2 ṯasaluniki 3 - ŋuɽun ŋun ŋiya ŋun ŋikaiilo elo 1966

asa 3 ŋuɽun ŋe ḏibɩɽia nanu ŋun ŋiro gɩdo

¹ na gɩdo ganu, lɩmagəri, uməḏəṯɩjil eloŋu lagəri kani a ŋuɽun ŋeḏi gwele gwun gwiro elo wɩriga cou na ŋɩmabuḏɩni gi gwune lagalo dino,

² na ilkədəḏɩni ga gi liji lun lɩki na lun lɩkiḏiḏil ŋuɽun ŋe ŋeḏi elo, gi gwune liji wei late ləṯi ḏɩməṯo no.

³ namɩni gwele gwun gwiro elo gwiŋir gwuḏuḏɩnu ga gwun gwajimaṯaji ga, na gwajɩdɩme kwiji gwun gwɩki.

⁴ na anlɩŋinu kwele gwan nyaŋa aṯanyarre ŋuɽuna ŋun ŋuməḏɩjejilɩŋe nanyalarre dino.

⁵ na gwele gwuloḏeṯa dugwor dalo gi ḏəmɩnyo ḏeḏi elo, na gi ḏɩməṯɩno ga ḏeḏi kɩrisṯo.

⁶ na lɩmagəri, anaṯajuməḏɩjo ŋuɽuna jiri je jeḏi gwele gwage gwun gwan yecu kɩrisṯo, nyakenyɩḏiḏi ganu ŋɩmaga wei lun laṯele jai late laṯape ŋɩru no, na lədu lan ḏalɩmia ḏun ḏapɩlo lagəri.

⁷ gi gwune nyaŋa lilɩŋiḏi galakwe ŋideleḏo ŋanyalarre gi gwune aŋijejɩne, gi gwune anate nimanjiga jai ŋɩru ŋate kɩlɩgi ganu lagalo no,

⁸ na anate niṯɩn gia geḏi gwiji gwədi ga dino no, namɩni anjo gi ḏapa ŋɩru ŋɩni na ŋɩbuḏu gənyin gigili, kani ate anaɽinyi gwiji gwədi lagalo ŋɩru ŋe no.

⁹ na ŋeno ŋədu gi gwune anate nəṯi ŋelɩnya anajapa ŋɩdio ŋe ḏiṯa no, namɩni ŋajiliḏəḏə gi lulo ləri aṯanyarre gi anaŋa.

¹⁰ gi gwune dino ŋɩno jana, najiluməḏɩjo ŋuɽuna ŋeno anarno, ḏa gwete gwate məmɩnyi ŋɩru no, gwate gwaʼe dino no.

¹¹ gi gwune nanadiŋɩni, lo kworo lun laṯɩjiga kɩlɩgi ganu lagalo jai, late lapɩn ŋɩru ŋədi no, nalmɩni ro limuɽil.

¹² nanagɩreṯɩnya liji leno nanalɽoṯeḏe gworki kwele gwage gwun gwan yecu kɩrisṯo aṯɩlape ŋɩru ga nyɩkwom nalaʼe gia geḏi lulo lagin.

¹³ namɩni nyaŋa lɩmagəri, nya lo lartonyɩḏe gi ḏapa ŋɩru ŋun ŋiŋir.

¹⁴ na ḏa gwete gwate məṯeijo ŋuɽuna ŋəri nəni ŋeḏi jawab ceno no, nyalalɩŋe gwiji kweno na gwo gwanyalije kani a ḏare ape.

¹⁵ namɩni gwo gwanyaduɽəḏɩjo gwanyeicɩno gwɩkiḏiḏianyale, nyamɩni kɩrinya gi magalo.

¹⁶ na gwele gwe ḏouwɩɽiḏa kwulo gwuŋun gwajiḏəḏə ḏouwɩɽiḏa bubruṯ ŋuɽun wei ŋun ŋajiwilijo. gwele gwanyalije wei.

¹⁷ nyi gwan bulus gwajulijo ḏisalɩmia ṯeno ḏi ḏe ḏinyi, na ḏulio ṯeno ḏiro ḏəŋinio gi jawab wei. na dino nyi gwo gwuli.

¹⁸ ḏiŋlriḏa ḏeḏi gwele gwage gwun gwan yecu kɩrisṯo ḏanyalije wei.