2 kurinṯus 3 - ŋuɽun ŋun ŋiya ŋun ŋikaiilo elo 1966

asa 3 liji lun ligwuliḏɩna ḏi yecu bulus gwe

¹ na anaŋa anar niḏeije ga mɩna anumə ŋuɽuna ŋe ḏiŋiria lula ləri a? i ŋɩbunyanalo ŋiro gi ŋeḏi liji kworo gwun gwiro kaja jawab je ḏiŋiria lula ləri lagalo, i jun julijajɩlo a?

² nyaŋa liro jawab jəri julinu gi dugwor ganu dəri, jilɩŋiḏinu na jiməgɩrɩni gi liji wei.

³ na nyalmaŋini nyalmaro jawab jeḏi kɩrisṯo jeḏi ŋɩru ŋəri ŋun ŋaṯanalape, jate julinu ŋau ŋe ŋun ŋumɩno no, namɩni gwuɽɩwə gwe gweḏi elo gwun gwumiḏo, jate julinu gi nyɩdol nyun nyuwɩra ga no, namɩni gi dugwor ganu dun diro nyɩdol nyun nyuwɩra ga nyun nyimido.

⁴ namɩni ilɩŋeno ganu gwan ŋeno ḏi elo kɩrisṯo gwe.

⁵ anate andro muma anuməḏɩni ŋuɽuna ŋədi kaja gəri ŋan lulo ləri no, namɩni ŋuɽun wei ŋun ŋaṯɩlibunyi ŋidaḏaṯo ḏi elo,

⁶ gwun gwimijiduji jaḏam jun jidaḏaṯo jeḏi ŋuɽun ŋun ŋiya ŋun ŋɩkaiilo, ŋədu ŋeḏi ŋwule no, namɩni ŋeḏi gwuɽɩwə gwun gwɩpiḏo pɽul, gi gwune ŋwe ŋwulinu ŋwule ŋwe ŋwaṯɩɽinyɩḏe namɩni gwuɽɩwə gwun gwɩpiḏo pɽul gwaṯɩmiḏi.

ḏoɽeḏa ga ḏeḏi ŋuɽun ŋiŋir ŋeḏi yecu kɩrisṯo na ḏoɽeḏa ga ḏeḏi ŋuɽun ŋun ŋigelijɩlo elo musaŋ

⁷ namɩni ḏa ŋɩmaro ŋeno ŋun ŋaləpijo ḏaiya ŋun ŋulinu ŋwule ŋwe gi nyɩdol ŋɩmila ḏoɽeḏa ḏe, kəbe na liji leḏi isreiyil late ləṯi ŋɩma laŋalaḏe musaŋ gi jei ganu no, gi gwune ḏoɽeḏa ḏuŋun ḏun ḏaṯete,

⁸ namɩni ŋiro ŋaḏa ŋutəno ŋuɽun ŋeno ŋun ŋaṯɩl gwuɽɩwə apa gwun gwɩpiḏo pɽul ŋajaḏaṯa ḏoɽeḏa ḏutəno?

⁹ gi gwune ḏa ŋeno ŋun ŋaṯapa ḏakɩmino ŋəṯi ḏoɽeḏa, na ŋeno ŋun ŋaṯapa ŋuɽuna ŋun ŋiŋir ŋutəno ḏoɽeḏa ḏe.

¹⁰ na gwerkwe, ŋeno ŋun ŋəṯi ḏoɽeḏa ŋimiḏuji ḏoɽeḏa ḏuŋun gi gwune ḏoɽeḏa ḏun ḏibuṯano gworki.

¹¹ gi gwune ḏa ŋeno ŋun ŋaṯete ŋɩmila ḏoɽeḏa ḏe, na ŋutəno ŋeno ŋun ŋajaḏaṯa gi gɩḏilio ŋaṯəṯi ḏoɽeḏa bubruṯ.

¹² na dino gi gwune iləṯi ḏiḏuḏɩnɩjo dino, nanumə ŋuɽuna ŋe ŋɩdəḏi ga,

¹³ ŋate ŋiro gi musa gwun gwukɩɽɩbəḏi jei juŋun giria ge kani ate a liji leḏi isreiyil daŋa ga gi ḏigirirməḏo ga ḏe ḏoɽeḏa ḏun ḏaṯete no.

¹⁴ namɩni dugwor dagin dɩmərimi ganu, gi gwune uro ŋɩno na gwunnɩno, na ḏa ŋuɽun ŋun ŋɩkaiilo elo ŋun ŋuɽun ŋɩməgɩrɩni na giria keno gijɩre gate gɩməbɩrini no, gi gwune keno gɩməbɩrini ḏi kɩrisṯo kuwei.

¹⁵ namɩni kəbe na gwunnɩno, na ḏa gɩḏam geḏi musa gɩməgɩrɩni, dugwor dagin dɩmakɩɽɩbəḏɩni giria ge;

¹⁶ namɩni ḏa gwiji maɽuwa kwele gwun gwiro elo, na giria gun gɩkɩɽɩbəḏɩnuge gɩməbɩrini.

¹⁷ na gwele kweno gwiro gwuɽɩwə gwun gwɩpiḏo pɽul, na kalo gun gijɩn gwuɽɩwə gweḏi gwele na ŋɩnəwei ḏɩkədəḏɩnə ga ḏo ŋɩwainy wei.

¹⁸ namɩni liŋə wei, jei jun jate jɩkɩɽɩbəḏɩnu ga no, ilaŋalaḏe gi ḏoɽeḏa ḏeḏi gwele gwun gwiro elo kwu madara, ilaṯɩbini ganu gi ŋu gi ḏoɽeḏa ṯe ḏaṯɩlbaḏaice kworo elo, na ŋeno ŋiro ŋɩru ŋeḏi gwele gwun gwiro gwuɽɩwə gwun gwɩpiḏo pɽul.