2 kurinṯus 4 - ŋuɽun ŋun ŋiya ŋun ŋikaiilo elo 1966

asa 4 ḏuməḏɩjo liji ŋuɽun ŋeḏi elo ḏibɩɽeḏa ḏe nanu

¹ na dino, gi gwune anəṯi ŋɩru ŋeno ŋino ŋe ŋeḏi elo, anate anədutu ganu duɽo de no.

² namɩni liŋə iladonye ŋuɽuna ŋun ŋɩlɩbiḏɩnu ŋe ḏare; nate naṯɩlduji ŋuɽuna ḏirdeijo ḏe ganu no, nate naṯɩluɽuḏi ŋuɽuna ganu ŋeḏi elo no, na gwune nanaŋiḏi ŋuɽuna ŋun ŋiro gwerkwe aniŋiria lula ləri gi dugwor de liji wei gwete gwete gi jei ganu jeḏi elo.

³ namɩni ḏa ŋuɽun ŋəri ŋun ŋiŋir ŋeḏi yecu kɩrisṯo ŋɩmakɩɽɩbəḏɩni ga, ŋukɩɽɩbəḏɩnu ga gi liji lun lar lai.

⁴ na elo gweḏi gɩḏilio keno gwarimi dugwor ganu dagin lun late ləmɩnyu eloŋu no, kani ate al bure oɽəḏɩjo galo gweḏi ŋuɽun ŋun ŋiŋir ŋe ḏoɽeḏa ḏeḏi kɩrisṯo gwun gwuwəɽino elo no.

⁵ gi gwune anate numəḏi gwan lulo ləri no; namɩni anaṯumə anarno, yecu kɩrisṯo gwiro gwele, nanaŋa andro lɩwainy lalo gwan yecu.

⁶ gi gwune elo gwiro gwun gwarno, bure gwaje gwoɽa ga kirɩm, na ŋu gwumoɽa ga gi dugwor ganu dage kani a bure oɽa ga gwe ḏilɩŋeḏa ḏeḏi elo gi jei ganu jeḏi yecu kɩrisṯo.

ḏirebɩnɩḏa ḏeḏi bulus na ŋɩma ŋeḏi elo

⁷ namɩni iləṯi ḏilɩŋeḏa ṯeno ḏun ḏiro gi gwaŋ gwiŋir gworki gi niḏi nun niro gwɩnyəm, kani ilaŋiḏi ŋɩma ŋɩbuḏo gworki ŋeḏi elo ŋiro, ŋəḏu ŋəri no,

⁸ angwuɽuṯeno ŋɩdi wei namɩni anate nirərə ga no; na ŋadɩgɩɽe ŋəri ŋiɽuḏɩnu ganu namɩni anate niḏɩmiḏɩnu no,

⁹ laṯijɩnḏagɩɽini namɩni anaŋa nate lɩmijɩnwalane no; lurəḏiji gwe namɩni anate nɩmai no,

¹⁰ ŋinya ŋuŋun ŋaṯanalape gi jiŋɩno jəri bubruṯ ŋan ḏaiya ḏeḏi yecu, kani a ḏɩmiḏa aŋini ḏeḏi yecu dino gi jiŋɩno jəri,

¹¹ gi gwune anaŋa lo lɩmiḏo namɩni anaṯɩḏəḏini ḏaiya gwan yecu, kani a ḏɩmiḏa aŋini ḏeḏi yecu dino gi jiŋɩno jəri jun jaṯai,

¹² na dino ḏaiya ḏaṯapa ŋɩru lagəri namɩni ḏɩmiḏa lagalo.

¹³ namɩni gi gwune anəṯi gwuɽɩwə gwe ḏɩməṯo, ḏiro gi gworo gwun gwulinu kɩḏam geḏi elo, nyi məṯi ḏɩməṯo, na dino nyimumə, anaŋa dino anəṯi ḏɩməṯo, na ŋiro dino anumə dino,

¹⁴ analɩŋiḏi ŋu gwun gwidiɽi gwelɩnya gwun gwan yecu gi ḏaiya gwijidiɽi ḏino yecuŋale, na gwijiḏuḏɩni nyaŋale gi jei ganu lugwun.

¹⁵ gi gwune ŋɩdi wei ŋan nyaŋa ŋiro, kani a ḏiŋiriḏa utəni gi gwune nyaŋa lɩmutəne, na ḏeico eloŋu sukran ḏimutəne ḏan ḏoɽeḏa ḏeḏi elo.

ḏɩḏia ḏeḏi gwunne na ḏoɽeḏa ga gi gɩḏilio

¹⁶ na dino anate anədutu ganu duɽo de no. namɩni ḏa aŋɩnu yəri yun yaṯɩlaŋu kɩluḏo gwe yaṯɩdigɩɽe, namɩni yeno gɩdəno gwe yaṯɩjiga yiya bubruṯ.

¹⁷ gi gwune ḏɩḏia ḏəri ḏun ḏouwɩrio ganu ḏeḏi gwunnɩno ḏaṯijəpijo ḏiniḏo ḏeḏi ḏoɽeḏa ḏutəno gworki gi gɩḏilio,

¹⁸ gi gwune anate angele gei ŋɩdi ŋun ŋaṯaŋini no, nalmɩni ro ŋun ŋate ŋaŋinu no. gi gwune ŋun ŋaṯɩlaŋu ŋeḏi gwunnɩno ŋiro, namɩni ŋun ŋate ŋaṯɩlaŋu no ŋajaḏaṯa gi gɩḏilio.