2 kurinṯus 12 - ŋuɽun ŋun ŋiya ŋun ŋikaiilo elo 1966

asa 12 ḏəŋinio ḏun ḏɩni na ḏirebɩnɩḏa ḏun ḏimajiduji. bulusŋ gwɩti

¹ arram nyi gwabupaḏe ganu, namɩni ŋeno ŋate ŋideleḏo no, na nyi gwumə ŋuɽuna ŋun ŋaŋinu gi ŋwume ŋeḏi gwele gwun gwiro elo, na ŋuɽun ŋun ŋaŋijinyilo.

² nyi gwilɩŋiḏi gwiji ḏi kɩrisṯo gwun gwidiɽɩnu kanyin gwun gwaduji loro ṯəɽɩl, uro gwerre gi jɩḏilio jun jiro di na kwoɽo, na ḏa ŋu maje kaŋɩnu i ḏa gwuduḏi kaŋɩnu nyi gwate gwilɩŋiḏi no, namɩni elo gwilɩŋiḏi.

³ na nyi gwilɩŋiḏi gwiji kweno ḏa ŋumaje kaŋɩnu i gwuduḏi kaŋɩnu nyi gwate gwilɩŋiḏi no, namɩni elo gwilɩŋiḏi;

⁴ ŋu gwidiɽɩnu kalo gun giŋir geḏi liji lun laiyo, nuḏiŋɩni ŋuɽuna ŋun ŋate ŋəṯi ŋɩma ŋalumə no, na ŋun ŋate ŋiŋir ŋal gwiji umə no.

⁵ na nyi gwabupaḏe ganu gwan gwiji gwun gwiro gi kweno, namɩni gwan gwulo gwi nyi gwate gwabupaḏe ganu no, namɩni gwan ḏɩmumɩḏa ḏinyi kuwei.

⁶ gi gwune ḏa nyi mar gwabupaḏe ganu, namɩni nyi gwate gwaro gɩɽilo no, gi gwune nyi gwuməḏi ŋuɽuna ŋun ŋiro gwerkwe: namɩni nyi gwate gwabupaḏe ganu no, kani gwo gwanuməḏɩni gwete gi ḏugwor ganu gwan nyi ŋuɽuna ŋɩbuṯano kworo gwun gwaŋəḏu lugwi i gwidiŋɩnu lugwi

⁷ na kani nyate nyidujini gwubuṯano ŋuɽun ŋe ŋun ŋaŋinu lugwi ŋun ŋɩbuḏo gworki no, na ḏugi ḏiməḏəḏini kaŋɩnu ḏun ḏiro ḏuwəjo ḏeḏi seiṯan, kani ḏinyipi kəbe nyi gwate gwabuḏɩni no.

⁸ na ŋwamon ganu ṯəɽɩl niɽoṯeḏe gwelɩnya gwun gwiro elo gworki gwan ṯeno ḏumɩnyinwalane;

⁹ namɩni nuŋwieicɩno, ḏiŋiriḏa ḏinyi ḏidaḏaṯo lugwuŋa, gi gwune ŋɩma ŋinyi ŋɩməṯɩmi gi ḏɩmumɩḏa. na dino nyi gwadile ganu gworki nyi gwabupaḏe ganu gwan ḏɩmumɩḏa ḏinyi kani a ŋɩma ŋeḏi kɩrisṯo jaḏaṯa lugwi.

¹⁰ na dino nyi gwidilo ganu gi ḏɩmumɩḏa, na gi ḏɩḏenɩḏia, na gi ḏɩbɩɽaṯa ŋɩdio, na gi ḏiḏagɩɽina, na gi ḏɩḏia gwan kɩrisṯo, gi gwune ŋɩno nyi gwimumɩḏo na kaja kono nyi gwimabɩɽe nanu.

bulus gwaḏɩŋano ḏabupaḏa ganu ḏuŋun

¹¹ na nyi gwumaro gɩɽilo. nanyalremeṯeḏeicenyi, gi gwune ŋuɽun ŋideleḏo lagalo nyalarno nyi gwiŋir. namɩni nyi gwate gwɩṯieno ŋɩdi ŋete gi loro lun liro duwəjo dun diŋirano gworki no, na ḏa nyi maro gɩɽilo.

