2 kurinṯus 6 - ŋuɽun ŋun ŋiya ŋun ŋikaiilo elo 1966

asa 6

¹ na dino anaŋa andro lun lapɩlo eloŋale ŋɩru, anɽoṯeḏo lagalo gworki dino, nya lo ləməṯo ḏiŋiriḏa ḏeḏi elo ga jai.

² gi gwune ŋu gwarno, kaja gun gəmɩnyɩnu nyi maŋadeŋɩnejo; na gi lamon le ḏɩkədəḏɩnə ga nyi maŋagelejo uwə. gwunnɩno gwiro gaja gun gəmɩnyɩnu; na gwunnɩno gwiro lamon le ḏɩkədəḏɩnə ga.

³ nanaŋa late lagele gɩḏolia ge ḏobɩlkejo gwiji gwədi no, kani ate a ḏapa ŋɩru ŋəri ro ḏare no,

⁴ namɩni ŋɩdi wei anaŋiḏi lula ləri andro jaḏam jeḏi elo, gi ḏɩməṯo dugwore gworki, na gi ḏɩḏia, na ŋɩdi ŋun ŋɩbɩɽaṯo lagəri, na kalo ge ḏiḏɩmiḏɩno,

⁵ na gi ḏɩpino, na gi ḏijiga kɩrkon, na ŋɩrəkwəno, na ŋɩru ŋutu ŋɩni, na gi gwune anate naṯɩḏɩre no, na gi ḏɩməṯo abuṯo,

⁶ na ḏɩpiḏa ḏe pɽul, na ḏilɩŋeḏa ḏe, na ḏɩməṯo ḏe liji dugwore, na ŋino ŋe, na gwuɽɩwə gwe gwun gwɩpiḏo pɽul, na ḏəmɩnyo ḏe ḏun ḏate dəṯi ŋɩwɩɽɩgala no,

⁷ na ŋuɽun ŋe ŋun ŋiro gwerkwe, na ŋɩma ŋe ŋeḏi elo, na ŋɩdi ŋe ŋeḏi ḏɩrra ŋeḏi ŋuɽun ŋun ŋiŋir gi ḏi ḏun ḏiro ḏiŋir na ḏun ḏiro ḏouwɩr,

⁸ na ḏinəjio ḏe na ŋuɽun ŋe ŋun ŋiro ḏare, na gi ḏugiḏia na gi ḏɩbuḏia. andro gi lun lirdeijɩlo ganu namɩni aniŋir ŋuɽuna;

⁹ namɩni andro ga gi liji lun lɩdonyinu namɩni lilɩŋiḏije muma; andro gi liji lun laiyo namɩni anmiḏo; andro gi liji lun lipinu namɩni anate liɽinyinu no,

¹⁰ andro gi liji lun lɩrono namɩni anaŋa bubruṯ andilo ganu; andro gi lun late ləṯɩn ŋɩdio no, nɩlmɩni əpijo liji lutu ḏɩbona; na gi lun late ləṯi gwaŋ gwədi no, namɩni ŋəṯanalo wei.

bulus gwubunyu ḏəmɩnyo gi liji lun ligwuloḏeiculo yecuŋ

¹¹ nyaŋa liji leḏi kurinṯus, anuməḏijaje ŋuɽuna ŋun ŋɩdəḏi ga na dugwor dəri diḏinjaje.

¹² nya late ləmɩrṯeḏo lagəri no, namɩni nyaləmɩrṯeḏo gi dugwor dalo.

¹³ na gwan ŋeno nyi gwajuməḏɩjo dino gi nyaɽe nyinyi, nyamɩni iḏi dugwor dalo alwɩre ganu dino.

bulus gwɩdɩmini liji galo gwan lɩmaḏ lun late ləmɩnyu eloŋu no

¹⁴ lo lanyalgaki lijiŋale lun late ləmɩnyu eloŋu no, gi gwune ŋɩmaga ŋaḏa ŋeḏi ŋuɽun ŋun ŋiŋir ŋuɽun ŋe ŋun ŋɩki? na ḏɩmaṯiḏa ḏɩrṯa ḏeḏi bureŋa girɩm ge?

¹⁵ na ŋɩmaḏ ŋiro ŋaḏa ŋeḏi kɩrisṯoŋa baleil gwe? na gwiji gwun gwəmɩnyu eloŋu gwəṯɩl ŋuɽuna ŋɩrṯa gwiji gwe gwun gwate gwəmɩnyu eloŋu no?

¹⁶ na ḏikaiya ḏaḏa ŋuɽun ŋeḏi dunu gweḏi elo gi ḏorṯeḏa ŋɩdio? gi gwune ilro dunu gweḏi elo gwun gwumiḏo, gi gwune arne elo, nyi gwajaḏaṯa lagin, na laṯanaliwewele, na nyi gwaro elo gwagin, na luŋa laro liji linyi.

¹⁷ na dino, gwele gwarno gwun gwiro elo, tuḏɩl kɩlɩgi ganu lagin, nyubiḏɩnane kaja, nyanḏɩmuma gwaŋ nanu gwun gwiro ŋɩrleḏ no; na nyi gwajəmɩnyi,

¹⁸ na nyi gwaro baba gwalo, namɩni nyaŋa nyalaro nyaɽe nyinyi na nyeŋa nyinyi, gwele gwar dino gwun gwiro elo gwun gwəṯi ŋɩma wei.