2 kurinṯus 5 - ŋuɽun ŋun ŋiya ŋun ŋikaiilo elo 1966

asa 5

¹ gi gwune liŋə ilɩŋiḏi na ḏa dunu gwage gwun gwaṯɩje kwɩnyəm gwun gwiro gibar gage gwiməbɩrini, namɩni iləṯi duno ḏi elo gwun gwate gwukadɩnu di de no, numɩni ro gi gɩḏilio kanyin.

² na kworo kweno dino iledinyeḏi na dugwor ḏimijʼe ganu, ilar ilakani duno gwe gwun gwuwiḏi kanyin,

³ na ilakani, na ilate lajiga ŋɩmuɽino no.

⁴ gi gwine liŋə lun lijo kibar keno. iledinyeḏi ḏubo ḏe nanu, gi gwune liŋə ilate libunyu gilwala ga no, nilɩmɩni kanane kworo elo, kani ŋu ŋaḏɩni gworo kweno gwaiyo gi ḏɩmiḏa.

⁵ namɩni ŋu gwun gwukədije gwan ŋuɽun ŋeno ŋu gwiro elo, na ŋu gwimijiḏəḏə gwuɽɩwə gwun gwɩpiḏo pɽul gwun gwiro ḏigiɽio.

⁶ na dino iləṯi ḏibɩɽeḏa nanu bubruṯ, nilɩŋiḏi liŋə gwune ilajaḏaṯa gi jiŋɩno namɩni ilo kaja kwele gwun gwiro elo,

⁷ gi gwune liŋə ilawewele ḏɩməṯo ḏe, ḏədu ḏeḏi aŋiḏa ḏan jei no,

⁸ na iləṯi ḏibɩɽeḏa nanu, na ildile ganu kani ilwalane gi jiŋɩno, ilje gweleŋale gwun gwiro elo.

⁹ na dino ilagele gei ga muma dino, ḏa ilmaje i ilate ilmaje no, ilro lun liŋiri ḏugwore.

¹⁰ gi gwune arram liŋə ilaŋini wei gi jei ganu kɩḏoɽ geḏi ḏakɩmiḏa ḏeḏi kɩrisṯo, kani a gwete gwete wei ape ŋɩdio ŋeḏi ŋɩru ŋun ŋapulo aŋɩnu ye yuŋun, ŋiro gi ŋɩru ŋuŋun ḏa ŋɩmiŋir i ŋɩmake.

ḏəmɩnyo ḏeḏi elo ḏiro ŋuɽun ŋun ŋaṯɩlapi ŋɩru na ŋɩma ŋage

¹¹ na dino gi gwune anlɩŋiḏi ŋɩḏe ŋeḏi gwele gwun gwiro elo anar nidi liji nanu, namɩni anmaŋini gi jei ganu jeḏi elo muma, na anḏuḏɩnu ga anaŋa anamaŋini gi dugwor ganu dalo dino.

¹² na anaŋa nate niŋiri lula ləri lagalo mɩna no; namɩni lajiḏəḏə lamon dino lanyalabupaḏe ganu gwan anaŋa, kani nyəṯi ŋuɽuna ŋun ŋanyalwɩrlijo liji galo lun laṯabupaḏe ganu jiŋɩno je ŋate ŋan dugwor no.

¹³ gi gwune anaŋa, ḏa anmaro jiɽilo, ŋeno ŋan elo ŋiro; namɩni ḏa anməṯi ŋadɩgɩɽenya muma, ŋeno ŋan nyaŋa.

¹⁴ gi gwune ḏəmɩnyo ḏeḏi kɩrisṯo ḏaṯɩjiḏamane ganu, gi gwune anar dino, ḏa gwetɩdo gwimai gwan liji wei, na dino liji wei lɩmai.

¹⁵ na ŋu gwɩmai gwan liji wei, kani a liji lun lɩmiḏo late ləmɩḏe lan lulo lagin no, almɩni ro gwan ŋu gwun gwɩmai na madiɽi gwan luŋa.

ḏɩmiḏa ḏun ḏiya ḏi kɩrisṯo

¹⁶ na dino uro gwunnɩno ilate ilalɩŋe gwiji gweṯɩdo kaŋɩnu gwe no; i, namɩni ḏa ilmalɩŋe kɩrisṯoŋ gwerre kaŋɩnu gwe, namɩni uro gwunnɩno gwate gwilɩŋiḏil no.

¹⁷ na dino ḏa gwiji gwete maje ḏi kɩrisṯo, na ŋu gwiro ḏigelɩno ḏun ḏiya; ŋɩdi ŋun guɽun ŋɩmete, na ŋɩdi ŋɩmaro ŋiya.

ŋuɽun ŋe ḏouwɩɽiḏa

¹⁸ na ŋɩdi wei ŋeḏi elo ŋiro, gwun gwimijouwɩɽiḏi kwulo gwuŋun kɩrisṯo gwe, na mijiḏəḏə ŋɩru ŋe ḏouwɩɽiḏa;

¹⁹ i ŋun ŋarno, elo gwijo ḏi kɩrisṯo nuouwɩɽiḏi gɩḏilio kwulo gwuŋun late lulḏuɽəḏɩjo ŋuɽuna ŋagin ŋun ŋɩki no, na mijiḏəḏə ŋuɽuna ŋe ḏouwɩɽiḏa.

²⁰ na dino andro lɩwəkil leḏi kɩrisṯo, gwiro gi gwune elo gwaṯanalumə, anɽoṯeḏo gworki gwan kɩrisṯo, ouwɩɽiḏɩl eloŋale.

²¹ gi gwune ŋu gwun gwate gwilɩŋiḏi ŋuɽuna ŋun ŋɩki no, gwiduji elo ŋuɽun ŋun ŋɩki gwan liŋə, kani ilro ŋuɽun ŋun ŋiŋir ŋeḏi elo lugwun.