2 ṯimuṯawus 2 - ŋuɽun ŋun ŋiya ŋun ŋikaiilo elo 1966

asa 2

¹ na ŋiro dino ŋaɽe ŋinyi, bɩɽiḏi nanu ḏiŋiriḏa ḏe ḏun ḏijo ḏi yecu kɩrisṯo,

² na ŋuɽun ŋun ŋidiŋɩnalo lugwi gi jei ganu jeḏi liji lutu lun laŋɩḏi, ŋalḏəḏə ləmɩnyəŋe lun lilɩŋeḏeṯo lalɩmi liji lun liro kaja dino.

³ meṯi aŋɩna ŋuɽun ŋun ŋɩbɩɽe gi ajana yun yiŋir yeḏi yecu kɩrisṯo.

⁴ gwate gwete gwun gwiro ajana ḏa mar gwele gi ḏɩrra, gwanuɽuḏi gwula gwuŋun ganu ŋɩdi ŋe ŋe ḏɩmiḏa ṯeno no, gi gwune ŋu gwar gwuiŋiri ḏugwore gwun gwuməṯi nuduji ajana.

⁵ na dino na ḏa gwiji mabule gwate gwanape bera ḏa gwate magwuje ŋuɽuna ŋun ŋiḏuḏɩnu ga ŋe ḏɩbula no.

⁶ gwiji gwe ḏigwurə gwun gwaṯape ŋɩru ŋɩni arram gwaṯape ŋɩdio ŋuŋun gwerre.

⁷ aṯaŋiri jei galo ŋuɽun ŋinyi, na gwele gwun gwiro elo gwaŋaḏəḏə ḏilɩŋeḏa ŋuɽuna wei.

⁸ aṯaḏɩŋane yecu kɩrisṯoŋ gwun gwidiɽɩnu gi ḏaiya, gwun gwiro gwumən gweḏi ḏauuḏ, gi gwune arɩne ŋuɽun ŋun ŋiŋir ŋun gaṯɩlumə ŋeḏi yecu kɩrisṯo.

⁹ na ŋuɽun ŋeno nyi gwəṯi ḏɩḏia nyi gwikanano ga, gwiro gi gwiji gwun gwɩki; namɩni ŋuɽun ŋeḏi elo ŋate ŋɩkanu no.

¹⁰ na ŋiro dino nyi gwaṯupini ŋuɽuna wei ŋan liji lun lɩmətɩnu kani albuje ḏɩkədəḏɩnə ga dino ḏun ḏijo ḏi yecu kɩrisṯo ḏoɽeḏa ḏe gi gɩḏilio.

¹¹ ŋuɽun ŋiro gwerkwe gun ŋarno, ḏa milai gwilimiḏe dino,

¹² na ḏa ilməṯi ḏɩḏia kal gete iləṯi ŋelɩnya ŋu gwe dino, na ḏa mildonye namɩni gwaje gwijidonye dino.

¹³ ḏa ilate lɩmaje muma no namɩni ŋu gwore gwiŋir gwuḏuḏɩnu ga; na ŋu gwate gwəṯi ŋɩma gwade gwula gwuŋun no.

dɩminu ga gwan ŋuɽun ŋun ŋiro kaja

¹⁴ ŋalaḏɩŋəni ŋuɽun ŋeno, ŋalḏəḏə ŋuɽuna ŋɩbɩɽe gi jei ganu jeḏi elo, aṯɩlbereḏa ŋuɽun ŋete ŋete no, na ḏɩbereḏa ṯeno ḏate ḏəṯi jei ganu no ḏaṯɩḏuji liji lun lɩdiŋɩnu.

¹⁵ geline lɽa bucu ŋaŋini gwula gwuŋa ŋwiŋir ḏi elo, ŋaro gwiji gwun gwaṯape ŋɩru ŋun ŋate ŋaŋəpijo ḏare no, ŋalmɩni alɩmi morrr ŋuɽun ŋe ŋun ŋiro gwerkwe.

¹⁶ ŋamɩni ouwɩrico ŋuɽuna ŋun ŋuḏu ganu ŋədu ŋeḏi elo no, gi gwune ŋun ŋaṯɩgwulule liji laṯapa ŋuɽuna ŋɩkeno.

¹⁷ na ŋuɽun ŋagin ŋaṯiḏe gi gwariŋan, na iminayus na bilitus lijille dino,

¹⁸ lun lɩmaḏuḏe ŋuɽun ŋun ŋiro gwerkwe, nalarno ḏidiɽo ḏe ḏaiya ḏɩmaḏarane wɽi nalki ḏɩməṯo ḏeḏi liji kworo.

¹⁹ namɩni gama geḏi elo geḏuḏɩni ga na gəṯi kaṯɩm keno, lilɩŋiḏɩlo elo liji luŋun liro, na, ouwɩricil gwete gwete gwun gwəṯi jiri jeḏi gwele gwun gwiro elo nuouwɩrico ŋuɽuna ŋun ŋɩki.

²⁰ namɩni kwu dunu gwun gwubuḏo gwate gwəṯi ŋɩdio ŋun ŋiro ḏab i baḏa kuwei no, namɩni ŋeḏi ŋuɽi na ŋaiyo dino, kworo loleno ŋɩru elo namɩni kworo lɩtieno ŋɩru.

²¹ na ŋiro dino na ḏa gwiji mawei gwula gwuŋun ŋuɽuna ŋeno ŋun ŋɩki, na ŋu gwaro gi gwaŋ gwun gwiŋir gwadujini gwɩpiḏo pɽul, gwijiga gwa gwi gwele ape ŋɩru wei ŋun ŋiŋir.

²² abɩro ŋuɽun ŋeḏi jamal ŋun ŋɩki, ŋagwuje ŋuɽuna ŋun ŋiŋir, na ḏɩməṯo, na ḏəmɩnyo na ḏouwɩɽiḏa lijiŋale lun ləmɩdo gwelɩnya gwun gwiro elo dugwor de dun diŋir.

²³ donyo ḏiɽoṯeḏa ḏun ḏiro ŋɩɽilo, ŋalɩŋe ŋarno ŋaṯapa ḏɩbereḏa.

²⁴ na wainy gweḏi gwele gwun gwiro elo lo lanbereḏe; almɩni ro ḏɩmoɽiḏa ganu gi liji wei, numɩni ro gwun gwalɩmiḏe ŋwuməṯo aŋɩna.

²⁵ ŋulmɩni gɩreṯɩnya lun lɩkiḏiḏɩle ḏɩtieno ḏe; na ḏa lɩman elo ḏəḏə ḏuwɩrla ga ŋuɽun ŋun ŋɩki nalalɩŋe ŋuɽuna ŋun ŋɩro gwerkwe,

²⁶ nalwɩrla ga ŋadɩgɩɽe ŋe ŋiŋir nalubiḏɩni gi ḏigiɽio ḏeḏi iblis gwun gwidujɩlo lɩwainy, kani alapijo ŋɩru ŋun ŋɩbunyulo.