩŋane gi ḏuməḏɩjo eloŋu ḏinyi,

¹⁷ kani elo gweḏi gwele gwage gwun gwan yecu kɩrisṯo, na baba gwe ḏoɽeḏa gwajiḏəḏə gwuɽɩwə gwe ḏilɩŋeḏeno, na ḏaŋiḏio gi ḏilɩŋeḏa muma gwan ŋu.

¹⁸ na jei jeḏi ŋadɩgɩɽe galo ŋimiḏini kani nyalɩŋe aŋ gwiro ḏiḏuḏɩnɩjo ḏe ḏorniḏa ḏuŋun, na aŋ gwiro ḏɩbona ḏe ḏoɽeḏa ḏe ḏiɽenyeḏa ḏuŋun gi liji lun lɩpiḏo pɽul,

¹⁹ na aŋ gwiro ŋɩma ŋuŋun ŋun ŋɩni gworki lage lun ləmɩnyu, ŋiro gi ḏidujia ḏeḏi ŋɩma ŋuŋun ŋun ŋɩbɩɽe nanu,

ŋɩma ŋeḏi elo ŋaŋiḏi gi ḏaiya ḏe ḏeḏi kɩrisṯo

²⁰ ḏun ḏapu ḏi kɩrisṯo gwune diɽuŋu gi liji lun laiyo, nujiga gi ḏi ḏuŋun ḏun ḏiro ḏiŋir kalo geḏi ŋele ŋeḏi kanyin,

²¹ kɩɽelo ŋele wei ŋeḏi liji leḏi kanyin, na ŋeḏi gɩḏilio, na ŋɩma, na ŋele ŋun ŋiro kaja, na jiri wei jun jorniḏɩnu, jədu kɩḏilio keno kuwei no, namɩni gun gila dino.

²² na gwɩtienɩjo ŋɩdio wei gelio ŋwara ganu ŋwuŋun, na gwiduji lɽa leḏi kɩniso ŋuɽun wei,

²³ ŋun ŋiro aŋɩnu yuŋun, na ŋɩmaḏenyeḏa ŋu gwe gwun gwimaenyeji ḏenyeḏa de wei ḏeḏi elo.