2 ṯimuṯawus 4 - ŋuɽun ŋun ŋiya ŋun ŋikaiilo elo 1966

asa 4 ḏisalɩmia ḏeḏi bulus

¹ nyi gwiḏəḏəŋa ŋuɽuna ŋɩbɩɽe gi jei ganu jeḏi elo na jeḏi yecu kɩrisṯo gwun gwakɩmi liji lun lɩmiḏo na lun laiyo, na gwan ḏaɽuwa ḏuŋun na ŋele ŋuŋun,

² uməḏɩjɩlo ŋuɽuna ŋeḏi elo, ŋamɩni ji muma gi ḏuməḏɩjo ṯeno ŋwamon ŋwun ŋwiŋir na ŋwun ŋwate ŋwiŋir no, ŋallo ŋalbɩɽi nanu ŋalgireṯɩnya, ḏɩməṯo ḏe ḏugwore wei na ḏalɩmia ḏe.

³ na gaja gaje gila na luŋa late ləmɩnyi ladiŋɩni ḏalɩmia ḏun ḏiro muma ḏɩni no, nal ŋuɽun ar gi nəni, nalwəɽeice limualɩm ŋwudu lun laṯɩlalɩmi ŋuɽuna ŋun ŋɩmaliŋiri dugwore.

⁴ nalwɩrleje nəni nagin kaja ŋuɽun ŋun ŋiro gwerkwe, naṯɩlwɩrla ŋuɽun ŋun ŋiro ga dino.

⁵ namɩni ŋajiga muma ŋuɽun wei, aṯaŋupini ḏɩḏia, arro ŋɩru ŋeḏi gwiji gwun gwaṯuməḏɩjo liji ŋuɽuna ŋeḏi yecu, ŋəṯɩmi ŋɩru ŋuŋa.

⁶ na ŋuwən ŋinyi ŋo gɩṯo ŋirəḏini ga ŋiro gi ḏiduga, na gaja ge ḏiduḏə ḏinyi go gɩṯo.

⁷ na nyi marre ḏɩrra ḏun ḏiŋir, nyi məṯɩmi ḏidarana ḏinyi, nyi gwɩdɩmiḏi ḏɩməṯo,

⁸ na uro gwunnɩno laḏe le ḏiŋiriḏa lo lɩḏuḏɩniji, lun liḏəḏi gwele gwun gwiro gaḏi gun gɩḏuḏɩnu ga gi lamon lun lila, linyi late liro cucun no namɩni laje lagin wei lun ləmɩnyu ḏaɽuwa ḏuŋun.

⁹ iḏeijo muma wila lugwi cou;

¹⁰ na gi gwune dimas midonye gi gwune numəmɩnyene ŋuɽuna ŋeḏi gɩḏɩlio keno, na mele ṯasaluniki, namɩni kariskis mele galaṯia, namɩni ṯitus mele ḏalmaṯia.

¹¹ luka gwiro gwetɩdo gwo gwijanagwe. gwuloḏena markusŋ nyagwila gi gwune ŋu gwigelejo uwə ŋɩru.

¹² namɩni ṯikikus niwəje awɩsus.

¹³ na giria gun geḏi mɩɽino nanu gun giwalijanine karibusŋ gwun gwijo ṯarawas apana ḏa ŋa mar gwila na jɩḏam na gɩḏam ŋun ŋiro ŋɩma.

¹⁴ iskandara gwun gwaṯiṯi jaba minyərrɩjo ŋuɽuna ŋɩki gworki, na gwa gwele wəɽəṯɩjo gwun gwiro elo gwan ŋɩru ŋuŋun.

¹⁵ jil muma lugwun dino, gi gwune madiɽo ḏikiḏiḏia ḏe ŋuɽun ŋəri gworki.

¹⁶ namɩni gwune ji kəcərio gwerre gwatɩn gwetɩdo gwuḏuḏɩnanagwe no namɩni wei lɩminwalane; na ŋeno ŋo ŋalɩlḏuɽəḏɩjo.

¹⁷ namɩni gwele gwun gwiro elo gwuḏuḏɩnanagwe ŋwibɩɽi nanu, kani a ḏuməḏo ḏeḏi yecu lɩŋini nyi gwe gworki, na liji wei diŋɩni lun liro ga dino; na nyi mobiḏɩni gi linyu leḏi lima.

¹⁸ na gwele gwaje gwikədə ga wei ŋɩru wei ŋun ŋɩki na gwidɩme ŋele ŋuŋun ŋeḏi kanyin, na ḏoɽeḏa ḏaje lugwun gi gɩḏilio. gwerkwe.

¹⁹ salɩmi birisɩkaŋ na akila na liji leḏi dunu gweḏi unisiburus.

²⁰ arasṯus gwo kurinṯus, namɩni nyi mawalana ḏi ṯurubimus gweḏeḏo nanu kamɩrɩgen yun yan miliṯus.

²¹ iḏeijo coucou ŋila gwerre ḏoɽom ḏate ḏɩmila no. abubulusŋa budis gwe, na linus na kalabidiya na lɩmage wei lisalɩmiaŋa.

²² gwele gwun gwiro elo gwalje gwuɽɩwə gwe gwuŋa. ḏiŋiriḏa ḏanyaḏije.