¹² na gwerkwe ḏəŋinio ḏeḏi ḏuwəjo ḏun ḏiŋir ḏɩmaŋini lagalo gi ḏɩməṯo ḏe ḏugwore wei, dəŋɩnio ḏe, na ŋɩdi ŋun ŋaṯobeje liji ga ṯuṯ, na ŋɩru ŋeḏi ŋɩma ŋun ŋɩbuṯano kworo gweḏi liji.

¹³ gi gwune ŋɩrṯa ŋiro ŋanyaniduji ŋɩtieno kɩniso wei giro kajakaja, namɩni ŋeno ŋiro kuwei nyi gwate majiɽinyi ŋɩru no? ḏuḏijiŋil ganu ŋuɽun ŋeno ŋun ŋate ŋiŋir no.

¹⁴ na gaja keno giro gaja gun gaduji loro ṯəɽɩl nyi gwijo muma nyi gwila lagalo, na nyi gwate majiɽinyi ŋɩru no, gi gwune nyi gwate gwubunyu ŋɩdio ŋalo no namɩni nyaŋa gi lulo lalo; gi gwune ŋate ŋan nyaɽe nyəwəɽeice ŋɩdio ldu gwan lun lilɩŋiḏɩlo no, namɩni lun lilɩŋiḏɩlo gwan nyaɽe nyagin.

¹⁵ namɩni nyi gwadile ganu gworki nyi nilarre wei ŋɩma ŋe ŋinyi kəbe nyi gwartonyɩḏe wɽi gwan nyaŋa; na ḏa nyi majəmɩnyi bucu, namɩni nyi nyalməmɩnyene ḏəmɩnyo ḏe ḏɩtieno a?

¹⁶ na ouwɩrico ŋuɽuna ŋeno alro dino nyi gwate majiɽinyi ŋɩru no, namɩni nyalarno nyi gwirdeijeje ganu ḏilɩŋeḏena ḏe gi jei jinyi nyi majigwuloḏa ŋuɽun ŋe ḏirdeijo ganu ḏinyi.

¹⁷ nyi gwibaḏaico ŋɩdio kwulo gwi gi gwete gi loro lun lɩwəjejɩlo a?

¹⁸ nyi gwuɽoṯeḏo ṯitusŋ ŋwila lagalo na lilwəjo mage gwe. ṯitus gwimape lagalo ḏibəḏəṯɩjo ŋɩdio a? anaŋa nate naṯɩwewele gwuɽɩwə gwe gwetɩdo, nate nanagwujane ŋuɽuna ŋetɩdo na?

¹⁹ nanyaluməḏɩnu gi dugwor ganu dalo dino, anaŋa anwəɽijeje ŋuɽuna ŋan lulo ləri a? nanumə gi jei ganu jeḏi elo ḏi kɩrisṯo, ŋuɽun ŋe wei ŋun ŋaṯanaŋumə kani ajilbɩɽi nanu, nyaŋa lun ləmɩnyu.

²⁰ gi gwune nyi gwiḏonyo ḏa nyi mila, nyi gwate gwajibuje liŋir liro gi lun lɩbunyilo no, na nyalɩbuje gi gwun gwate gwubunyanya no. na gwəti ŋuɽun ŋaje lagalo ŋe ḏɩbereḏa, na ḏiɽia ganu kwiji, na ḏɩɽeḏa ganu, na ḏibunya ḏeḏi ḏiŋiriḏa ḏe lula lalo, na ḏugiḏio kworo, na ḏuməḏəṯo gi liji elo nyɩkwom, na ḏɩbuṯana, na ŋɩrəkwəno.

²¹ na nyi gwiḏonye, na ḏa nyi mila mɩna elo gwi gwinyiduji gwɩti lagalo, na lilərəjo gwula lutu lun lapo ŋuɽuna ŋun ŋɩki gwerre, na late limawɩrla ga ŋuɽun ŋun ŋaṯɩlape ŋun ŋiro ŋɩrleḏ, na ŋeḏor, na ḏidonyɩḏa ḏɩməṯo jiŋɩno no.