2 kurinṯus 9 - ŋuɽun ŋun ŋiya ŋun ŋikaiilo elo 1966

asa 9

¹ na gwan ḏəpijo liji ŋɩru ŋeno lun lɩpiḏo pɽul, na ŋeno ŋɩṯanu na ḏa nyi majulijo,

² gi gwune nyi gwilɩŋiḏi ḏibɩɽeḏa nanu ḏalo, ḏun ḏaṯabupaḏa ganu lagalo gwe gi liji leḏi makɩḏunia, gi gwune liji leḏi akaia ḏɩməṯɩmi ḏɩwəɽeico ŋɩdio ŋagin ldu kɩḏilio gun gɩmete, na ḏibɩɽeḏa ḏe ḏalo nanu ḏaṯɩbɩɽi lutəno lagin.

³ namɩni nyi mawəje lɩmage, kani ate a ḏabupaḏa ganu ḏəri ŋwuro jai lagalo ŋuɽun ŋeno no, kani ŋiro gi gwune arine nyajiga muma ŋɩdi ŋe;

⁴ na ḏa lɩmanawila liji kworo leḏi makɩḏunia, na late lɩmajibuje nyalajiga muma no, na ḏare ḏijiape gi ḏabupaḏa ganu ṯeno, na nyaŋa dino.

⁵ na nyi gwuməḏɩni gi ḏugwor ganu niarno, arram nyi gwaɽoṯeḏe gi lɩmage aldarane lagalo, alwəɽeice ḏiḏəḏo ḏalo ldu gwerre ḏun ḏaranyaḏe no, na ŋɩbunyɩlo ŋaro ŋino ŋe, ŋədu ŋe ḏɩɽeḏa ganu no.

ḏiḏəḏo ḏutu na ḏeḏi elo ḏun ḏiro kɩrisṯo

⁶ aḏɩŋanɩl dino, ŋu gwun ŋwaṯukwoi ŋwete ŋwete ŋwulwone gwete gwete dino, na ŋu gwun ŋwaṯulkwoi ŋwɩrimə ganu ŋwulwone ŋwɩrimə ganu dino.

⁷ na gwete gwete wei aṯuḏəḏə gi gwune ḏugwor ḏuŋun, ŋədu ŋan ḏɩrona i ḏɩrmeṯeḏeica no; gi gwune elo gwəmɩnyu gwun gwaṯɩḏəḏə ḏidila ḏe ganu.

⁸ na elo gwəṯi ŋɩma gwajibəḏəṯɩjo ḏɩŋiriḏa wei, kani nyəṯi ŋɩdio ŋɩdaḏaṯo wei bubruṯ, na nyalbəḏəṯɩni ŋɩru wei ŋun ŋiŋir.

⁹ ŋiro gi gwune ŋulinu, naṯuwəriga, naṯuḏəḏə liji lun late ləṯi ŋɩdio no, na ŋuɽun ŋuŋun ŋun ŋiŋir ŋajaḏaṯa gi gɩḏilio.

¹⁰ namɩni ŋu gwun gwaṯɩḏəḏə jwiji ŋwona ŋwe ḏigwuḏe na gia gan ḏɩṯa, gwajiḏəḏə na gwaṯuti ŋwona ŋwalo ŋwun ŋwɩkwuḏanyalo, na gwaṯuti nyaɽe nyeḏi ŋuɽun ŋalo ŋun ŋiŋir.

¹¹ na nyaŋa labaḏaice ḏɩbona ŋɩdi wei, kani a ḏiḏəḏo ḏalo ŋwuro ŋino ŋun ŋaṯəpijo eloŋu ḏeico ḏe sukran anaŋale;

¹² gi gwune ḏapa ŋɩru ŋeno ḏate ḏəṯɩmeje ḏibunya ḏeḏi liji lun lɩpiḏo pɽul kuwei no, namɩni ŋabaḏaicɩni ḏeico ḏe eloŋu sukran gworki.

¹³ na gi gwune naliŋiri ŋɩru ŋeno, lɩmabuḏi eloŋu gwan ḏideŋɩneja ḏalo gi ḏɩteijo ga ḏalo ŋuɽun ŋun ŋiŋir ŋeḏi kɩrisṯo, na gi gwune ḏiḏəḏo ḏalo ḏutu lagin na gi liji wei,

¹⁴ na gi ḏuməḏɩjo eloŋu ḏagin lagalo nal dugwor dagin pi gwan ḏiŋiriḏa ḏeḏi elo ḏun ḏutu ḏun ḏiḏəḏaje.

¹⁵ ileico eloŋu sukran gwan ḏiḏəḏo ḏuŋun ḏun ḏate ḏəṯi ŋɩma ḏilḏuma no.