2 kurinṯus 2 - ŋuɽun ŋun ŋiya ŋun ŋikaiilo elo 1966

asa 2 arram gwiji gwun gwɩki gwun gwuwɩrla ga wəɽil nyalro ŋɩmaga

¹ namɩni nyi məṯəḏi ŋuɽuna kwulo gwinyi nyi gwate gwila lagalo gi ḏɩrona mɩna no.

² gi gwune ḏa nyi gwəṯajironi əḏi gwiro gwun gwidili ganu, namɩni ŋu gwiro gwun gwimironi?

³ na nyi gwulijeje ŋuɽuna ŋeno kani ḏa nyi mara mila, nyi gwate gwəṯi ḏɩrona gi liji lun lɩdeleḏo nyi gwadile ganu lagin no, gɩ gwune nyi gwilɩŋeno ganu gwan nyaŋa wei, na ḏidila ganu ḏinyi ḏiro ḏidila ganu ḏalo wei.

⁴ gi gwune nyi gwṯi ḏɩrona ḏutu na ḏigwuɽuṯəno ḏeḏi ḏugwor, nyimajulijo ŋwal ŋwe ŋwutu, ŋate ŋar ŋajironi no, namɩni kani nyalɩŋe ḏəmɩnyo ḏun ḏutu gworki ḏun ḏəṯi lagalo.

⁵ namɩni ḏa maje gwete gwun mijironi, namɩni ŋu gwate gwuronɩnyi kuwei no, namɩni nyaŋa wei kworo kworo kani ate ajakɩmi ŋɩdiginə no.

⁶ na ḏigɩreṯɩnyeḏa ṯeno ḏeḏi liji lun lutəno kworo ḏidaḏaṯo kwiji gwiro gi gworo kweno;

⁷ kani ḏa ŋɩmamaliḏe nanu nyaniḏuḏɩjo ganu nyabɩɽi nanu ḏəmɩnyo ḏe, kani ate a ḏɩrona ḏun ḏutəno ḏami no.

⁸ na dino nyi gwuɽoṯedo lagalo gworki nyaməṯini ḏəmɩnyo galo ḏalo lugwun.

⁹ na nyi gwulijeje gwan ŋeno dino, kani nyilɩŋe ḏigela gei galo muma nyaləṯi ḏideŋɩneja ŋuɽuna wei.

¹⁰ namɩni gwun gwumanyaḏuḏɩjo ganu ŋɩdi ŋədi na nyi dino, na nyi gwerkwe ŋeno ŋun ŋɩminḏuḏɩjo ganu ḏa ŋɩmanyaniḏuḏɩjo ganu ŋədi, namɩni ŋan nyaŋa ŋiro gi jei ganu jeḏi kɩrisṯo,

¹¹ kani ate iji seiṯan ḏami ŋuɽun ŋe ŋədi no; gi gwune ililɩŋiḏi ŋuɽuna ŋuŋun ŋun ŋar ŋilduji. ŋuɽun ŋun ŋɩbɩɽe na ḏiḏamɩḏa dedi ŋuɽun ŋiŋir ŋeḏi yecu

¹² namɩni gwune niwila ṯiruwas gwan ŋuɽun ŋun ŋiŋir ŋeḏi kɩrisṯo, nuŋwi gwele iḏijo ouwɩra gwun gwiro elo,

¹³ namɩni nyi gwate məṯi ḏobɩḏa uwə gwe kwuɽɩwə gwinyi no gi gwune nyi gwate mabuje ṯɩtusŋ gwun gwiro magəri no; niniwalane niwele makɩḏunia.

¹⁴ namɩni ḏeico eloŋu sukran ḏaje lugwun gwun gwaṯijigwuloḏa ḏiḏamɩḏa ḏe ḏi kɩrisṯo bubruṯ, na gwilgwaŋini liŋə le uḏə ye ḏilɩŋeḏa ḏe ḏuŋun gala ganu wei,

¹⁵ gi gwune liŋə ilro ŋɩḏini ŋeḏi kɩrisṯo ḏi elo gi liji lun lar ləkədəḏɩni ga na lun lar lai,

¹⁶ na leno iləṯi uḏə yeḏi ŋɩɽainy yun yaləpijo ḏaiya, namɩni ləwei iləṯi uḏə ye ḏɩmiḏa yun yaləpijo ḏɩmiḏa. namɩni əḏi gwiro gwɩdaḏaṯo ŋuɽun ŋeno?

¹⁷ gi gwune anaŋa late liro gi liji lun lutu lun laṯirdeijo ŋuɽuna ganu ŋeḏi elo no, namɩni gi liji lun ləṯi dugwor dun diro gwerkwe na lun lɩwəjɩlo elo, ilumə ŋuɽuna ŋuŋun gi jei ganu jeḏi elo di kɩrisṯo.